Let Pol pour bann Tit 2 - Labib An Kreol Seselwa

Vre Lansennyman Kretyen

¹ Me ou, Tit! Ansenny sa ki konform avek vre doktrin.

² Dir bann vyeyar ki zot devre modere dan tou, respektab, rezonnab e solid dan vre lafwa, lanmour ek lapasyans.

³ Dir osi bann fanm aze, ki zot devre konport zot koman dimoun ki pe viv en lavi sen. Zot pa devre kolport zaksyon ki fer ditor, ni vin lesklav lalkol. Zot devre sirtou donn bann bon konsey.

⁴ Ki zot aprann bann zenn fanm ki mannyer pour kontan zot mari ek zot bann zanfan.

⁵ Zot devre osi senp e pir, byen tenir zot, konn byen okip zot lakour, bon e obeisan anver zot mari, pour ki personn pa kritik Parol Bondye.

⁶ Ou devre ankouraz bann zennzan pour vin rezonnab.

⁷ Ou menm, ou devre donn legzanp par bann bon aksyon. Ou devre senser, e serye dan ou lansennyman.

⁸ Swazir ou bann parol, pour ki personn pa kapab kritike. Konmsa, ladverser ava kanmi akoz i pou napa okenn keksoz mal pour dir lo nou.

⁹ Ankouraz bann serviter pour obei zot met; ki zot fer plezir zot met dan tou keksoz e ki zot evit diskisyon.

¹⁰ Fodre pa ki zot vole. O kontrer, ki zot montre zot touzour bon e fidel. Konmsa, dan tou sa ki zot fer, zot fer loner lansennyman Bondye, nou Sover.

¹¹ Annefe, Bondye in revel son lagras pour sov tou dimoun.

¹² Sa lagras i ansenny nou pour abandonn nou move lavi ek bann move dezir, pour viv en lavi rezonnab, zis e fidel lo sa later anver Bondye.

¹³ Konmsa ki nou devre viv, an atandan sa gran Zour, kan laglwar nou gran Bondye ek nou Sover Zezi-Kri ava aparet.

¹⁴ Annefe, Zezi-Kri i'n donn son prop lavi pour nou, pour delivre nou dan tou mal e pirifye nou koman en pep ki pour li, en pep zele pour fer sa ki byen.

¹⁵ Konmsa ki ou devre ansennyen, par servi tou ou lotorite pour ankouraz oubyen repros bann ki ekout ou. Pa les personn mepriz ou.