Liv Zob 23 - Labib An Kreol Seselwa

Repons Zob: Bondye I Refize Fer Dyalog

¹ Zob ti reponn:

² Ozordi, mon ankor pe revolte kont Bondye. Menm si mon esey touf mon konplent, maler ki Bondye i anvoy lo mwan i pli for.

³ Si mon ti konnen kote i ete, mon ti ava kapab ariv ziska kot li.

⁴ Mon ti ava met mon ka devan li; mon ti ava prezant tou mon bann argiman!

⁵ Konmsa, mon ti ava konnen ki i annan pour dir; e konpran son bann largiman.

⁶ Eski i pou akiz mwan avek tou son lafors? O kontrer, i pou ekout sa ki mon annan pour dir.

⁷ I ava ganny en zonm drwat pour argimant avek li. Mon ziz ava deklar mwan inosan en fwa pour tou.

⁸ Me si mon al dan Les, Bondye pa la; dan Was, mon pa apersevwar li.

⁹ Eski i okipe dan Nor? Mon pa war li. Eski i pe kasyet dan Sid? Mon pa war li.

¹⁰ Pourtan, i konnen ki semen mon pran. Ler in teste mwan, mon pou sorti osi pir ki lor.

¹¹ Mon'n swiv li drwat dan son lepa, mon pa'n mars akote son semen.

¹² Mon'n touzour fidel anver bann komannman ki i'n donn mwan; mon'n gard dan mon leker, tou son bann parol.

¹³ Kan Bondye i pran en desizyon personn pa kapab fer li sanze. I realiz sa ki fer li plezir.

¹⁴ Alor, i ava akonpli sa ki i'n deside kont mwan, parey en kantite lezot plan ki i annan an rezerv.

¹⁵ Pour sa rezon, mon tranble devan li. Pli mon reflesi lo la, pli mon per li.

¹⁶ Bondye in afebli mon kouraz; Bondye Toupwisan i ranpli mwan avek lafreyer.

¹⁷ Me pa lannwit ki pou anpes mwan koze; ni fernwanr ki'n kouver mwan.