Ezekyel 38 - Labib An Kreol Seselwa

Gog, En Lenstriman dan Lanmen Bondye

¹ SENYER ti koz avek mwan:

² Ou ki en imen, tourn ver Gog, dan pei Magog, ver premye prens parmi bann pep Mesek ek Toubal. Anons mon parol kont li.

³ Dir li: La sa ki Senyer BONDYE i deklare: Mon kont ou, Gog, gran sef pep Mesek ek Toubal.

⁴ Mon pou met en lanmson dan ou lanmaswar e trenn ou pardfors. Mon pou fors ou sorti avek ou larme: Seval ek son kavalye abiye dan liniform. Zot ava form en gran latroup gerye, zot tou arme avek zot boukliye ek lepe.

⁵ Bann gerye Lapers, Letyopi ek Pout, zot osi, arme avek boukliye ek zot kasket, zot ava al avek ou.

⁶ Bann gerye Gomer ek tou son latroup; Bet-Togarma ki konpletman dan Nor avek son latroup avek en gran kantite zonm sorti parmi bokou lezot pep.

⁷ Prepar ou, met ou byen pare avek tou sa bann ki avek ou; gard zot pare anba ou komann.

⁸ Dan ankor en bon pe letan, ou pou ganny enstale dan ou plas. Plitar, mon pou donn ou lord pour atak pei avek en pep ki'n sape dan lager. Zot pou sorti parmi bann nasyon kot zot ti reste e rasanble lo bann montanny Izrael ki'n reste san zabitan depi lontan. Aprezan ki zot in sorti parmi sa bann nasyon, zot ava kapab viv an sekirite.

⁹ Ou, avek tou ou bann alye ki avek ou, monte e atak zot. Ou ava desann lo zot koman en tanpet. Parey en gro nyaz, ou ava kouver pei avek ou bann troup.

¹⁰ La sa ki Senyer BONDYE i deklare: Sa zour, toudsort lide pou mont dan ou lespri. Ou ava form en proze ki anmenn maler.

¹¹ Ou ava deside al atak en pei san defans, en pep ki pe viv trankil an sekirite; en bann lavil ki napa ni miray proteksyon, ni baro.

¹² Ou ava depouy zot e sezi bann larises. Ou ava atak bann zabitan ki reste dan bann landrwa ki ti'n deza ganny detri. Zot en pep ki'n rasanble sorti parmi bann nasyon etranze. Zot in ganny bokou troupo ek lezot larises, zot reste dan milye lemonn.

¹³ Zabitan Saba ek Dedann, marsan Tarsis ek son bann vilaz otour li pou demann ou: Eski ou'n vin zis pour depouy nou avek nou bann larises? Ou'n rasanble ou troup pour depouy nou, pour pran nou lor ek nou larzan, nou bann troupo ek tou nou byen pour anmenn en gran kantite depouy lager avek ou?

¹⁴ Alor, ou ki en imen, anons sa mesaz. Dir Gog: La sa ki Senyer BONDYE i deklare: Sa zour, ki mon pep Izrael ava viv an sekirite, ou ava konnen.

¹⁵ Ou ava sorti dan ou pei dan lekstrenm Nor; ou ava anmenn en kantite dimoun avek ou lo seval pour form en troup, en larme byen for.

¹⁶ Ou ava atak mon pep Izrael, parey en nyaz ki kouver later. La sa ki pou arive apre sa: Byen lontan apre, mon pou fer ou monte e atak mon pei, pour ki atraver ou, Gog, mon ava montre ki mon sen devan bann nasyon.

¹⁷ La sa ki Senyer BONDYE i deklare: Se ou menm sa enn ki depi lontan, mon ti anonse atraver mon serviter, bann profet Izrael, ou ki mon pou fer atak mon pep.

Bondye I Pini Gog

¹⁸ Senyer BONDYE i deklare: Sa zour, kan Gog pou atak pei Izrael, mon lakoler pou monte.

¹⁹ Mon deklare dan mon zalouzi e dan mon gran lakoler, sa zour pou anmenn en gran sekous dan pei Izrael:

²⁰ Pwason dan lanmer, zwazo dan lezer, bann zannimo sovaz, sa ki ranpe lo later, tou bann imen, pou tranble devan mon prezans. Montanny pou afese, ros dan montanny pou degrengole, tou miray pou degrennen.

²¹ Mon pou anvoy lager kont Gog dan tou mon bann montanny. Senyer BONDYE ki deklare. Zot pou touy kanmarad.

²² Dan mon zizman kont li, mon pou anvoy lepidemi, zot ava ganny masakre; mon pou anvoy gro lapli ek lagrel, dife ek souf lo zot larme e lo tou zot bann alye.

²³ Konmsa ki mon pou montre tou nasyon ki mon en Bondye gran e sen. Alor, zot ava konnen ki mwan menm SENYER.