Ezekyel 36 - Labib An Kreol Seselwa

Bondye I Beni Pep Izrael

¹ Ou ki en imen, profetiz lo bann montanny Izrael. Dir zot: Montanny Izrael! Ekout parol SENYER.

² La sa ki Senyer BONDYE i deklare: Lennmi Izrael ti dir an riyan: Aprezan, sa bann vye montanny in vin pour nou.

³ Alor, pronons kont zot: La sa ki Senyer BONDYE i deklare: Zot ti oule detri e kraz montanny Izrael lo tou kote, ziska ki zot vin posesyon bann pep etranze. Dimoun in gognarde e dir tou kalite ensilt lo zot.

⁴ Pour sa rezon, montanny Izrael, ekout sa ki Senyer BONDYE i deklare avek bann montanny ek kolin, bann larivyer ek vale, bann landrwa devaste ek bann lavil abandonnen ki'n ganny depouye e kouver avek ensilt bann nasyon dan zalantour.

⁵ Alor, la sa ki Senyer BONDYE i deklare: Avek tou pasyon mon lakoler, mon pronons bann menas kont lezot nasyon e kont Edonm antye. Dan lazwa e san kanmi, sa bann nasyon, zot in pran mon pei e depouy li.

⁶ Pour sa rezon, anonse lo later Izrael! Dir avek bann montanny, bann kolin, bann ranpar ek bann vale: La sa ki Senyer BONDYE i deklare: Dan pasyon mon lakoler, mon koze akoz zot in ganny ensilte par lezot nasyon.

⁷ Pour sa rezon, la sa ki Senyer BONDYE i deklare: Mon fer serman avek lanmen leve: Sa bann nasyon otour ou pou sibir konfizyon par zot bann prop ensilt.

⁸ Me zot, montanny Izrael, zot pye dibwa pou bourzonnen e raport fri pour mon pep Izrael. Byento sa pou arive.

⁹ Mon la lo zot kote, mon pou tourn ver zot! Mon pou fer sir ki zot later pou ganny kiltive e legren pou ganny senmen dan zot later.

¹⁰ Mon pou fer grandi zot popilasyon: Izrael dan tou son teritwar pou ogmante; tou bann lavil pou ganny abite e bann landrwa devaste pou ganny rekonstri.

¹¹ Mon pou ogmant ou popilasyon, dimoun koman zannimo. Zot pou ganny bokou zanfan e vin en gran pep. Zot pou ganny peple parey dan lepase e mon pou ogmant zot prosperite plis ki avan. Alor, zot ava konnen ki mwan menm SENYER.

¹² Mon pou plas bann nasyon lo ou, Izrael, mon pep. Zot pou pran ou koman zot posesyon e zot bann zanfan pa pou ganny detri.

¹³ La sa ki Senyer BONDYE i deklare: Zot dir: Ou'n devor bann imen, ou'n touy bann zanfan ou prop nasyon.

¹⁴ Aprezan, ou pou nepli devor dimoun, ou pou nepli touy bann zanfan ou nasyon. Senyer BONDYE i deklare.

¹⁵ Mon pa pou les ou antann bann ensilt bann nasyon, ni bann parol mepri bann pep; ou pa pou les ou nasyon tonbe. Senyer BONDYE ki'n deklare.

Restorasyon Pep Izrael

¹⁶ SENYER ti koz avek mwan:

¹⁷ Ou ki en imen, ekoute! Kan pep Izrael ti ankor pe viv dan son pei, i ti fer sa pei vin enpir par son konportman ek son bann aksyon. Son kondwit ti enpir parey disan en fanm dan son reg.

¹⁸ Alor, mon'n devers lo zot mon lakoler, akoz disan ki'n koule dan sa pei e akoz bann zidol par ki zot in sali sa pei.

¹⁹ Mon'n dispers zot parmi bann nasyon, mon'n dispers zot dan tou pei. Mon'n ziz zot dapre zot lavi, dapre zot bann aksyon.

²⁰ Me, parmi bann nasyon partou kot zot in ale, zot in fer mon non sen ganny bafwe. Dimoun in menm dir: Sa pep SENYER; me zot ti forse kit son pei.

²¹ Mon'n oule prezerv mon non sen ki pep Izrael in bafwe parmi bann pep partou kot zot in ale.

²² Pour sa rezon, dir pep Izrael: La sa ki Senyer BONDYE i deklare: Pa akoz zot, ki mon'n azir konmsa, me akoz mon non sen ki zot in bafwe parmi bann nasyon partou kot zot in ale.

²³ Mon pou montre ki mon non i gran e sen parmi bann nasyon. Bann nasyon ava rekonnet mon non ki zot in bafwe ki mwan menm SENYER. Mwan Senyer BONDYE ki'n deklare.

²⁴ Mon pou retir zot parmi bann nasyon; mon pou rasanble zot dan tou bann pei kot zot ete e anmenn zot dan zot pei.

²⁵ Mon pou asperz zot avek delo pir e fer zot vin pir. Mon pou pirifye zot avek tou zot bann aksyon ek tou zot bann zidol ki'n rann zot enpir.

²⁶ Mon pou donn zot en leker nouvo e mon pou met dan zot en lespri nouvo. Mon pou tir dan zot sa leker ros e mon pou donn zot en leker laser.

²⁷ Mon pou met mon lespri dan zot pour ki zot obeir mon bann lalwa e met an pratik mon bann regleman.

²⁸ Zot pou reste dan pei ki mon'n donn zot bann zanset. Zot pou vin mon pep, e mon pou vin zot Bondye.

²⁹ Mon pou delivre zot avek tou sa ki rann zot enpir. Mon pou fer dible pouse e donn zot bon rekolt. Mon pa pou fer zot konn lafanmin ankor.

³⁰ Mon pou ogmant rapor zot pye fri ki pou donn bokou fri e zot bann plantasyon pou donn gran rekolt pour ki zot pa konn ankor laont lafanmin parmi lezot nasyon.

³¹ Alor, zot ava rapel zot bann move lavi ek zot bann aksyon ki fer onte. Zot pou kanmi pour zot bann fot ek bann aksyon degoutan ki zot in komet.

³² Pep Izrael, mon fer zot konnen ki pa akoz zot, ki mon pe azir konmsa, me zot devre vreman onte pour zot move konportman. Senyer BONDYE ki deklare.

³³ La sa ki Senyer BONDYE i deklare: Sa zour, kan mon pou pirifye zot avek tou zot fot, mon pou repeple bann lavil, e zot ava rekonstri lo bann debri.

³⁴ Sa pei devaste pou ganny kiltive; bann pasan pou nepli war en landrwa dezer.

³⁵ Zot pou dir: Sa later devaste in vin koman zarden Edenn; bann lavil detri e abandonnen, aprezan, in ganny rekonstri e repeple.

³⁶ Alor, bann nasyon dan zalantour ki'n reste deryer, ava konnen ki mwan menm SENYER ki'n rekonstri sa ki ti'n ganny kraze e ki'n replant sa ki ti'n ganny devaste. Mwan, SENYER mon'n koze e mon pou fer li.

³⁷ La sa ki Senyer BONDYE i deklare: La sa ki mon pou fer: Mon pou les pep Izrael vin rod ankor mon led, pour mwan azir dan zot faver; mon pou ogmant zot popilasyon e fer li vin nonbre parey mouton dan en troupo.

³⁸ Bann lavil devaste pou ranpli avek popilasyon, parey Zerizalenm ti otrefwa ranpli avek zannimo pour sakrifis pandan gran lafet. Alor, zot ava konnen ki mwan menm SENYER.