Ezekyel 31 - Labib An Kreol Seselwa

Parabol Pye Sed

¹ Premye zour, trwazyenm mwan, dan onzyenm lannen, SENYER ti koz avek mwan:

² Ou ki en imen, dir Faraon, lerwa Lezip ek son pep: Lekel ki resanble ou, lekel ki gran parey ou?

³ Ou gran parey en pye sed Liban, avek bann zoli brans ki donn lonbraz, e son leker i mont ziska dan nyaz.

⁴ Delo i nouri li, delo souteren i fer li grandi. Larivyer i koul otour, kot in ganny plante e koul toultour bann pye dibwa lafore.

⁵ Pour sa rezon, i'n vin pli gran ki tou lezot pye dibwa. I annan bokou brans, tou son bann gran brans in tale, akoz i ganny bokou delo.

⁶ Dan son bann brans, tou lespes zwazo dan lesyel ti fer zot nik. Anba son bann brans, tou zannimo sovaz ti met ba. Bokou nasyon ti reste anba son lonbraz.

⁷ I ti en zoli pye dibwa avek gran brans. Son bann rasin ti plonz dan fon ziska kot zot ganny delo annabondans.

⁸ Dan zarden Bondye, okenn pye sed pa ti parey li; okenn brans pye dibwa pa ti zoli parey li; okenn feyaz pye dibwa ki ti parey son fey. Okenn pye dibwa pa ti annan en lonbraz parey pour li. Okenn pye dibwa dan zarden Bondye, pa ti osi zoli.

⁹ Mon ti'n anbeli li avek bann gran e zoli brans. Tou pye dibwa dan Edenn, zarden Bondye, ti zalou li.

¹⁰ Alor, la sa ki Senyer BONDYE i deklare: Akoz i ti grandi ziska dan bann nyaz, lorgey in ranpli son leker.

¹¹ Mon'n abandonn li dan lanmen sef bann nasyon pli for, pour ki i ganny trete dapre sa ki i merite pour tou son mesanste. Mon'n rezet li.

¹² Bann nasyon etranze pli vyolan ki tou lezot nasyon, in koup li e kit li ater. Son bann brans in tonm partou lo bann montanny e dan bann vale. Son bann brans i ranpli bann sours delo dan pei; e tou bann pep lo later in kit son lonbraz e abandonn li.

¹³ Toudsort zwazo in vin reste lo son siko, e bann zannimo sovaz in vin abrit parmi son bann brans sek.

¹⁴ Konmsa, bann pye dibwa obor delo, pou nepli vin gran, okenn pye dibwa pa pou kapab pous par lao lezot touf zarbis. Okenn pye dibwa ki pous obor delo pa pou kapab vant son grander par lao lezot. Akoz zot tou, zot pe mor, zot pe al dan profonder later parmi bann imen, ansanm avek bann ki desann dan latonm.

¹⁵ La sa ki Senyer BONDYE i deklare: Zour ki sa pye sed in desann dan lemonn lanmor, mon'n deklar en dey; mon'n ferm li dan gran profonder; mon'n aret delo larivyer; mon'n anpes bann gran delo koule. Akoz li, mon'n kouver Liban avek nyaz sonm e bann pye dibwa lafore in sek.

¹⁶ Mon'n fer tranble tou bann nasyon avek tapaz sa pye dibwa ler in tonbe, kan mon'n fer li desann dan lemonn lanmor, avek bann ki desann dan latonm. Tou bann pli zoli pye dibwa dan Edenn, bann ki ti pli byen aroze dan Liban, in selebre dan lemonn lanmor.

¹⁷ Zot in desann dan lemonn lanmor, parmi bann ki'n ganny masakre. Zot ti siport li e zot ti reste anba son lonbraz parmi bann nasyon.

¹⁸ Dan Edenn, napa pye dibwa ki ti konparab avek ou labote ek ou grander. Pourtan, ou osi, ou'n desann avek zot dan lemonn lanmor. Ou pou dormi ansanm avek bann ki pa'n sirkonsi, avek bann ki'n ganny masakre. La sor Faraon, lerwa Lezip ek tou son pep. Senyer BONDYE ki deklare.