Ezekyel 7 - Labib An Kreol Seselwa

Senyer I Anons Lafen pour Pep Izrael

¹ SENYER ti koz avek mwan:

² Ou ki en imen, ekout sa ki mwan, Senyer BONDYE, mon deklare avek pep Izrael: I'n fini! Lafen in arive, maler i dan kat kwen pei.

³ Aprezan, lafen in ariv lo ou. Mon pou tir mon lakoler lo ou, mon pou ziz ou dapre ou kondwit, mon pou fer ou peye pour tou ou bann aksyon degoutan.

⁴ Mon pa pou pran pitye; mon pa pou montre okenn konpasyon pour personn. Mon pou pini ou move kondwit, mon pou met deor tou ou bann aksyon degoutan. Alor, ou ava konnen ki mwan menm SENYER.

⁵ La sa ki Senyer BONDYE i deklare: En maler in arive! Gro maler ki zot pa'n zanmen war pe vini.

⁶ Lafen pe vini, in arive. Maler pe vin tonm lo zot; la in arive!

⁷ Zabitan sa pei! Ou tour in arive. Ou letan in arive! Sa zour i pros, en zour konfizyon! I nepli zour selebrasyon lo montanny.

⁸ Aprezan, la mon pe al fer ou santi mon lakoler avek tou son lafors. Mon pou ziz ou dapre ou kondwit; mon pou fer ou peye pour tou ou bann aksyon degoutan.

⁹ Mon pa pou pran konpasyon pour ou; mon pa pou montre okenn pitye pour personn. Mon pou fer ou peye pour tou ou move kondwit; ou bann aksyon degoutan pou ganny revele. Alor, ou ava konnen ki mwan SENYER ki pe tap ou.

¹⁰ Sa zour zizman i la! La i vini! Ou tour in arive! Baton in pet an fler! Larogans in fleri!

¹¹ Vyolans in ogmante pour vin en baton mesanste. Nepli reste nanryen: Ni zot labondans, ni zot larises, ni zot lenportans, ni zot lafoli grander!

¹² Letan in arive, sa zour pe aprose! Bann aster pa bezwen selebre, bann vander pa bezwen aflize, akoz en gran lakoler pou tonm lo tou dimoun.

¹³ Menm si tou le de zot reste vivan, bann vander pa pou reganny sa ki zot pe vann, akoz sa vizyon ki anons destriksyon pou realize. Akoz son fot, personn pa pou kapab sov son lavi.

¹⁴ Tronpet in soufle, tou in pare, me personn pa pe al lager, akoz mon lakoler in monte kont sa pep antye.

Pinisyon pour Pese Izrael

¹⁵ Lepe pou deor e lepidemi ek lafanmin pou anndan. Sa enn ki dan laplenn pou ganny masakre; sa enn ki dan lavil pou ganny devore par lafanmin ek lepidemi.

¹⁶ Si okenn sirvivan i sov dan montanny, zot tou, parey pizon ki plennyen, zot pou zemir akoz zot pese.

¹⁷ Tou lebra pou tonbe; tou zenou pou tranble.

¹⁸ Zot pou anvlop zot dan lenz dey, zot pou konny ansanm avek lafreyer. Zot figir pou kouver avek laont; zot tou, zot pou bezwen raz zot latet telman zot onte.

¹⁹ Zot pou zet zot larzan dan lari e zot lor pa pou annan plis valer ki salte, akoz ni zot larzan, ni zot lor pa pou kapab sov zot, zour SENYER ava montre son lakoler. Zot pou napa ase manze pour satisfer zot lapeti, zot vant pou reste vid. Zot lor ek zot larzan ki'n fer zot tonm dan pese.

²⁰ Zot ti fer vantar akoz zot labote ek zot larises; zot in servi pour fer zot bann stati degoutan ek lezot lobze degoutan. Alor, mwan SENYER, mon'n fer zot larises vin degoutan pour zot.

²¹ Mon pou donn bann etranze pour fer piyaz ladan, bann bandi pou depouy zot larises e profann li.

²² Kan zot pou profann mon sanktyer, mon pou abandonn zot. Bann bandi pou penetre mon sanktyer e rann li enpir.

²³ Fabrik en lasenn, akoz pei i ranpli avek krim, lavil i ranpli avek vyolans.

²⁴ Mon pou fer nasyon pli kriyel pran posesyon zot lakaz. Mon pou detri larogans bann ki for e profann zot landrwa sakre.

²⁵ Dezas pou tonm lo zot; zot pou rod lape, me anven.

²⁶ Maler apre maler, move nouvel pou vin enn apre lot. Zot pou sipliy profet pour revel en vizyon, me pret pou nepli annan lalwa pour ansennyen. Bann ansyen pou nepli annan konsey pour donnen.

²⁷ Zot lerwa pou met dey, bann sef pou tonm dan dezespwar. Lanmen lepep dan pei antye pou tranble. Mwan, mon pou azir dapre zot kondwit; mon pou ziz zot dapre sa ki zot merite. Alor, zot ava konnen ki mwan menm SENYER.