Ezekyel 32 - Labib An Kreol Seselwa

Lamantasyon lo Faraon ek Lezip

¹ Premye zour, douzyenm mwan, dan douzyenm lannen, apre deportasyon, SENYER ti koz avek mwan:

² Ou ki en imen, fer en konplent kont Faraon, lerwa Lezip. Dir li: Ou ti pran ou pour en lyon parmi bann nasyon; me ou ti parey en dragon dan lanmer. Ou ti debat dan ou gran larivyer; ou ti brouy delo avek ou lapat e ou ti fer labou.

³ La sa ki Senyer BONDYE i deklare: Mon pou anvoy mon lasenn lo ou parmi bann pep ki'n rasanble e zot pou trenn ou dan mon lasenn.

⁴ Mon pou zet ou ater dan milye bann plantasyon. Mon pou fer bann zwazo antour ou e bann zannimo sovaz sorti partou kote, devor ou.

⁵ Mon pou fann ou kadav partou lo montanny, e ranpli bann vale avek ou depouy.

⁶ Mon pou aroz later avek ou disan ziska ki i kouver montanny e ranpli bann larivyer.

⁷ Kan ou pou ganny tennyen, mon pou kouver lesyel e fer vin sonm bann zetwal. Mon pou kouver soley avek en nyaz e lalin pou nepli donn son lalimyer.

⁸ Akoz ou, mon pou fer tou lalimyer dan lesyel vin sonm e plonz ou pei antye dan fernwanr. Senyer BONDYE ki deklare.

⁹ Mon pou trouble leker bokou nasyon, kan mon pou fer zot konn nouvel ou destriksyon.

¹⁰ Bokou nasyon pou soke. Zot bann lerwa pou fremir akoz ou, kan mon pou lans mon lepe devan zot. Zour ou tonbe, zot pa pou aret tranble, zot pou per pour zot prop lavi.

¹¹ La sa ki Senyer BONDYE i deklare: Lepe lerwa Babilonn pou sorti kont ou.

¹² Mon pou anvoy kont ou, larme pli terib parmi bann nasyon, ki pou touy en gran kantite parmi ou pep. Zot pou detri lafyerte Lezip e tou son pep pou ganny detri.

¹³ Mon pou detri tou son bann zannimo ki viv pre avek larivyer. Okenn lipye zonm pa pou brouy delo ankor, ni menm sabo bann troupo

¹⁴ Apre, mon pou les son delo poze; mon pou les larivyer koul trankilman parey delwil. Senyer BONDYE ki deklare.

¹⁵ Sa zour kan mon pou fer Lezip vin en dezer, depouy li avek tou sa ki i posede, e detri tou son zabitan. Alor, zot ava konnen ki mwan menm SENYER.

¹⁶ Sa i en lamantasyon ki zot ava sante; bann fanm dan tou nasyon pou sant lo Lezip e lo son gran popilasyon. Senyer BONDYE ki deklare.

Kantik lo Lezip

¹⁷ Kenzyenm zour, premye mwan, dan douzyenm lannen apre deportasyon, SENYER ti koz avek mwan:

¹⁸ Ou ki en imen, lamante lo popilasyon Lezip; fer zot desann dan profonder later avek bann fiy, tou bann gran nasyon, ansanm avek bann ki'n desann dan latonm.

¹⁹ Eski ou labote i plis ki pour lezot? Desann dan latonm avek bann ensirkonsi.

²⁰ Zot pou tonm parmi bann ki'n ganny masakre dan lager. Lepe i la pare; i pou detri Lezip avek tou son popilasyon.

²¹ Dan lemonn lanmor, bann gerye pli brav, ansyen alye Lezip, pou dir: Zot in desann, zot pe dormi ansanm bann ensirkonsi, ki'n mor dan lager.

²² Lerwa Asiri i la avek tou son bann zonm. I antoure avek tou bann ki'n tonbe dan lager.

²³ Zot latonm i la dan gran profonder lafos, e toultour son latonm, bann latonm son pep. Zot ki ti ravaz lemonn bann vivan, zot in tonbe, zot osi, zot bann viktim lager.

²⁴ Lerwa Elanm i la, avek tou son larme otour son latonm. Zot tou, bann ensirkonsi, ki'n ganny masakre dan lager, zot ki ti ravaz later bann vivan, aprezan zot la, kouver avek laont, ansanm avek tou sa ki'n desann dan lemonn lanmor.

²⁵ Annefe, lerwa Elanm avek son bann zonm pe dormi avek tou bann viktim lager; zot latonm i otour li. Zot bann ensirkonsi ki'n tonbe dan lager. Zot ti ravaz later bann vivan. La aprezan, zot kouver avek laont, ansanm avek tou bann ki'n desann dan latonm, ki'n ganny touye dan lager.

²⁶ Lerwa Mesek, Toubal, avek zot bann zonm, zot la, antoure avek latonm bann gerye. Zot tou, bann ensirkonsi ki'n mor dan lager, zot ti ravaz later bann vivan.

²⁷ Zot pa'n ganny antere avek bann brav gerye letan pase, ki ti ravaz later bann vivan. Zot bann ki pa'n sirkonsi ki'n desann dan lemonn lanmor avek tou zot zarm lager: Zot lepe poze anba zot latet ek boukliye lo zot lekor.

²⁸ Aprezan, i tour bann Ezipsyen pour ganny kraze e ganny antere parmi bann ensirkonsi ki'n tonbe dan lager.

²⁹ Edonm, son bann lerwa ek son bann prens osi i la. Malgre tou zot kouraz, zot ansanm avek lezot viktim lager. Zot osi, zot ansanm avek bann ensirkonsi ki'n desann dan latonm.

³⁰ Tou bann prens sorti dan Nor i la avek tou bann zabitan Sidon. Zot in tonbe avek lezot viktim dan laont, zot ki ti brav e fer tranble later. Aprezan, sa bann ensirkonsi, kouver avek laont, zot la ansanm avek bann ki'n ganny masakre e ki'n desann dan latonm.

³¹ Kan lerwa Lezip ava war sa, i pou ganny konsole pour son pep, akoz tou son bann zonm ki'n ganny masakre dan lager. Senyer BONDYE ki'n deklare.

³² Mon'n les lerwa Lezip ravaz later bann vivan, me la, li osi, avek son bann zonm, i pou ganny antere avek bann ensirkonsi, viktim lager. Senyer BONDYE ki deklare.