Lamantasyon 5 - Labib An Kreol Seselwa

Zabitan Zerizalenm I Kriy ver Senyer

¹ SENYER! Pa oubliy sa ki'n arive avek nou; Zet ou regar lo nou, e get nou dezoner!

² Nou patrimwann i dan lanmen bann etranze. Nou lakaz i aprezan pour lezot nasyon.

³ Nou'n vin bann orfelen, san papa. Nou bann manman in vin parey bann vev.

⁴ Nou bezwen peye pour delo ki nou bwar. Nou bezwen aste dibwa pour fer dife.

⁵ Nou lennmi i lo nou ledo; nou'n randi, zot pa les nou repoze.

⁶ Nou bezwen al mandyan nou dipen avek Lezip e Lasiri

⁷ Nou bann zanset ki ti fer pese, me zot in mor. Nou ki pe anmenn konsekans zot fot.

⁸ Nou ganny dominen par bann lesklav; personn pa kapab delivre nou dan zot lanmen.

⁹ Nou riske nou lavi pour al rod manze akoz lennmi pe veye dan zanviron.

¹⁰ Lafen pe touy nou; nou lapo pe brile parey en four.

¹¹ Bann fanm in ganny vyole dan Zerizalenm; bann vyerz dan bann lavil Zida.

¹² Bann sef in ganny pann par zot lanmen; personn pa respekte bann vyeyar.

¹³ Bann zennzan in ganny abize dan moulen; Bann garson i tonbe anba pwa pake dibwa.

¹⁴ Bann vye dimoun nepli asiz obor laport lavil; bann zennzan nepli zwe lanmizik.

¹⁵ Nepli annan lazwa dan nou leker; nou ladans in vin dey.

¹⁶ Nou kouronn in tonbe lo nou latet. Maler i lo nou akoz nou'n fer pese.

¹⁷ La rezon akoz nou leker i malad. La rezon akoz nou pa war byen kler:

¹⁸ Akoz montanny Siyon in ganny abandonnen, bann sakal eran i dan semen.

¹⁹ Me ou SENYER! Ou renny i pour touzour; ou tronn pou touzour la atraver bann zenerasyon.

²⁰ Akoz ou'n oubliy nou pour touzour? Eski ou pou abandonn nou tou dilon nou lavi?

²¹ Fer nou retourn kot ou, SENYER, e nou ava retournen. Redonn nou, nou dinyite letan pase.

²² Eski ou'n vreman rezet nou pour touzour? Eski ou telman ankoler kont nou?