Ezekyel 34 - Labib An Kreol Seselwa

Bann Fo Berze Izrael

¹ SENYER ti koz avek mwan:

² Ou ki en imen, pronons mon parol kont bann berze Izrael. La sa ki Senyer BONDYE i deklare: Maler lo zot, bann berze Izrael, ki pran ka zis avek zot prop lekor! Eski bann berze pa devre pe okip zot bann mouton?

³ Zot manz lagres, zot abiy dan lalenn, zot touy mouton pli gra, me zot pa nouri troupo.

⁴ Zot pa pran ka avek bann mouton feb, ni sonny sa ki malad e pans sa ki'n ganny blese. Zot pa'n fer retournen sa ki'n egare, ni rod sa ki'n perdi. Me zot in domin lo zot avek lafors e montre zot kriyel.

⁵ Alor, zot in ganny disperse e zot in vin viktim zannimo sovaz.

⁶ Mon troupo in disperse partou dan bann montanny ek kolin. I'n disperse partou dan pei antye. Personn pa pran swen avek li; personn pa rod li.

⁷ Alor, zot bann berze, ekout parol SENYER:

⁸ La sa ki Senyer BONDYE i deklare: Osi vre ki mon vivan, mon bann mouton in ganny depouye, akoz zot napa berze. Zot in ganny devore par zannimo sovaz, akoz mon bann berze pa'n rod mon bann mouton. Zot in nouri zot prop lekor e zot pa'n nouri mon bann mouton.

⁹ Alor, zot, bann berze, ekout parol SENYER!

¹⁰ La sa ki Senyer BONDYE i deklare: Mon pou pran aksyon kont bann berze; mon pou fer zot rann mwan kont mon bann mouton. Mon pou repran mon troupo; mon pa pou kontinyen les zot ansarz, pour ki bann berze nepli kontinyen profit lo zot. Mon pou aras mon bann mouton dan zot labous; zot pa pou kontinyen servi zot pour zot nouritir.

En Bon Berze

¹¹ La sa ki Senyer BONDYE i deklare: Mwan menm, mon pou rod mon bann mouton e pran swen avek zot.

¹² Parey en berze, ki pran swen son troupo ki'n disperse partou, mon pou rasanble tou mon troupo. Mon pou al rod zot partou la kot zot in disperse, dan sa zour movetan e gro fernwanr.

¹³ Mon pou retir zot parmi bann nasyon etranze; mon pou rasanble zot e ranmenn zot dan zot pei. Mon pou nouri zot lo bann montanny Izrael, dan bann vale partou dan meyer landrwa, dan sa pei.

¹⁴ Mon pou nouri zot dan bann bon laplenn zerb e lo bann montanny Izrael. Zot ava ganny bann laplenn avek zoli zerb pour dormi e pour manze lo bann montanny Izrael.

¹⁵ Mwan menm ki pou vin berze mon troupo. Mwan menm ki pou fer zot repoze. Mwan Senyer BONDYE ki deklare.

¹⁶ Mon pou rod bann ki'n perdi; fer retournen bann ki'n egare; pans bann ki'n ganny blese e fer bann ki malad repran zot lafors. Me mon pou elimin bann ki gra e for. Mon pou diriz mon troupo avek ladrwatir.

¹⁷ La sa ki Senyer BONDYE i deklare: Kanta zot mon troupo, mon pou ziz sakenn zot; mon pou separ bann mouton mal ek bann bouk.

¹⁸ Pa zis kontante ki zot manz bon zerb. Eski zot bezwen kraz tou leres? Pa ase ki zot bwar delo kler? Eski fodre ki zot sali leres avek zot lapat?

¹⁹ Eski leres mon troupo pou manz zerb ki zot in pil lo la e bwar delo ki zot in sali?

²⁰ Alor, la sa ki Senyer BONDYE i deklare: Mwan menm ki pou ziz ant bann mouton gra ek mouton meg.

²¹ Akoz zot in pouse e bouskile avek zot kote ek zot zepol, e tap koudkorn bann ki feb ziska ki zot in ganny disperse partou deor,

²² mon pou vin sov mon troupo; zot pou nepli viktim; mwan ki pou zize lekel ki bon e lekel ki move ant zot.

²³ Mon pou etabli en sel berze: Mon serviter David. I pou nouri zot e vin zot berze.

²⁴ Mwan SENYER, mon pou vin zot Bondye e mon serviter David pou vin sef parmi zot. Mwan SENYER ki deklare.

²⁵ Mon pou fer en lalyans lape avek zot e fer disparet tou zannimo feros dan sa pei. Konmsa zot ava kapab viv anpe dan dezer e dormi dan bwa an sekirite.

²⁶ Mon pou fer zot viv dan rezyon mon montanny sakre; mon pou fer lapli tonbe dan son sezon; sa i ava lapli benediksyon.

²⁷ Bann pye fri dan lakanpanny pou raporte e later pou donn son prodwi; zot pou viv an sekirite dan zot pei. Zot ava konnen ki mwan menm SENYER, kan mon ava kas zot lasenn e delivre zot anba pouvwar bann ki'n fer zot lesklav.

²⁸ Zot pou nepli viktim bann nasyon, ni ganny devore par bann zannimo sovaz. Zot ava viv an sekirite e personn pa pou fer zot per.

²⁹ Mon pou fer zot bann plantasyon vin renonmen; zot pou nepli soufer lafen dan sa pei e zot pa pou kontinyen ganny ensilte par lezot nasyon.

³⁰ Alor, zot ava konnen ki mwan SENYER, zot Bondye, mon avek zot, e pep Izrael i mon pep. Senyer BONDYE ki deklare.

³¹ Zot, zot mon troupo, zot mon bann mouton ki mon nouri; e mwan, mon zot Bondye. Senyer BONDYE ki deklare.