Liv Zob 41 - Labib An Kreol Seselwa

Leviatan

¹ Eski ou kapab lapes Leviatan avek en lanmson, oubyen anmar son lalang avek en lakord?

² Eski ou kapab pas en lakord dan son nennen? Oubyen pers son lanmaswar avek en krose?

³ Eski i pou sipliye pour ou larg li? Eski i pou anmyel ou?

⁴ Eski i pou fer en lalyans avek ou pour ou pran li koman ou lesklav pour lavi?

⁵ Eski ou pou zwe avek li parey avek en zwazo? Oubyen anmar li pour lanmizman ou bann fiy?

⁶ Eski bann komersan pou diskit lo son pri? Eski ou pou vann li an detay ant bann marsan?

⁷ Eski ou kapab pers son lapo avek en lafwin, oubyen pers son latet avek en larpon?

⁸ Poz ou lanmen lo li, e fer krwar ou pe lager avek li; ou pa pou zanmen rekonmanse.

⁹ Sa enn ki anvi kaptir li i tronpe; zis ou get li ou per.

¹⁰ Napa personn ki annan ase kouraz pour provok li. Alor, lekel ki kapab konfront li?

¹¹ Lekel ki kapab konfront li e reste vivan? Tou sa ki anba lesyel i pour mwan.

Leviatan, En Kreatir Terib

¹² Mon pa pou oubliye koz lo son lekor, son lafors ekstraordiner, son zoli figir.

¹³ Lekel ki kapab desir son lapo? Lekel ki kapab penetre son karapas epe?

¹⁴ Lekel ki'n deza fors li ouver son lanmaswar? Garni avek son bann ranze ledan i fer per.

¹⁵ Son ledo i kouver avek plizyer ranze boukliye ki sele avek kanmarad.

¹⁶ Sak lekay i telman pros ansanm, ki menm ler pa kapab penetre.

¹⁷ Zot kol ansanm enn avek lot; nanryen pa kapab separ zot.

¹⁸ Kan i eterni, lalimyer i alimen, e son lizye i rouz parey soley leve.

¹⁹ Laflanm i sorti dan son lagel, letensel i anvole.

²⁰ Lafimen i sorti dan son nennen, parey dan en marmit ki pe bwi.

²¹ Son lalenn i fer alimen sarbon, en laflanm i sorti dan son lagel.

²² Son lafors i dan son likou, tou dimoun i tranble devan li.

²³ Bann pli lo son lapo i tenir ansanm; zot sere ansanm e i difisil bouz zot.

²⁴ Son leker i dir parey ros, i solid parey ros ki kraz legren.

²⁵ Ler i leve, menm sa ki pli for i tranble; zot sove avek lafreyer.

²⁶ Menm si i ganny atake avek en lepe, oubyen en lans, en dart oubyen nenport kwa, tousala pa fer li nanryen.

²⁷ Pour li, feray i parey lapay, e bronz koman dibwa pouri.

²⁸ Dart pa fer li taye; ros dan en fles i parey en bren lapay pour li.

²⁹ Mayos i parey en bren lapay; tapaz en lans pa fer li per.

³⁰ Lapo son bavant i parey morso potis kase ki fouy en latras ler i ranpe dan labou.

³¹ I fer losean bwi parey en marmit, I fer lanmer vin koman en marmit delwil.

³² I les en latras klate deryer li, lanmer i vin blan parey labarb en vyeyar.

³³ Napa ki parey li lo later, i en kreatir ki pa zanmen per.

³⁴ I konfront tou sa ki fyer; li menm lerwa bann zannimo.