Ezekyel 35 - Labib An Kreol Seselwa

Pinisyon Bann Edomit

¹ SENYER ti koz avek mwan:

² Ou ki en imen, tourn ver bann rezyon montanny Edonm e profetiz kont bann zabitan.

³ Dir zot: La sa ki Senyer BONDYE i deklare: Mon pou pran aksyon kont ou, montanny Edonm! Mon pou montre mon pwisans e ou pou vin en landrwa dezer.

⁴ Mon pou detri ou bann lavil e devaste ou pei. Alor, ou ava konnen ki mwan menm SENYER.

⁵ Annefe, ou'n touzour gard rankin kont Izrael, ou'n profite pour masakre zot dan moman zot maler, letan ki zot ti pe sibir konsekans zot bann fot.

⁶ Alor, osi vre ki mon vivan, Senyer BONDYE i deklare: Mon pou fer ou disan koule. Disan ki ou'n fer koule pou ganny vanze. Ou koupab pour fer disan koule. Alor, disan pou pourswiv ou partou.

⁷ Mon pou detri montanny Edonm e fer li vin en landrwa devaste; mon pou fer disparet tou sa ki travers par la.

⁸ Mon pou kouver ou bann montanny avek kadav. Partou, bann viktim lager pou tonbe: Lo bann kolin, dan bann vale, dan bann larivyer.

⁹ Mon pou fer ou vin en rezyon devaste pour touzour; personn pa pou reste dan ou bann lavil. Alor, ou ava konnen ki mwan menm SENYER.

¹⁰ Akoz ou ti dir: Mon pou pran sa de nasyon, mon pou fer sa de pei vin mon posesyon, menm si SENYER ti la.

¹¹ Alor, osi vre ki mwan Senyer BONDYE, mon vivan, mon deklare: Mon pou tret ou avek menm lakoler, zalouzi ek laenn ki ou'n montre kont bann Izraelit. Par mon zizman kont ou, mon pou fer ou konnen lekel mwan.

¹² Ou ava konnen ki mwan SENYER, mon'n antann tou bann parol ensilt ki ou'n dir kont bann montanny Izrael. Zot in dir: Zot in ganny devaste, zot dan nou lanmen, annou profite.

¹³ Ou ti dir bann parol arogan kont mwan; mwan menm mon'n tande.

¹⁴ La sa ki Senyer BONDYE i deklare: Pandan ki tou bann nasyon dan zalantour pe selebre, mon pou detri ou konpletman.

¹⁵ Akoz ou ti montre kontantman kan ou ti war patrimwann mon pep Izrael ganny devaste, mon pou fer parey avek ou. Rezyon montanny Seir ek Edonm antye, pou ganny devaste. Alor, zot ava konnen ki mwan menm SENYER.