Ezekyel 39 - Labib An Kreol Seselwa

Defet Larme Gog

¹ Ou ki en imen, anons mon parol kont Gog. Dir li: La sa ki Senyer BONDYE i deklare: Mon kont ou, Gog, gran sef dan Mesek ek Toubal!

² Mon pou vir ou e fer ou fer demi tour; ou pou sorti dan lekstrenm Nor pour ou al atak bann montanny Izrael.

³ Apre sa, mon pou tap ou: Mon pou kas ou fles ki dan ou lanmen gos e fer tonbe ou bann dart ki dan ou lanmen drwat.

⁴ Ou, avek tou ou larme ek ou bann alye, pou tonbe lo bann montanny; mon pou donn zot kadav bann zwazo ek zannimo sovaz pour devore.

⁵ Zot pou mor dan lakanpanny parey mon'n anonse. Mwan Senyer BONDYE ki'n deklare.

⁶ Mon pou met en dife dan pei Magog e parmi bann zabitan bann zil ki viv an sekirite. Zot ava konnen ki mwan menm SENYER.

⁷ Mon pou fer konn mon non sen parmi mon pep, Izrael. Mon pa pou les mon non ganny profannen ankor. Tou bann nasyon pou konnen ki mwan menm SENYER, sa enn ki sen dan Izrael.

⁸ Tousala pe konmans realize. Senyer BONDYE ki'n deklare. Sanmenm sa zour ki mon ti anonse.

⁹ Alor, bann zabitan dan bann lavil Izrael ava sorti pour alim en dife e bril tou bann zarm: Pti boukliye, gran boukliye, fles, baton, lans. Tousala pou ganny servi pour alim dife pandan set an.

¹⁰ Zot pa pou bezwen al anmas dibwa dan lakanpanny, ni koup pye dibwa dan lafore, akoz zot bann zarm ava ase pour gard sa dife alimen. Zot pou pran avek bann ki'n vol zot. Zot pou depouy bann ki'n depouy zot. Senyer BONDYE ki deklare.

Gog I Ganny Antere

¹¹ Sa zour la, mon pou swazir en landrwa dan Izrael pour anter Gog, dan vale bann vwayazer, dan Les lanmer Mor. Sa latonm pou bar semen bann vwayazer. Gog ek tou son larme pou ganny antere la e zot pou apel sa landrwa Vale larme Gog.

¹² I pou pran pep Izrael set mwan pour anter bann lekor e netway sa pei.

¹³ Tou dimoun dan pei pou anter zot. Zot pou fyer zour mon pou montre zot mon laglwar. Senyer BONDYE ki'n deklare.

¹⁴ Apre sa set mwan, zot ava swazir en group zonm ki pou pas letan pour rode e anter tou bann kadav dan pei.

¹⁵ Zot pou monte desann dan pei. Kan en dimoun i dekouver en leskelet imen, i ava met en mark dan bor pour ki bann ki fouy lafos i vin anmase pour al antere dan Vale Larme Gog.

¹⁶ I pou menm annan en lavil ki pou apel Hamona, savedir larme. Konmsa, pei ava ganny netwaye.

¹⁷ Senyer BONDYE ti deklare: Kanta ou imen, apel tou bann zwazo ek zannimo sovaz. Dir zot pour mwan: Rasanble zot! Sorti dan tou kote, rasanble pour partisip dan sakrifis ki mon pe prepare pour zot. Sa i pou en gran sakrifis ki mon pou ofer pour zot lo bann montanny Izrael. Zot ava manz lavyann e bwar disan.

¹⁸ Zot ava manz lavyann bann gran konbatan e bwar disan bann sef lo later ki pou ganny ofer dan plas bann mouton, bouk, toro, tou bann zannimo gra dan Basann.

¹⁹ Zot ava manz lagres ziska zot rasazye e bwar disan ziska zot sou. Sanmenm sakrifis ki mon pou ofer pour zot.

²⁰ Dan sa gran repa, zot pou manz ziska zot rasazye: Seval ek son kavalye, solda ek toudsort konbatan. Senyer BONDYE ki'n deklare.

²¹ Mon pou montre mon grander parmi bann nasyon; zot ava war mon pwisans dan legzekisyon mon zizman.

²² Alor, apartir sa zour, pep Izrael pou konnen ki mwan menm SENYER, zot Bondye.

²³ Bann nasyon etranze ava konnen ki pep Izrael ti ganny deporte akoz son pese, son lenfidelite anver mwan. Mon'n detourn mon vizaz avek zot e mon'n abandonn zot dan lanmen zot lennmi ki'n masakre zot.

²⁴ Mon ti tourn mon lafas kont zot e tret zot dapre zot bann aksyon degoutan ek zot pese.

²⁵ La sa ki Senyer BONDYE i deklare: Dezormen, mon pou pran pitye pour pep Izrael, mon pou sanz desten desandan Zakob; mon pou reklanm respe pour mon non sen.

²⁶ Alor, personn pa pou fer zot per; zot ava viv anpe dan zot pei. Zot ava oubliy zot laont ek tou zot aksyon enfidel anver mwan.

²⁷ Mon pou rasanble zot e fer zot sorti dan bann pei lennmi e atraver zot, mon ava montre mon sentete parmi bann nasyon.

²⁸ Zot ava konnen ki mwan menm SENYER, zot Bondye. Apre ki mon'n deport zot dan pei etranze, mon pou rasanble zot lo later Izrael. Mon pa pou kit personn deryer.

²⁹ Mon pou devers mon Lespri lo pep Izrael. Mon pa pou zanmen detourn mon vizaz ankor kont zot. Senyer BONDYE ki deklare.