Ezekyel 44 - Labib An Kreol Seselwa

Laport Antre lo Kote Les

¹ Sa zonm ti retourn avek mwan kot lantre lo kote Les tanp; laport ti fermen.

² SENYER ti dir mwan: Sa laport i pou reste fermen; fodre pa zanmen ouver e personn pa pou antre par la, akoz SENYER, Bondye Izrael, in antre par la; i pou reste fermen.

³ Zis prens ki pou kapab asiz pour manz repa sakre devan SENYER, akoz i en prens. I ava antre par vestibil e sorti par sa menm semen.

⁴ Apre, i ti anmenn mwan devan tanp an pasan par lantre Nor. Mon ti gete: Mon ti war tanp SENYER ranpli avek laglwar prezans SENYER; mon ti tonm lafas ater.

⁵ SENYER ti dir mwan: Ou ki en imen, port atansyon, ouver ou lizye e ouver ou zorey. Ekout tou bann regleman ki konsern tanp SENYER ek son bann rityel. Fer byen atansyon sa ki konsern bann lantre ek bann sorti sanktyer.

⁶ Dir sa bann rebel, pep Izrael: La sa ki Senyer BONDYE i deklare: Izrael, mon'n ganny ase avek ou bann pratik degoutan.

⁷ Ou anmenn bann etranze, bann ki pa sirkonsi, ni dan zot leker, ni dan zot lekor, dan mon sanktyer e profann mon tanp. Anmenmtan ki ou ofer mwan manze lagres ek disan, ou pe kas mon lalyans par tou ou bann pratik degoutan.

⁸ Ou pa'n okip mon servis sakre; me ou'n met bann etranze dan ou plas pour mon servis sakre, dan mon sanktyer.

⁹ La sa ki Senyer BONDYE i deklare: Okenn etranze, ki pa'n sirkonsi, dan son leker e dan son lekor, ni okenn etranze ki pe reste parmi pep Izrael, pa devre antre dan mon sanktyer.

Regleman pour Bann Levit

¹⁰ Bann levit ki'n abandonn mwan anmenmtan ki Izrael ti detournen avek mwan pour al ver bann zidol, zot pou sibir konsekans zot pese.

¹¹ Zot ava servi dan mon tanp koman gardyen lantre tanp ek serten servis dan tanp; zot ki ava touy bann zannimo pour sakrifis konplet ek lezot sakrifis ki lepep i ofer. Zot ava la pour servi lepep.

¹² Me akoz zot ti servi devan bann zidol e zot in fer pep Izrael tonm dan pese, mon ti fer en serman kont zot, ki zot ava port konsekans zot pese. Senyer BONDYE ki'n deklare.

¹³ Zot pa pou apros mwan pour servi mwan koman pret, ni apros bann lobze ki'n konsakre pour mwan. Sa bann keksoz i tre sakre. Zot ava port laont ek konsekans zot bann pratik degoutan.

¹⁴ Sepandan, mon pou met zot ansarz bann aktivite neseser pour fonksyonnman tanp.

Regleman pour Bann Pret

¹⁵ Bann pret-levit, bann desandan Sadok ki'n reste dan servis tanp ler pep Izrael ti abandonn mwan, se zot ki pou apros mwan e servi mwan. Zot ava debout dan mon prezans pour ofer mwan lagres ek disan. Senyer BONDYE ki'n deklare.

¹⁶ Zot ki pou antre dan mon sanktyer; zot ki pou apros mon latab pour servi mwan e zot ava responsab mon servis.

¹⁷ Alor, kan zot ariv dan lakour enteryer, zot ava met lenz latwal linenn; zot pa devre met okenn lenz lalenn ler zot dan servis, ni kot lantre lakour enteryer, ni dan tanp.

¹⁸ Zot ava met tirban latwal linenn otour latet, en morso latwal linenn otour zot leren; zot pa devre met nanryen ki pou fer zot transpire.

¹⁹ Ler zot sorti pour zwenn lepep dan lakour eksteryer, zot devre tir sa lenz ki zot in ofisye ladan e depoz li dan bann lasal sanktyer. Zot ava met lezot lenz pour zot pa ganny kontak sakre avek lepep.

²⁰ Zot pa devre raz latet, ni les zot seve long; zot ava tay li e gard li byen annord.

²¹ Okenn pret pa devre bwar diven ler i pe al antre dan lakour enteryer.

²² Zot pa devre marye avek en vev, ni avek en fanm divorse, me zis avek bann zenn fiy ki sorti dan en fanmir Izraelit.

²³ Zot ava ansenny mon pep diferans ant sa ki sakre avek sa ki profann e fer li konn distenksyon ant sa ki pir ek sa ki enpir.

²⁴ Dan en prose, zot ki ava azir koman ziz e rann zizman dapre mon lalwa. Zot ava gard mon bann komannman ek bann regleman konsernan bann lafet. Zot ava veye pour ki mon bann saba i ganny garde sakre.

²⁵ Zot pa devre al kot en dimoun mor pou rann zot enpir; me zot ava kapab zis dan ka en papa oubyen en manman, en garson oubyen en fiy, en frer oubyen en ser ki pa ankor marye.

²⁶ Apre son pirifikasyon, i ava esper set zour.

²⁷ Zour ki i antre dan tanp, dan lakour enteryer pour servis dan tanp, i ava ofer son sakrifis pour pardon son pese. Senyer BONDYE ki'n deklare.

²⁸ Konsernan bann pret, zot pou servi mwan. Zot pa pou ganny okenn propriyete dan teritwar Izrael, mwan ki zot propriyete.

²⁹ Zot ki ava manz bann lofrann vezetal, sakrifis pour pardon pese, ek sakrifis reparasyon. Tou sa ki konsakre pour mwan dan pei Izrael, i ava pour zot.

³⁰ Bann pret i devre ganny tou premye parti rekolt ek tou lofrann ki ganny konsakre pour mwan. Zot ava osi donn bann pret premye parti lapat ki fer dipen, pour ki mon beni zot fanmir.

³¹ Bann pret pa devre manz okenn zwazo mor, ni okenn zannimo mor ki'n ganny desire par en lot zannimo.