Let Pol pour bann Tit 1 - Labib An Kreol Seselwa

¹ Sa let i sorti kot Pol, serviter Bondye, e zapot Zezi-Kri, pour anmenn dan lafwa tou bann ki Bondye in swazir, e dan konnesans laverite, pour zot viv koman Bondye i oule nou viv,

² dan lesperans lavi eternel. Bondye ki pa zanmen manti, ti promet nou sa lavi avan konmansman letan;

³ e kan letan ki ti'n fikse ti arive, i ti revel li par son parol dan son mesaz ki i'n konfye mwan e ki mon pe anonse dapre lord Bondye, nou Sover.

⁴ Mon ekri ou sa let, Tit, mon vre garson dan lafwa ki nou partaze. Bondye, nou Papa, ek Kris Zezi nou Sover ava donn ou lagras ek lape.

Lorganizasyon bann Legliz dan Kret

⁵ Mon'n kit ou Kret pour ou met lord dan bann keksoz kot fodre, e pour ki ou etabli bann ansyen dan sak lavil, dapre mon rekomandasyon:

⁶ En ansyen i devret en zonm san repros, mari en sel fanm. Fodre ki son bann zanfan i krwayan, avek en bon repitasyon e ki zot obeisan.

⁷ Annefe, fodre ki en dirizan Legliz ki en serviter Bondye, i san repros. I pa devre ni arogan, ni malsoufran, ni soular, ni vyolan, ni rod fer profi malonnet.

⁸ O kontrer, i devre konn donn lospitalite, kontan sa ki byen, rezonnab, zis, sen e annan kontrol lo son lekor.

⁹ I devre reste ferm dan sa mesaz sir, parey nou'n anonse. Konmsa, i ava kapab ansenny lezot dapre sa vre doktrin e montre zot lerer, bann ki pa dakor avek li.

¹⁰ Annefe, i annan bokou, sirtou parmi bann kretyen Zwif, ki rebel e ki tronp lezot par zot bann parol vid.

¹¹ Fodre ferm zot labous, akoz zot boulvers en kantite fanmir par bann keksoz ki zot pa devre ansennyen. Zot fer sa pour ganny larzan dan en fason malonnet.

¹² Enn parmi zot, zot prop profet in dir: Bann Kretwa i touzour manter, bann bebet mesan, parese ki mazin zis manze.

¹³ Sa temwannyaz i laverite. Pour sa rezon, reprimann zot severman, pour ki zot lafwa i vin solid,

¹⁴ olye kontinyen ekout bann fab Zwif, ek komannman bann zonm ki'n abandonn laverite.

¹⁵ Tou i pir pour sa enn ki pir. Me pour sa enn ki enpir, e ki refize krwar laverite, napa nanryen ki pir, akoz son lespri ek son konsyans i pouri.

¹⁶ Zot dir ki zot konn Bondye, me zot bann aksyon i prouv tou lekontrer. Zot detestab, dezobeisan e zot pa kapab fer nanryen ki bon.