Ezekyel 29 - Labib An Kreol Seselwa

Profesi kont Lezip

¹ Douzyenm zour, dizyenm mwan, dan dizyenm lannen, SENYER ti koz avek mwan:

² Ou ki en imen, tourn ou ver Faraon, lerwa Lezip e profetiz kont li e kont Lezip antye.

³ Dir li: La sa ki Senyer BONDYE i deklare: Mon kont ou, Faraon, lerwa Lezip. Ou parey sa gran krokodil ki dormi dan milye larivyer. I dir: Sa i mon Nil, mon larivyer, mon'n fer li pour mwan.

⁴ Mon pou agraf en lanmson dan ou lanmaswar e fer bann pwason ou larivyer kol avek ou lekay. Mon pou redi e tir ou dan ou larivyer avek tou bann pwason larivyer ki'n kole lo ou lekay.

⁵ Mon pou zet ou dan dezer, ou, avek tou ou bann pwason ki dan larivyer Nil. Ou pou reste la ater dan laplenn. Personn pa pou ranmas ou; personn pa pou anter ou. Mon pou fer ou ganny manze par bann zannimo lo later ek zwazo dan ler.

⁶ Alor, tou zabitan Lezip ava konnen ki mwan menm SENYER. Akoz led ki ou'n donn pep Izrael, pa ti pli gran ki en pti banbou.

⁷ Ler zot atrape, i ava zis kase e bles zot dan zot zepol. Ler zot apiy lo ou, ou zis kase e fer zot lazanm tranble e paraliz zot.

⁸ Alor, la sa ki Senyer BONDYE i deklare: Mon pou anvoy lager kont ou e detri zonm koman zannimo.

⁹ Lezip pou vin en pei devaste, en dezer. A lor, zot ava konnen ki mwan menm SENYER. Akoz ou pe dir: Larivyer Nil i pour mwan, mwan ki'n fer li.

¹⁰ Akoz sa, mon pou pran aksyon kont ou ek ou bann larivyer. Mon pou fer Lezip vin zis en ta debri. Sa pei pou vin en dezer depi Migdol ziska Aswann lo frontyer Letyopi.

¹¹ Personn pa pou travers li, pa menm zannimo. Pandan 40 an i pou reste san zabitan.

¹² Mon pou fer Lezip vin en pei dezer parmi bann pei devaste. Son bann lavil pou ganny detri plis ki tou lavil. I pou reste dan sa leta pandan 40 an. Son bann zabitan pou ganny disperse partou parmi bann nasyon dan tou pei.

¹³ La sa ki Senyer BONDYE i deklare: Apre 40 an, mon pou rasanble bann Ezipsyen partou kot zot ti'n disperse.

¹⁴ Mon pou retabli sityasyon Lezip e les bann Ezipsyen retourn dan zot pei e les li form en pti rwayonm.

¹⁵ I pou vin sa pli pti rwayonm. I pa pou zanmen kapab domin lezot nasyon ankor.

¹⁶ Pep Izrael pa pou zanmen met son konfyans dan li ankor. Konmsa, Izrael pa pou rod led Lezip e les li tonm dan pese. Alor, zot ava konnen ki mwan menm Senyer BONDYE.

Lerwa Naboukodonozor I Kaptir Lezip

¹⁷ Premye zour, premye mwan, dan vennsetyenm lannen apre deportasyon, SENYER ti koz avek mwan:

¹⁸ Ou ki en imen ekoute, Naboukodonozor, lerwa Babilonn, ti obliz son larme fer en gro travay kont Tir. Latet son bann zonm ti'n ganny raze; tou zepol ti'n deplise. Me ni li, ni son bann zonm pa'n ganny peye avek Tir pour zot lapenn.

¹⁹ Alor, la sa ki Senyer BONDYE i dir: Mon pou donn Naboukodonozor, lerwa Babilonn, Lezip. I pou depouy li konpletman e detri li. I pou servi tou son larises pour pey bann gerye.

²⁰ Mon donn li Lezip koman rekonpans akoz i'n travay pour mwan, Senyer BONDYE i deklare.

²¹ Kan sa zour i arive, mon pou donn pep Izrael nouvo lafors; mon pou ouver ou labous pour ou kapab koz ankor parmi zot. Alor, zot ava konnen ki mwan menm SENYER.