Liv Zob 17 - Labib An Kreol Seselwa

Zob I Demann Soulazman

¹ Mon nepli kapab respire; lanmor pe vini. Mon latonm pe esper mwan.

² Mon antoure avek bann ki zis monke; zot bann lensilt pa les mwan ferm mon lizye.

³ Pey garanti pour mwan ganny libere. Lekel ki pou angaz li pour mwan?

⁴ Ou'n ferm zot lespri; zot nepli kapab rezonnen. Alor, pa les zot ganny laviktwar lo mwan.

⁵ Entel in envit zanmi pour partaz dipen, alor ki son bann zanfan pe espere.

⁶ Mon dan labous tou dimoun, dimoun i kras dan mon figir.

⁷ Mon lizye i vin sonm avek sagren, mon lekor in vin en lonbraz.

⁸ Dimoun onnet i etonnen kan zot war sa; dimoun inosan i ankoler kont bann malfeter.

⁹ Sa enn ki zis i reste ferm dan son semen. Sa enn ki son lanmen i prop i vin pli determinen.

¹⁰ Me zot tou, retournen. Parmi zot mon pa pou trouv personn ki vreman saz.

¹¹ Mon lavi in fini; mon bann plan in tonm dan delo; tou mon lespwar in anvole.

¹² Zot pretann ki lannwit i lizour; zot dir ki lalimyer i pros avek fernwanr.

¹³ Ki i annan pou espere? Lemonn lanmor ki mon landrwa reste. Mon pe al reste dan fernwanr.

¹⁴ Mon kriy avek latonm: Mon papa! E avek lapouritir: Mon manman, mon ser!

¹⁵ Ki lespwar mon annan ankor? Lekel ki krwar i annan lespwar pour mwan?

¹⁶ Mon lespwar pou desann dan lemonn lanmor; nou pou desann ansanm dan lapousyer.