Levitik 17 - Labib An Kreol Seselwa

Regleman Konsernan Disan

¹ SENYER ti koz avek Moiz:

² Dir Aaron ek son bann garson, e pep Izrael antye: La sa ki SENYER in ordonnen:

³ Si en zonm parmi pep Izrael i egorz en toro, en mouton, ouswa en kabri, dan kan oubyen menm an deor kan;

⁴ si i pa prezant li devan Latant Rankont pour ofer SENYER sakrifis devan demer SENYER, i ava ganny konsidere koman koupab pour fer koule disan en et vivan. Sa zonm ava ganny rezete parmi son pep.

⁵ Konmsa, pep Izrael ava oblize aret touy zot zannimo dan lakanpanny, me zot ava anmenn kot pret devan lantre Latant Rankont pour ofer SENYER koman en sakrifis lape.

⁶ Alor, avek sa disan, pret ava asperz lotel SENYER devan lantre Latant Rankont, e bril tou lagres ki anvoy en loder ki fer plezir SENYER.

⁷ Konmsa, zot ava arete ofer zot sakrifis avek bann bondye dan laform bouk avek ki zot fer prostitisyon. Sa i ava en regleman pour zot, pour tou bann zenerasyon.

⁸ Ou ava osi dir zot: Si en Izraelit oubyen en etranze ki viv parmi zot, i ofer en sakrifis konplet, ouswa nenport ki lot sakrifis,

⁹ e ki i pa anmenn sa lofrann devan lantre Latant Rankont pour prezant devan SENYER, sa dimoun ava ganny rezete parmi son pep.

I Defann Manz Disan

¹⁰ Si en Izraelit oubyen en etranze ki pe reste parmi zot i manz disan nenport zannimo, mon pou tourn kont sa dimoun, e mon pou rezet li parmi son pep.

¹¹ Annefe, lavi en kreatir i dan son disan. Mon'n donn li pour zot fer rityel pardon lo lotel pour zot lavi. Se avek disan ki rityel pardon pese i ganny fer, akoz disan i lavi.

¹² Pour sa rezon, mon'n dir pep Izrael: Personn parmi zot, ni okenn etranze ki pe reste parmi zot, pa devre manz disan.

¹³ Si en Izraelit oubyen en etranze ki pe reste parmi zot i al lasas e i atrap en zannimo oubyen en zwazo ki i kapab manze, i ava fer koule son disan e kouver li avek later.

¹⁴ Lavi tou kreatir i dan son disan. Pour sa rezon ki mon'n dir pep Izrael: Ou pa pou manz disan okenn kreatir, akoz lavi tou kreatir i dan son disan; nenport dimoun ki manz li, pou ganny rezete dan kominote Izrael.

¹⁵ En Izraelit oubyen en etranze ki'n manz en zannimo ki'n mor natirelman, oubyen ki'n ganny desire par en zannimo sovaz, ava lav son lenz e benny dan delo. I ava reste enpir ziska aswar; apre i ava vin pir.

¹⁶ Si i pa lav ni son lenz ni son lekor, i ava koupab pour son fot.