Ezekyel 28 - Labib An Kreol Seselwa

Profesi kont Lerwa Tir

¹ SENYER ti koz avek mwan:

² Ou ki en imen, dir lerwa Tir: La sa ki Senyer BONDYE i deklare: Akoz lorgey in ranpli ou leker e ou'n dir: Mon en bondye; mon pe asiz lo son tronn lo milye lanmer. Me, ou pa bondye, ou zis en et imen. Ou konsider ou egal avek en bondye.

³ Ou krwar ki ou pli saz ki Danyel, ki ou konpran tou sekre.

⁴ Akoz ou lasazes ek ou disernman, ou'n fer ou fortin. Ou'n akimil en trezor, lor ek larzan.

⁵ Par ou konnesans dan komers, ou'n ogmant ou larises, ki'n ranpli ou leker avek lorgey.

⁶ Alor, la sa ki Senyer BONDYE i deklare: Akoz ou konsider ou saz koman en bondye,

⁷ mon pou anvoy bann etranze kont ou, bann nasyon ki pli terib. Zot pou atak ou labote ek prodwi ou lasazes; zot pou detri ou renonmen.

⁸ Zot pou fer ou desann dan lafos; ou pou mor par en lanmor terib an plennmer.

⁹ Eski devan bann ki pe touy ou, ou pou kontinyen dir: Mon en bondye, menm si ou pa bondye, me zis en imen dan lanmen bann ki pe touy ou?

¹⁰ Ou pou mor dan laont parey bann ensirkonsi, anba kou bann etranze. Mwan Senyer BONDYE ki deklare.

Lerwa Tir I Tonbe

¹¹ SENYER ti koz avek mwan ankor:

¹² Ou ki en imen, sant en kantik dey lo lerwa Tir. Dir li: La sa ki Senyer BONDYE i deklare: Ou ti sa model laperfeksyon, ranpli avek lasazes, avek en labote parfe.

¹³ Ou ti reste dan Edenn, zarden Bondye. Ou ti kouver avek tou kalite pyer presyez: Ribi, topaz ek dyanman, krizolit, beril ek oniks, safir, grena ek emerod. Tou ou bann bizou ek ornman ti annor prepare depi sa zour ki ou ti ganny kree.

¹⁴ Mon ti swazir ou koman en seriben protekter avek lezel gran ouver. Ou ti la lo montanny sakre Bondye. Ou ti pronmnen parmi bann pyer presyez.

¹⁵ Ou konportman ti parfe depi zour ou ti ganny kree, ziska zour ki lemal in ganny trouve dan ou.

¹⁶ Lenportans ou komers in ranpli ou avek vyolans e ou'n komet pese. Alor, mon ti sas ou lo montanny Bondye, e plas ou dan ran ordiner. Ou sa seriben protekter, mon'n fer ou disparet, parmi bann pyer presyez.

¹⁷ Lorgey in ranpli ou leker akoz ou labote; par ou renonmen, ou lasazes in koronpi. Alor, mon zet ou ater e fer ou vin en spektak devan bann lerwa.

¹⁸ Ou'n fer bokou ditor, par ou bann magouy dan komers. Ou'n sali ou bann landrwa sakre. Aprezan, mon pou fer sorti en dife avek ou ki pou bril ou. Mon pou fer ou vin en ta lasann devan tou sa ki get ou lo later.

¹⁹ Tou bann nasyon ki konn ou, pou dan lafreyer akoz ou maler. Ou'n fini; ou pou ganny detri pour touzour.

Profesi kont Sidon

²⁰ SENYER ti koz avek mwan:

²¹ Ou ki en imen, tourn ver lavil Sidon, anons sa kont li.

²² La sa ki Senyer BONDYE i deklare: Mon kont ou, Sidon! Mon pou montre mon laglwar parmi zot. Kan mon pou egzekit zizman kont li, Kan mon pou montre mon sentete, tou dimoun pou konnen ki mwan menm SENYER.

²³ Mon pou anvoy en lepidemi kont li, disan pou koule partou lo bann semen. Latak pou sorti partou dan tou kote, bann zabitan pou ganny masakre. Zot ava konnen ki mwan menm SENYER.

Izrael Pou Ganny Beni

²⁴ Alor, pou nepli annan sa pikan kont pep Izrael, sa bann pikan ki toultan fer li soufer, parmi bann pep dan zalantour ki montre zis mepri. Alor, zot ava konnen ki mwan menm SENYER.

²⁵ La sa ki Senyer BONDYE i deklare: Mon pou rasanble pep Izrael parmi bann nasyon partou kot zot ti ganny disperse. La ki mannyer mon pou montre tou bann nasyon ki mwan menm sa Bondye sen. Pep Izrael pou etabli li dan son prop pei ki mon ti donn mon serviter Zakob.

²⁶ Zot ava viv dan sekirite. Zot ava konstri zot lakaz; plant rezen. Zot pou viv an sekirite ler mon egzekit mon zizman lo bann pep dan zalantour, ki'n mepriz zot. Alor, zot ava konnen ki mwan menm SENYER zot Bondye.