Let Pol pour bann Tit 3 - Labib An Kreol Seselwa

Devwar Kretyen

¹ Rapel zot tou, ki zot bezwen soumet zot avek bann dirizan ek bann lotorite e obei zot; ki zot devre touzour pare pour fer tou sa ki byen.

² Dir zot pa malparl personn, evit tou kerel e montre zot zanmi e poli avek tou dimoun.

³ Annefe, nou osi, dan lepase, nou ti bet, rebel e dan lerer. Nou ti lesklav toudsort kalite pasyon ek plezir. Nou ti pe viv dan mesanste e dan lanvi; dimoun ti ay nou e nou ti ay kanmarad.

⁴ Me Bondye nou Sover, i'n vin revel son labonte ek son lanmour anver bann imen.

⁵ I'n sov nou, pa akoz nou bon e zis, me akoz in annan konpasyon pour nou. I'n lav nou par Lespri Sen ki'n donn nou en nouvo nesans ek en nouvo lavi.

⁶ Annefe, Bondye in devers son Lespri Sen annabondans lo nou, par Zezi-Kri nou Sover.

⁷ Ensi, zistifye par son lagras, nou vin zeritye lavi eternel ki nou pe espere.

⁸ Sa i en parol sir. Mon oule ki ou ensiste bokou lo sa bann pwen, pour ki bann ki krwar dan Bondye, zot angaz zot pour fer bann bon aksyon. Sa i bon e itil pour tou dimoun.

⁹ Me evite fer bann diskisyon bet, bann long lalis bann zanset, kerel ek lager konsernan Lalwa. Tousala i initil e san valer.

¹⁰ Kanta bann ki fer divizyon, donn zot enn oubyen de lavertisman; apre sa, met zot alekar.

¹¹ Annefe, ou konnen ki en tel dimoun in tonm dan move semen e i dan pese. I kondann son prop lekor.

Rekomandasyon Final

¹² Kan mon pou anvoy Artemas oubyen Tisik kot ou, fer tou ou posib pour vin zwenn mwan Nikopolis, akoz mon'n deside pas liver laba.

¹³ Fer tou mannyer pour ed Zenas ki en avoka, ek Apolos avek zot vwayaz, pour ki zot pa mank nanryen.

¹⁴ Nou bann zans osi i bezwen aprann fer bann bon aksyon. Konmsa, zot ava kapab fer fas avek bann sityasyon irzan e pa viv en lavi initil.

¹⁵ Tou bann ki avek mwan i fer zot konpliman. Fer salanm tou nou bann zanmi dan lafwa. Mon demande ki lagras Bondye ava avek zot tou.