Liv Zob 3 - Labib An Kreol Seselwa

Konplent Zob Devan Bondye

¹ Anfen, Zob ti ouver labous e modi zour son nesans.

² I ti dir:

³ Si selman sa zour kan mon ti ne ti disparet e sa lannwit kan zot ti dir: En garson in ganny formen!

⁴ Mon demande ki sa zour i vin en zour fernwanr e Bondye lao i oubliy li; okenn lalimyer pa briy ankor lo li!

⁵ Mon demande ki fernwanr lanmor i pran li, e bann gro nyaz i kouver li e fernwanr i ranplas lizour.

⁶ Sa lannwit ava vin en fernwanr konplet e pa ganny konte parmi bann zour dan lannen, ni parmi bann mwan.

⁷ Mon demande ki sa lannwit i vin steril, e ki personn pa kriye avek kontantman.

⁸ Sa zour ava ganny modi par bann ki modi lizour e ki kapab fer leve dragon Leviatan.

⁹ Mon demande ki bann zetwal granmaten i tennyen! Bann zetwal bomaten ava esper lizour ki pa zanmen vini. Zanmen i pou war soley leve ankor.

¹⁰ Akoz i pa'n fer nanryen pour anpes mwan ne? Alor, mon pa ti ava konn sa maler.

¹¹ Akoz mon pa ti mor depi dan vant mon manman? Akoz mon pa ti rann mon souf an nesan?

¹² Akoz mon manman ti met mwan lo son zenou e i ti donn mwan tete?

¹³ Ozordi, mon ti ava'n mor, e mon ti ava pe repoz anpe

¹⁴ avek bann lerwa, ek bann gran dirizan later ki konstri bann moniman pour zot menm;

¹⁵ oubyen, avek bann gran sef ki posed lor e ki ti ranpli zot lakaz avek larzan.

¹⁶ Oubyen, akoz mon pa ti ganny antere parey en pti baba mor an nesan, ki pa'n zanmen war lalimyer soley?

¹⁷ Laba dan lemonn lanmor, bann malfeter i aret azite, e dimoun ki'n randi avek lavi, i anfen repoz anpe.

¹⁸ Laba, tou bann prizonnyen i dan trankilite. Zot nepli antann lavwa zot gardyen kriye.

¹⁹ Pli pti koman pli gran i la. Lesklav in ganny libere par son met.

²⁰ Akoz i les bann ki pe pas martir war lalimyer, e donn lavi bann ki ranpli avek lanmertim?

²¹ Zot esper lanmor, me lanmor pa vini. Zot rod lanmor plis ki en trezor.

²² Zot ti ava telman ere si zot ti trouv en latonm.

²³ Mon en zonm ki pa konnen kote i pe ale. Bondye in blok mwan lo tou kote.

²⁴ Mon bann soupir in vin mon nouritir. Mon bann zemisman i devide parey delo.

²⁵ Sa ki mon per, sanmenm sa ki ariv mwan. Sa ki mon pli per ankor, i tonm lo mwan.

²⁶ Mon pa santi mwan alez e mon napa trankilite, Mon nepli kapab repoze; mon traka pa zanmen fini.