Liv Zob 18 - Labib An Kreol Seselwa

Dezyenm Poenm Bildad

¹ Alor Bildad ki sorti Soua ti reponn:

² Kan eski ou pou aret koze? Reflesir! Apre nou ava koze.

³ Akoz ou pran nou pour zannimo? Eski ou krwar ki nou osi bet ki sa?

⁴ Ou lakoler i fer ou ditor. Eski ou krwar ki akoz ou, fodre ki later i vin en dezer, oubyen fodre deplas bann ros?

⁵ Lalimyer bann malfeter pou tennyen, e laflanm zot dife pou aret briye.

⁶ Lalimyer son latant i vin sonm e lalanp ki par lao son latet pe tennyen.

⁷ Avan, i ti mars avek konfyans; aprezan i mars pti pa; son bann proze pou fer li tonbe.

⁸ Son prop lipye pou anmenn li dan en lasenn, e i deza pe mars dan son bann may.

⁹ Son talon in pri dan latrap; latrap in konmans ser li.

¹⁰ En lakord in ganny kasyet anba later pour li; en latrap in ganny plase dan son semen.

¹¹ Partou kote, lafreyer i anvai li, e pourswiv li.

¹² Lafen in detri tou son kouraz, maler i mars kot a kot avek li.

¹³ En maladi pe devor son lapo e lanmor pe anvai son lekor antye.

¹⁴ I ganny tire anba son latant kot i ti an sekirite, e i ganny trennen kot lerwa lemonn lanmor.

¹⁵ Nenport ki i kapab reste dan sa latant; i nepli pour li; souf in ganny fannen lo son propriyete.

¹⁶ Anba, son rasin pe sek anler, son bann brans pe fletri.

¹⁷ Tou dimoun dan pei in oubliy li; son non in ganny oubliye dan semen.

¹⁸ Zot tir dan lalimyer e zet dan fernwanr; i ganny sase dan lemonn.

¹⁹ I napa ni zanfan, ni desandan parmi son pep, personn pa'n sirviv dan son fanmir.

²⁰ Son sor pou etonn dimoun dan Was; bann dimoun dan Les pou soke:

²¹ Sanmenm sor bann malfeter. Menm sor pe esper sa enn ki pa konn Bondye.