Ezekyel 27 - Labib An Kreol Seselwa

Kantik Dey lo Tir

¹ SENYER ti koz avek mwan:

² Ou ki en imen, sant en kantik dey lo lavil Tir.

³ Dir Tir, sa lavil lo borlanmer, ki fer komers avek tou bann nasyon parmi pep bann zil: La sa ki Senyer BONDYE i deklare: Tir! Ou ki'n dir: Mon posed en labote parfe.

⁴ Ou teritwar i al ziska an plennmer. Ou konstrikter in donn ou en labote parfe.

⁵ Ou bordaz in ganny fer avek dibwa sipre sorti Senir. Ou lema in ganny fer avek dibwa sed sorti Liban.

⁶ Ou bann zaviron in ganny fabrike avek meyer dibwa sorti Basann. Ou pon in ganny konstri avek meyer dibwa, enkriste avek livwar, sorti zil Sip.

⁷ Ou bann lavwal in ganny koud avek linenn fen, sorti Lezip, dekore avek brodri, parey paviyon ki ou rekonnet depi lwen. Ou ti osi annan latwal kouler vyolet ek rouz sorti zil Sip.

⁸ Ou bann nazer zaviron ti bann zonm sorti Sidon ek Arvad. Ou ti pran bann maren pli abil koman matlo.

⁹ Ou ti pran bann zouvriye eksperyanse sorti Gebal pour fer bann reparasyon. Tou bann bato ek zot maren ti aret kot ou pour vin aste ou marsandiz.

¹⁰ Dan ou larme, ti annan solda sorti Lapers, Loud ek Pout. Sa bann gerye ti met zot bann boukliye ek zot kas anpandan kot ou. Zot ti fer ou renonmen.

¹¹ Bann gerye sorti Arvad ansanm avek ou prop gerye ti veye otour miray; larme sorti Gamad ti dan ou bann tour. Zot ti met zot boukliye anpandan lo ou miray ki ti rann ou labote parfe.

¹² Tarsis ti fer komers avek ou akoz ou ti posed bokou larises; zot ti fourni ou avek larzan, fer, leten ek diplon.

¹³ Menm Lagres, Toubal ek Mesek ti fer komers avek ou; zot ti fourni ou lesklav ek bann lobze an bronz kont ou marsandiz.

¹⁴ Zabitan Bet-Togarma ti vann ou seval, seval lager ek bourik.

¹⁵ Bann zabitan Dedann ti fer komers avek ou; komers bokou bann zil ti pas par ou lanmen. Zot ti pey ou avek livwar ek dibwa ebenn.

¹⁶ Bann Edomit ti fer komers avek ou e ou ti annan marsandiz annabondans. Kont ou bann prodwi, zot ti fourni ou avek pyer presyez, zoli latwal tenn an vyolet ek rouz, bann brodri, latwal linenn fen, koray ek ribi.

¹⁷ Pep Zida ek Izrael ti fer komers avek ou; annesanz pour ou prodwi zot ti fourni ou dible, zoliv ek fig kont sezon, dimyel ek lesans.

¹⁸ Damas ti fer komers avek ou akoz ou ti annan marsandiz annabondans; ou ti annan tou kalite larises. Zot ti fourni ou avek diven Helbon ek lalenn blan.

¹⁹ Depi lavil Ouzal, Vedann ek Lagres ti fourni ou avek fer forze, kannel ek plant medisinal annesanz pour ou marsandiz.

²⁰ Dedann ti fer trafik avek ou pour lekipman kavalri.

²¹ Arabi ek bann sef dan Kedar, ti ou bann komersan prefere. Zot ti fourni ou avek mouton ek kabri annesanz pour ou marsandiz.

²² Bann komersan Saba ek Rama, zot ti fer komers avek ou dan bann bon kalite lesans, pyer presyez ek lor.

²³ Lavil Harann, Kane ek Edenn, parey komersan Saba, Asour ek Kilmad, zot osi, zot ti fer komers avek ou.

²⁴ Zot ti fer trafik avek ou dan bann lenz deliks, lenz kouler, lenz brode, karpet tou kouler ek zoli lakord byen trese.

²⁵ Tou ou bann marsandiz ti ganny transporte dan bann gran bato sorti Tarsis. Tir! Ou ranpli avek marsandiz. Ou ti parey en bato sarze an plennmer.

²⁶ Ou bann nazer zaviron in anmenn ou dan kre. Divan sorti dan Les in kraz lo ou an plennmer.

²⁷ Ou larises, ou bann prodwi, ou bann marsandiz, ou bann maren ek tou ou lekipaz, bann artizan ki repar ou bann domaz, komersan ki negosye ou marsandiz, tou bann gerye dan ou servis. Zour ou pou koule, zot tou pou desann dan fon; ou, avek tou sa ki abor.

²⁸ Ler zot pou antann ou bann matlo kriye, bann zabitan lakot pou tranble.

²⁹ Tou bann nazer zaviron pou abandonn zot bato. Tou maren ek lekipaz pou reste ater.

³⁰ Zot pou pler lo ou e lamante avek plent anmer. Zot pou fann lapousyer lo zot latet; zot pou roul zot dan lasann.

³¹ Akoz ou, zot pou raz zot latet e met lenz dey. Zot pou kriye e lamante akoz ou.

³² Dan zot douler, zot pou sant sa kantik dey e lamante pour ou: Tir! Napa okenn lavil parey ou. Me ou'n ganny detri an plennmer.

³³ Kan ou ti debark bann marsandiz, bokou pep ti satisfe. Bann lerwa lo later in anrisi avek lakantite prodwi ou komers.

³⁴ Aprezan, ou'n ganny kraze par gro laroul. Gro lanmer in kouver ou, tou ou marsandiz ek ou lekipaz in koul avek ou dan fon lanmer.

³⁵ Tou bann zabitan bann zil, zot dan lapenn akoz ou. Zot bann lerwa i dan gran latristes. Lafreyer i marke lo zot figir.

³⁶ Bann komersan parmi bann pep pe gognard ou. Dimoun i dan gran sirpriz kan zot war ki ou'n fini pour touzour.