Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Liv Zob 30 - Labib An Kreol Seselwa


Kontinyasyon Diskour Zob

1 Aprezan, bann ki pli zenn ki mwan, pe riy mwan. Otrefwa, mon ti telman mepriz zot papa ki mon pa ti pou menm met zot avek mon bann lisyen ki vey mon troupo.

2 Ki mon ti pou gannyen avek bann zonm parey? Zot ti nepli annan lafors.

3 Lafen ek lanmizer ti'n sitan afebli zot, ki zot ti al rod manze dan landrwa sek, ravaze e anrin.

4 Zot ti aras bann plant maron; zot ti manz rasin bann plant.

5 Personn pa ti oule frekant zot; dimoun ti kriy avek zot, konmsi avek voler.

6 Zot ti bezwen rod labri obor bann larivyer, dan bann trou e dan bann kavern.

7 Zot ti group zot dan bann brousay; zot kriye parmi bann zarbis pikan.

8 Zot ti parey bann fou, bann bonnaryen, ki ti'n ganny sase dan pei.

9 Aprezan, zot in met mwan dan zot sanson; napa ki zot pa dir lo mwan.

10 Zot ay mwan, zot pa ti frekant mwan; zot pa ezite kras dan mon figir.

11 Akoz Bondye in pran mon lafors e rann mwan san defans, zot fer sa ki zot oule avek mwan.

12 Sa bann zans i atak mwan lo mon kote drwat; zot may mwan zanbek pour fer mwan tonbe, zot fer en semen pour fer mon maler.

13 Zot bar mwan lo tou kote; zot fer tou pour detri mwan e personn pa anpes zot.

14 Zot antre par en gran trou e zot deboul lo mwan atraver en ta debri.

15 Lafreyer in sezi mwan, mon loner in ganny balye konmsi par en koudvan. Tou mon boner in disparet parey en nyaz.

16 La mon pre pou mor; mon pas mon lazournen dan maler.

17 Aswar, tou mon lezo i fer mal; sa douler i lanse, e anpes mwan dormi.

18 Avek vyolans, i'n sezi mwan par mon lenz, e in kolte mwan.

19 I'n zet mwan dan labou; mon'n vin parey lapousyer ek lasann.

20 Mon apel ou osekour me ou pa reponn mwan; mon prezant mwan devan ou, me ou pa ni get mwan.

21 Ou'n vin kriyel anver mwan. Ou atak mwan avek tou ou lafors.

22 Ou fer divan balye mwan, ou fer mwan dous. Ou sekwe mwan par en tanpet.

23 Mon konnen ou pe anmenn mwan ver lanmor, kot tou vivan i annan randevou.

24 Ler en dimoun pe soufer, pa i anvoy lanmen? Pa i kriy osekour ler i dan maler?

25 Eski mon pa ti plere pour sa enn ki ti dan problenm? Eski mon leker pa ti soufer devan bann malere?

26 Mon ti pe esper boner, me maler ki'n vini! Mon ti pe esper lalimyer, me fernwanr ki'n vini!

27 Tou i boulverse dan mon vant, e mon san repo. Bann zour maler in tap mwan.

28 Mon marse, figir tris, napa lalimyer pour mwan. Mon debout dan lasanble e mon kriy osekour.

29 Mon'n vin frer avek bann sakal, e zanmi bann lotris.

30 Mon lapo in vin nwanr e i pe deplise; lafyev pe bril mwan ziska dan mon lezo.

31 Mon laarp i zwe zis lanmizik dey; mon laflit i akonpanny bann ki pe plere.

Labib An Kreol Seselwa © Seychelles Bible Society, 2013.

ကြှနျုပျတို့နောကျလိုကျပါ:



ကြော်ငြာတွေ