Liv Zob 4 - Labib An Kreol Seselwa

Diskour Elifaz

¹ Elifaz ki sorti Temann ti reponn Zob:

² Mon pa oze dir ou en parol; ou telman dekouraze. Me mon nepli kapab reste san koze!

³ Ou'n enstri bokou dimoun; ou'n redonn kouraz sa ki ti tro fatige.

⁴ Ou bann parol in relev bann ki'n tonbe; ou'n donn kouraz sa enn ki zenou ti feb.

⁵ Me la kan in ariv ou tour, ou tonbe. Aprezan ki maler in tap ou, ou per.

⁶ Pa ou'n met ou konfyans dan Bondye, ki ou annan pou per? Ou lavi san repros pa i donn ou lespwar!

⁷ Rapel byen: Eski maler i tonm lo en inosan? Eski en dimoun drwat i disparet?

⁸ La sa ki mon'n remarke: Dimoun ki kiltiv lenzistis e ki senm lanmizer, pou rekolte sa ki zot in senmen.

⁹ Bondye i soufle lo zot e zot disparet. Zot ganny detri par divan son lakoler.

¹⁰ Bondye i fer arete gronnyman lyon, lavwa en bebet ankoler. I kas ledan en zenn lyon.

¹¹ En lyon i mor fot manze, e bann piti en femel lyon i disperse partou.

¹² En mesaz in ariv kot mwan an sekre e mon zorey in soufle.

¹³ In arive dan en rev pandan lannwit ler en dimoun i dan son profon sonmey.

¹⁴ Lafreyer ek frison ti sezi mwan; tou mon bann lezo ti tranble.

¹⁵ En souf ti kares mon figir. Tou mon bann pwal lo mon lekor, ti drese.

¹⁶ Mon ti war en dimoun debout devan mwan. Mon ti war son laform, me mon pa ti rekonnet li. Apre en silans, mon ti antann en lavwa dir:

¹⁷ Eski en zonm mortel i kapab paret zis devan Bondye? Eski en et imen i pli pir ki son Kreater?

¹⁸ Si Bondye pa fer konfyans son bann serviter, si i war defo dan son bann mesaze,

¹⁹ eski i pou fer konfyans en et imen ki reste dan lakaz anter, ki son fondasyon i fer avek later e ki kapab ganny kraze parey en zensek?

²⁰ Dan zis en lazournen, zot ganny detri; zot disparet pour touzour san ki personn i remarke.

²¹ Difil ki tenir zot lavi i kase. Zot mor san ki zot in ganny lasazes!