Liv Zob 34 - Labib An Kreol Seselwa

Elihou I Akiz Zob

¹ Elihou ti kontinyen koze:

² Aprezan, zot bann saz, ekout mwan byen. Zot bann savan! Ouver gran zot zorey.

³ Zorey i apresye parol, parey pale i apresye manze.

⁴ Ansanm alor, annou swazir sa ki zis; antre nou, annou deside kwa ki byen.

⁵ Zob in dir: Mon inosan, me Bondye in aras mwan mon drwa.

⁶ Ler mon rod mon drwa, i dir ki mon en manter. Menm si mon pa'n komet okenn pese, mon'n ganny blese anmor.

⁷ Ki kalite zonm Zob i krwar i ete? I pran koze mirak parey i bwar delo.

⁸ I frekant bann malfeter, e mars avek bann move dimoun.

⁹ Pa i ti dir: I pa servi dan nanryen pour zonm fer plezir Bondye!

¹⁰ Alor, zot bann zonm rezonnab, ekout mwan. I pa kestyon ki Bondye i komet lemal. I pa posib ki Bondye liniver i fer sa ki mal.

¹¹ I rekonpans zonm dapre son bann aksyon. I tret zot dapre zot mannyer viv.

¹² Laverite, se ki Bondye pa azir par mesanste, e zizman Bondye liniver i touzour drwat.

¹³ Lekel ki'n donn li pouvwar lo later? Lekel ki'n met dan son lanmen lemonn antye?

¹⁴ Si i ti mazin zis pour li e repran souf lavi zis pour li,

¹⁵ tou et vivan ti ava mor en sel kou, e limanite ti ava retourn dan lapousyer.

¹⁶ Si ou entelizan, ekout mwan, ouver ou zorey, ekout mon parol.

¹⁷ Eski sa enn ki pa kontan lazistis i kapab gouvernen? Eski ou ti pou oze kondann sa enn ki zis e pwisan?

¹⁸ Lekel ki kapab dir en lerwa: Ou en bonnaryen? Oubyen ek bann sef: Zot en bann kriminel?

¹⁹ Bondye pa fer lapreferans pour bann sef; i pa montre lapreferans ant ris ek pov parey, akoz zot tou le de, zot ti ganny kre par li.

²⁰ Zot mor dan en pti moman. Dan milye lannwit, en pep i ganny sekwe e i disparet. Bann diktater i ganny tire san led zonm.

²¹ Annefe, lizye Bondye i swiv tou sa ki en zonm i fer e i war tou lepa ki i fer.

²² Napa okenn kwen ki tro fernwanr kot malfeter i kapab kasyet.

²³ Bondye pa bezwen port bokou latansyon lo en zonm pour ordonn li konparet devan son tribinal.

²⁴ I pa bezwen ouver en lanket pour fer tonbe bann sef, e apwent lot dimoun dan zot plas.

²⁵ I konn byen tou sa ki zot fer. Dan lannwit i savir zot e zot ganny kraze.

²⁶ I tap zot an piblik pour zot mesanste; konmsa, tou dimoun i kapab war.

²⁷ Zot ti'n met Bondye dekote e aret swiv li, zot ti nepli ekout son lansennyman.

²⁸ Alor, zot in pous bann pov pour kriy ver Bondye e i ti antann lapriyer sa bann malere.

²⁹ Si Bondye i reste trankil, lekel ki kapab kondann li? Si i kasyet son figir, lekel sa nasyon oubyen sa zonm ki pou kapab war li?

³⁰ I pa oule ki en malfeter i vin lerwa, akoz sa pou fer lepep tonm dan en latrap.

³¹ Me si en dimoun i dir avek Bondye: Mon'n siport lapenn mon pese, mon pa pou rekonmanse.

³² Montre mwan sa ki mon pa ankor war. Si mon'n komet lenzistis, mon pa pou fer ankor.

³³ Dapre ou, eski Bondye devre pini sa dimoun, akoz ou pa dakor avek sa ki i'n fer? Ou ki devre deside, pa mwan. Dir nou aprezan sa ki ou mazinen.

³⁴ Dimoun rezonnab pou dakor avek mwan; en saz osi ki'n ekout mwan pou dir:

³⁵ Zob i koze san konnen ki i pe dir; son bann parol pa fer sans.

³⁶ Zob i devre ganny kestyonnen a fon, akoz i reponn parey en malfeter.

³⁷ Anplis ki son pese, i vin en rebel; i bat lanmen devan nou, i kontinyen fer lakizasyon kont Bondye.