Liv Zob 1 - Labib An Kreol Seselwa

Zob I dan Problenm

¹ Dan pei Ous, ti annan en zonm ki ti apel Zob. I ti en zonm zis e drwat. I ti annan gran respe pour Bondye e i ti evite fer sa ki mal.

² I ti annan set garson ek trwa fiy.

³ I ti posed 7,000 mouton, 3,000 samo, 1,000 bef, 500 femel bourik. I ti osi annan bokou serviter. Zob ti ganny konsidere koman pli gran personnaz dan pei Les.

⁴ Bann garson Zob ti annan labitid al kot kanmarad, sakenn son tour, pour fer lafet ansanm. Zot ti envit zot trwa ser, pour vin manze e bwar avek zot.

⁵ Kan bann zour lafet ti'n fini, Zob ti fer son bann garson vin kot li pour pirifye zot. I ti leve granmaten e ofer sakrifis pour sakenn zot; i ti dir dan li menm: Petet mon bann zanfan in fer pese e zot in modi Bondye dan zot leker! Zob ti toultan fer sa.

⁶ En zour, bann garson Bondye ti prezant zot devan SENYER. Lakizater osi ti vin parmi zot.

⁷ SENYER ti demann Lakizater, “Kote ou sorti?” Lakizater ti reponn SENYER “Mon sorti pronmnen en pe partou lo later.”

⁸ SENYER ti demann li, “Eski ou'n remark mon serviter Zob? Napa personn koman li lo later. I en zonm zis e drwat ki annan bokou respe pour Bondye, e ki evite fer sa ki mal.”

⁹ Lakizater ti reponn SENYER, “Eski ou krwar, pour nanryen ki Zob i annan respe pour Bondye?

¹⁰ Pa ou'n protez li, son lakaz, son fanmir ek tou sa ki i posede? Ou'n telman beni tou sa ki i'n antreprann, ki son bann troupo i kouver pei.

¹¹ Me zis esey tous tou sa ki i posede. Mon asire ki i pou modi ou dan ou figir.”

¹² SENYER ti dir Lakizater. “Dakor! Tou sa ki i annan i dan ou pouvwar; selman pa tous son lavi.” Alor, Lakizater ti kit prezans SENYER.

Premye Maler

¹³ En zour, letan ki bann garson ek bann fiy Zob ti pe manze e bwar diven kot zot gran frer,

¹⁴ en mesaze ti ariv kot Zob. I ti dir li, “Bann bef ti pe kas later, e bann femel bourik ti pe manze lanmenm pre akote.

¹⁵ En bann voler sorti dan Sid ti atak zot. Zot ti pran tou sa ki zot ti annan, e masakre ou bann serviter. Zis mwan ki'n sape pour vin donn ou sa nouvel.”

¹⁶ I ti ankor pe koze, ler en lot mesaze ti arive. I ti dir, “Zekler sorti dan lesyel in tonm lo bann mouton e lo ou bann serviter e bril zot. Zis mwan ki'n sape pour vin anons ou sa nouvel.”

¹⁷ I ti ankor pe koze ler en lot mesaze ti arive. I ti dir, “Trwa group voler sorti dan Nor in arive e zot in atak troupo samo. Zot in pran tou, e zot in masakre tou bann serviter. Zis mwan ki'n sape pour vin anons ou sa nouvel.”

¹⁸ I ti ankor pe koze ler en lot mesaze ti arive. I ti dir, “Ou bann garson ek ou bann fiy ti pe manze e bwar diven ansanm kot zot gran frer,

¹⁹ ler en gro divan sorti lot kote dezer ti soufle lo kat kwen son lakaz. Lakaz in tonm lo zot e zot tou, zot in mor. Zis mwan ki'n sape pour vin anons ou sa nouvel.”

²⁰ Alor Zob ti leve. I ti desir son lenz e raz son latet. I ti tonm ater e prosternen.

²¹ I ti dir: Mon'n sorti touni dan vant mon manman e mon ava retourn touni dan vant later! SENYER in donnen e SENYER in repran. Son non i ganny beni!

²² Dan tousala, Zob pa ti fer pese. I pa ti dir nanryen kont Bondye.