Liv Zob 20 - Labib An Kreol Seselwa

Dezyenm Poenm Sofar

¹ Alor Sofar ki sorti Naama ti dir Zob:

² Ekout byen! Mon santi ki mon bezwen reponn. Mon pe perdi pasyans.

³ Mon'n antann bann repros ki ensilte mwan; mon rezonnman in donn mwan en repons pour zot.

⁴ Eski ou pa konnen, ki depi touzour, depi ki zonm in ganny met lo later,

⁵ boner bann malfeter pa dire; e ki lazwa en malfeter i kourt?

⁶ Menm si i ti osi gran ki lesyel, e son latet ti kapab tous nyaz,

⁷ i pou disparet parey son leskreman; e dimoun ki'n konn li pou demande: Ki'n arive avek li?

⁸ I pou disparet parey en rev, i pa pou retournen. I pou disparet parey en vizyon dan lannwit.

⁹ Dimoun ki ti abitye war li pou nepli war li. Zot pa pou war menm kot i ti reste.

¹⁰ Son bann zanfan pou bezwen ranbours bann pov. Li menm i pou bezwen rann son larises.

¹¹ Menm si son lekor ti ankor zenn e for, i pou al avek dan latonm.

¹² Sa ki move i dou dan son labous. I kasyet li anba son lalang,

¹³ i sis li, i pa les li ale, e gard li dan son pale.

¹⁴ Me ler i desann dan son lestoma, i sanze e vin en venen serpan dan son vant.

¹⁵ Larises ki i'n vole, i pou vomi. Bondye pou fer li vomi sa ki i'n anvale.

¹⁶ In sis venen serpan, lalang en viper pou touy li.

¹⁷ I pa pou war ankor bann larivyer dimyel, ni bann sours lakrenm dile.

¹⁸ I pou bezwen rann tou sa larzan ki i'n ranmase, i pa pou ganny sans profite,

¹⁹ akoz i'n fer abandonn bann pov; i'n sezi lakaz ki lezot in konstri.

²⁰ I pa'n zanmen ganny ase. Dan son lavaris i pa les nanryen sape.

²¹ Son lapeti ti gro; me son boner pa pou dire.

²² Dan son lopilans, i ti enkyet; toudsort maler pou tonm lo li.

²³ Letan ki i pe ranpli son vant, Bondye pou devers son gran lakoler lo li. Sa lakoler koman lapli pou vin son manze.

²⁴ Si i esey sov bann kou avek zarm an fer, en dart an bronz pou pers li.

²⁵ Si i esey aras sa dart dan son lekor, e sa lanm dan son lefwa, alor, en lafreyer lanmor pou deswit sezi li.

²⁶ Fernwanr total in ganny rezerve pour li; en dife ki personn pa'n alimen pou devor li, avek tou sa ki reste dan son latant.

²⁷ Lesyel pou devwal son krim; e later pou dres kont li.

²⁸ Zour lakoler Bondye pou leve, en lavalas pou balye tou sa ki i posede.

²⁹ Sa i rekonpans ki Bondye i rezerve pour bann kriminel. Sa i par patrimwann ki Bondye i promet pour donn zot.