Levitik 15 - Labib An Kreol Seselwa

Lalwa Konsernan Lenpirte Seksyel

¹ SENYER ti koz avek Moiz ek Aaron:

² Dir avek pep Izrael: Kan en zonm i ganny en lenfeksyon dan son lorgann seksyel, sa desarz ki koule i rann li enpir.

³ Si son lorgann seksyel i les sa desarz koule oubyen i'n angorze, napa diferans: Sa zonm i enpir.

⁴ Tou lili kot en zonm ki annan sa lenfeksyon in dormi i vin enpir; e tou lobze kot in asiz i vin enpir.

⁵ Tou dimoun ki tous son lili i devre lav son lenz, pran en ben; i ava reste enpir ziska aswar.

⁶ En dimoun ki asiz lo en lobze kot sa enn ki annan sa lenfeksyon in asiz, i devre lav son lenz e pran en ben; i ava reste enpir ziska aswar.

⁷ En dimoun ki tous sa zonm ki annan sa lenfeksyon, devre lav son lenz e pran en ben; i ava reste enpir ziska aswar.

⁸ Si en dimoun ki ganny sa lenfeksyon, i kras lo en dimoun ki pir, sa dimoun ava lav son lenz e pran en ben; i ava enpir ziska aswar.

⁹ En dimoun ki annan sa lenfeksyon ki asiz lo lasel en seval ava rann sa lasel enpir.

¹⁰ En dimoun ki tous nenport lobze ki i'n asiz lo la, i ava enpir ziska aswar; e en dimoun ki transport en tel lobze ava lav son lenz e pran en ben; i ava reste enpir ziska aswar.

¹¹ Si en dimoun ki annan sa lenfeksyon i tous en keksoz san ki i'n lav son lanmen dan delo, i ava lav son lenz e pran en ben; i ava reste enpir ziska aswar.

¹² Tou resipyan anter ki i'n touse ava ganny kraze; tou resipyan an bwa ava ganny lave dan delo.

¹³ En dimoun ki annan en lenfeksyon ki koule, ava pran set zour pour son pirifikasyon. I ava lav son lenz e benny dan delo kouran, e i ava vin pir.

¹⁴ Wityenm zour, i ava pran de tourtrel oubyen de pizon, e anmenn kot pret devan lantre Latant Rankont.

¹⁵ Pret ava ofer sa bann zwazo, enn koman sakrifis pour pardon pese e lot koman sakrifis konplet. Pret ava fer rityel pirifikasyon pour li devan SENYER, pour son maladi.

¹⁶ Kan en zonm i perdi son sperm, i ava benny son lekor antye dan delo. I ava reste enpir ziska aswar.

¹⁷ Tou lenz ek tou lobze an lapo ki vin an kontak avek sa sperm i devre ganny lave; i ava reste enpir ziska aswar.

¹⁸ Kan en zonm i ganny en relasyon seksyel avek en fanm, tou le de, zot devre pran en ben; zot ava reste enpir ziska aswar.

¹⁹ Kan en fanm i ganny son reg e disan i koule sorti dan son lekor, i reste enpir pandan set zour; sa enn ki tous li ava reste enpir ziska aswar.

²⁰ Tou lobze ki i dormi lo la, oubyen ki i asiz lo la pandan son reg, ava vin enpir.

²¹ Sa enn ki tous son lili ava lav son lenz e pran en ben; i ava reste enpir ziska aswar.

²² Tou dimoun ki tous nenport lobze ki i'n asiz lo la, ava lav son lenz; i ava reste enpir ziska aswar.

²³ Sa enn ki tous okenn lobze lo son lili, ouswa lo sez kot i'n asize, ava vin enpir ziska aswar.

²⁴ Si en zonm i dormi avek li, e disan son reg i koul lo li, sa zonm ava reste enpir pandan set zour; tou lili ki i dormi lo la ava vin enpir.

²⁵ Kan en fanm i perdi disan pandan plizyer zour an deor son reg, oubyen ki disan i kontinyen koule apre letan normal son reg, i ava reste enpir pandan tou letan ki sa i dire, parey pandan son reg.

²⁶ Tou lili ki i dormi lo la, e tou keksoz ki i asiz lo la, i vin enpir parey pandan son reg.

²⁷ Sa ki tous sa lili, oubyen bann lobze ki i'n asiz lo la, ava vin enpir; i devre lav son lenz e pran en ben; i ava reste enpir ziska aswar.

²⁸ Apre son reg, i ava esper set zour pour li vin pir.

²⁹ Wityenm zour, i ava pran de tourtrel oubyen de pizon e anmenn kot pret devan lantre Latant Rankont.

³⁰ Pret ava ofer enn koman sakrifis pour pardon pese e lot koman sakrifis konplet. Pret ava fer rityel pardon pese devan SENYER pour son pirifikasyon.

³¹ Konmsa, kan zot dan sa leta enpir, zot ava demann pep Izrael pour reste alekar. Alor, zot pa pou riske lanmor pour sali mon sanktyer ki parmi zot.

³² Sa i regleman konsernan dimoun ki annan en desarz oubyen ki perdi son sperm, ki fer li vin enpir;

³³ osi pour bann fanm pandan zot peryod; pour nenport ki zonm oubyen fanm ki annan en lenfeksyon; pour bann zonm ki dormi avek en fanm ki dan sa kondisyon lenpirte.