Liv Zob 22 - Labib An Kreol Seselwa

Poenm Elifaz: Zob I Vreman Koupab

¹ Alor, Elifaz ki sorti Temann ti reponn Zob:

² Eski en zonm i kapab itil pour Bondye? En dimoun saz, i itil zis pour li menm.

³ Ki plezir Bondye liniver i gannyen si ou zis? Ki benefis i gannyen si ou san repros?

⁴ Dapre ou, eski i ziz ou e i pini ou akoz ou fidel anver li?

⁵ Pa plito akoz ou'n fer sa ki mal, e ou bann fot pa kapab konte?

⁶ San rezon, ou'n pran byen ou bann frer angaz; ou'n pran zot lenz e kit zot touni.

⁷ Ou'n refize donn delo dimoun ki fatige e en morso dipen sa enn ki lafen.

⁸ Ou'n les dimoun ki annan pouvwar pran pei; ou'n les ou bann prefere enstal zot.

⁹ Ou'n fer retournen bann vev lanmen vid e ou'n kas lebra bann orfelen.

¹⁰ Pour sa bann rezon, ou antoure avek pyez e toutakou lafreyer in sezi ou.

¹¹ Fernwanr in anvai ou e ou pa war kler; ou pe noye dan gro laroul maler.

¹² Bondye, pa i lao dan lesyel? Gete ki oter bann zetwal i ete, ki mannyer zot lwen!

¹³ Ou dir: Ki Bondye i konnen? Eski i kapab ziz nou atraver bann gro nyaz?

¹⁴ Ler i pronmnen dan lesyel, bann gro nyaz i anpes li war.

¹⁵ Eski ou oule kontinyen swiv sa vye semen ki bann malfeter in touzour pran?

¹⁶ Zot in ganny detri avan zot ler; konmsi gro delo in devaste zot fondasyon.

¹⁷ Zot ti dir avek Bondye: Les nou trankil. Ki Bondye liniver i kapab fer nou?

¹⁸ Pourtan, Bondye li menm ki'n ranpli zot avek larises. Mon ganny degou pour bann plan sa bann malfeter.

¹⁹ Dimoun onnet i kontan war sa; bann inosan i riy zot.

²⁰ Zot dir: Vreman, nou bann lennmi in disparet; dife in bril sa ki zot ti kit deryer.

Elifaz I Konsey Zob Fer Lape avek Bondye

²¹ Fer lape avek Bondye e alor ou ava anpe. Alor, ou ava retrouv ou boner.

²² Aksepte bann leson ki sorti kot li; gard son bann parol dan ou leker.

²³ Si ou retourn kot Bondye liniver, ou ava revin ere. Elwanny ou avek tou lenzistis.

²⁴ Zet ou lor dan lapousyer, e lor Ofir parmi gale dan larivyer;

²⁵ les Bondye vin ou lor; les li ranplas ou ta larzan.

²⁶ Alor, Bondye liniver ava ranpli ou avek lazwa; ou ava lev ou lizye ver Bondye.

²⁷ Kan ou ava priy li, i ava ekout ou; ou ava kapab tenir ou bann promes.

²⁸ Ou ava reisi dan tou sa ki ou deside fer, e ou ava mars dan lalimyer.

²⁹ Bondye i abes bann orgeye, i sov dimoun ki pa arogan.

³⁰ I delivre menm sa enn ki koupab; ou osi, ou ava ganny sove si ou gard ou lanmen prop.