Ezekyel 40 - Labib An Kreol Seselwa

Vizyon En Nouvo Tanp

¹ Dan vennsenkyenm lannen, konmansman lannen apre deportasyon, son dizyenm zour lemwan, ki ti osi katorzyenm lannen depi ki Zerizalenm ti'n ganny kaptire, SENYER ti sezi mwan e transport mwan laba.

² Dan bann vizyon, Bondye ti transport mwan dan pei Izrael. I ti depoz mwan lo latet en montanny byen o. Lo son kote Sid, ti annan sa ki parey bann konstriksyon en lavil.

³ La kot i ti anmenn mwan, mon ti war en zonm ki ti klate koman bronz. Dan son lanmen ti annan en latres an linenn ek en baton pour mezire. I ti pe debout devan laport lavil.

⁴ Sa zonm ti dir mwan: Ou ki en imen, ouver byen gran ou lizye ek ou zorey. Port atansyon avek tou sa ki mon pou fer ou war. Pour sa rezon ki ou isi, pour al anons tou sa ki ou pou war, avek pep Izrael.

⁵ Ti annan en miray lo deor ki ti antour tanp lo tou kote. Sa zonm ti pran son baton ki ti trwa met longer e i ti mezir miray. Lepeser ti en mezir; oter ti en mezir.

⁶ Apre, i ti al kot laport ki vir lo kote Les. I ti mont bann mars e mezir palye: I ti en mezir larzer. Sak palye ti en mezir larzer.

⁷ Dan en koridor, ti annan godon pour gardyen e sak godon ti en mezir, lo sak kote. Ti annan en lespas de met edmi ant sak godon; lespas ant palye ek vestibil par anndan ti en mezir.

⁸ I ti osi mezir anndan vestibil laport; i ti ganny en mezir.

⁹ Vestibil laport enteryer, ti kat met larzer, son bann pilye ti en met.

¹⁰ Ti annan trwa godon pour gardyen lo sak kote koridor; tou le trwa ti menm grander. Bann pilye lo tou le de kote ti osi menm grander.

¹¹ Apre, i ti mezir larzer laport lantre: Senk met; larzer laport li menm, ti sis met edmi.

¹² Devan bann godon pour gardyen, ki ti kare e mezir trwa met sak kote, ti annan en baryer 50 santimet sak kote.

¹³ Apre, i ti mezir laport konmansan par deryer sorti kot en godon pour al kot lot. Son larzer ant de lantre ti mezir 13 met.

¹⁴ I ti osi mezir vestibil ki ti mezir 10 met; akote, ti annan bann pilye otour lakour.

¹⁵ Ti annan 26 met ant lespas depi lantre ziska laport vestibil.

¹⁶ Bann godon ti annan lafnet avek griyaz toultour; vestibil osi ti annan lafnet dan miray toultour par anndan; bann pilye ti dekore avek fey palm.

Lakour Tanp

¹⁷ Apre, sa zonm ti anmenn mwan dan lakour tanp, kot ti annan 30 lasal; lakour otour ti pave avek bann plak.

¹⁸ Pavaz ki ti tou dilon bann laport, ti pli ba ki lakour enteryer.

¹⁹ Apre, i ti mezir distans depi devan laport ziska bor lakour anndan; i ti ganny 52 met lo kote Les.

Laport Nor

²⁰ Sa zonm ti mezir longer ek larzer laport dan lakour eksteryer lo kote Nor.

²¹ Son bann godon, trwa lo en kote e trwa lo lot kote, son bann pilye ek son bann vestibil, tou ti menm dimansyon avek bann pour premye laport: 26 met longer e 13 met larzer.

²² Son bann lafnet, son bann vestibil, son bann brans palm, tou ti menm dimansyon avek bann ki ti vir lo kote Les. Pour ariv devan son bann vestibil anndan, ti annan set mars.

²³ Vizavi laport Nor, parey lo kote Les, ti annan en laport ki ti vir dan lakour enteryer; i ti mezir depi en laport ziska lot; ti annan 52 met.

²⁴ Apre, i ti anmenn mwan dan direksyon Sid, kot laport Sid. I ti mezir bann pilye ek bann vestibil; zot tou, zot ti menm dimansyon parey lezot laport.

²⁵ La osi, ti annan lafnet otour lantre ek bann vestibil parey lezot: 26 met longer e 13 met larzer.

²⁶ Pour ariv devan son bann vestibil enteryer, ti annan set mars pour monte. Lo sak kote ti annan bann pilye avek dekorasyon brans palm.

²⁷ Ti annan en laport enteryer lo kote Sid lakour; i ti osi mezir distans en laport ziska lot laport dan direksyon Sid: 52 met.

Lakour Enteryer: Laport Sid

²⁸ Apre, sa zonm ti anmenn mwan dan lakour enteryer par laport Sid. I ti mezir laport Sid ki ti menm dimansyon ki lezot laport.

²⁹ Son bann godon, bann pilye ek bann vestibil, tou ti menm dimansyon. Sa lantre avek son bann vestibil ti annan lafnet toultour. Zot ti 26 met longer e 13 met larzer.

³⁰ Toultour, ti annan vestibil ki ti 13 met longer e 2.6 met larzer.

³¹ Sa bann vestibil ti donn akse dan lakour eksteryer. Ti annan wit mars pour monte; lo son bann pilye, ti annan dekorasyon brans palm.

Lakour Enteryer: Laport Les

³² Apre, sa zonm ti anmenn mwan dan lakour enteryer, ver laport Les. I ti mezir laport ki ti menm dimansyon avek lezot.

³³ Son bann godon, son bann pilye ek son bann vestibil ti menm dimansyon. Sa lantre ek son bann vestibil ti annan lafnet toultour. Zot ti 26 met longer e 13 met larzer.

³⁴ Son bann vestibil ti donn akse dan lakour eksteryer. Ti annan wit mars pour monte; lo son bann pilye, ti annan dekorasyon brans palm.

³⁵ Apre, i ti anmenn mwan kot laport Nor ki i ti mezire: I ti menm dimansyon avek lezot.

³⁶ I ti annan bann godon, son bann pilye ek son bann vestibil ek bann lafnet toultour. I ti mezir 26 met longer e 13 met larzer.

³⁷ Son bann vestibil ti donn akse dan lakour eksteryer. Ti annan wit mars pour monte; lo son bann pilye, ti annan dekorasyon brans palm.

³⁸ Ti annan en lasal ki son laport ti dan vestibil lantre. La, zot ti netway bann zannimo pour sakrifis konplet ek lezot sakrifis.

³⁹ Dan vestibil lantre, ti annan de latab sak kote. Lo sa bann latab kot zannimo ti ganny touye pour sakrifis konplet ek lezot sakrifis pour pardon pese.

⁴⁰ Lo kote eksteryer vestibil, kot ou monte par lantre laport Nor, ti annan osi de latab; lo lot kote vestibil la osi ti annan de latab.

⁴¹ Ti annan kat latab lo kote enteryer e kat latab eksteryer; wit latab an tou, kot bann zannimo ti ganny touye pour sakrifis.

⁴² Ti annan kat latab an ros taye, rezerve pour preparasyon sakrifis konplet. Zot ti mezir 80 santimet longer, 80 santimet larzer e 52 santimet oter. Lo la ki bann zouti ki servi pour prepar zannimo pour sakrifis ti ganny depoze.

⁴³ Toultour bann latab, ti annan en rebor set santimet edmi oter. Lavyann pour sakrifis ti ganny plase lo sa bann latab.

⁴⁴ Deor, devan laport enteryer ti annan lasal pour bann santer: Enn ti akote laport Nor ki vir kote Sid; lot ti akote laport Les e ti vir kote Nor.

⁴⁵ Sa zonm ti dir mwan: Sa lasal ki vir kote Sid i pour bann pret ki ansarz servis tanp.

⁴⁶ Lasal enteryer ki vir kote Nor i pour bann pret ki ansarz lotel; zot bann desandan Sadok. Zis zot, parmi bann desandan Levi, ki kapab prezant zot devan SENYER pour servi li.

Lakour Enteryer ek Batiman Tanp

⁴⁷ Sa zonm ti mezir lakour, i ti en kare: 52 met longer e 52 met larzer. Lotel ti devan tanp.

⁴⁸ Apre, i ti anmenn mwan dan vestibil tanp. I ti mezir bann pilye vestibil: De met, 60 santimet lo sak kote; larzer laport ti set met e miray akote en met edmi sak kote.

⁴⁹ Vestibil ti mezir dis met edmi longer e senk met 80 santimet larzer. Ti annan dis mars pour monte, ki ti ganny ankadre par en kolonn lo sak kote.