Liv Zob 14 - Labib An Kreol Seselwa

Laswit Larepons Zob

¹ Lavi en imen, en zanfan ki en fanm in met omonn, i kourt e ranpli avek traka.

² I pouse parey en fler, apre i fletri. I disparet parey en lonbraz e i pa dire.

³ Ou fikse ou lizye lo li, me mwan, ou anmenn mwan devan tribinal.

⁴ Lekel ki kapab fer sa ki pir sorti dan sa ki enpir? Personn pa kapab.

⁵ Annefe, lavi en zonm in ganny fikse; son bann mwan in ganny konte; i pa kapab depas sa limit ki ou'n mete.

⁶ Alor, aret fikse ou lizye lo li, les li trankil. Konmsa, parey en zouvriye, i ava kontant li avek son lazournen travay.

Zob I Esper En Nouvo Lavi

⁷ Pour en pye dibwa, i annan lespwar: Si ou koup li, i pou repouse; son bann brans pou bourzonnen.

⁸ Menm si son rasin in vye dan later, e son tron i paret pouri dan lapousyer,

⁹ i ava bourzonnen, parey en zenn plant ler i ganny delo.

¹⁰ Me en dimoun i mor, lavi i kit li. I rann son dernyen soupir; apre, oli li?

¹¹ Parey en lak ki'n sek, parey en larivyer kot delo nepli koule,

¹² en imen i mor e i pa lev ankor. Osi lontan ki lesyel i egziste, i pa pou leve dan son sonmey.

¹³ Mon ti ava kontan ou kasyet mwan dan lemonn lanmor; kasyet mwan la ziska ki ou lakoler i pase. Ou ava fikse en letan kan ou pou mazin mwan.

¹⁴ Eski en dimoun mor, i kapab reviv? Mwan mon pou espere tou letan ki fodre, ziska ki mon ganny ranplase.

¹⁵ Ou ava apel mwan e mon ava reponn ou. Ou ava rode kote mon ete, mwan ki ou'n kree.

¹⁶ Ou ava aret vey mon fot, alor ki konmela ou kont tou mon lepa.

¹⁷ Mon bann fot ava ganny sele dan en sak, e ou ava blansi mon bann pese.

¹⁸ En montanny i arive tonm par morso e bann ros i deboule.

¹⁹ Parey delo i poli ros pour fer li vin gale, e gro lapli i balye later, ou fer lespwar zonm disparet.

²⁰ Ou kontinyelman demoli li e i disparet. Ou defigir li e fer li ale.

²¹ Son bann garson i ganny onore, san ki i konnen. Zot ganny abese, san ki i apersevwar.

²² Zis li ki santi douler dan son lekor. Zis li ki plennyen son prop maler.