Ezekyel 26 - Labib An Kreol Seselwa

Profesi kont Tir

¹ Premye zour lemwan, dan onzyenm lannen apre deportasyon, SENYER ti koz avek mwan:

² Ou ki en imen, ekoute sa ki zabitan Tir in dir kont Zerizalenm: Laport kot tou pep i pase in kase; i'n ouver pour mwan; i mon tour pour mwan vin ris, la ki i'n ganny detri.

³ Alor, la sa ki Senyer BONDYE i deklare: Tir! Mon pou pran aksyon kont ou. Parey lanmer i anvoy son bann laroul, mon pou anvoy bann nasyon kont ou.

⁴ Zot pou detri bann miray Tir, zot pou demoli son bann tour. Mon pou grat tou son later e kit bann ros touni.

⁵ I pou vin dan milye lanmer, zis en landrwa kot zot fer sek lasenn, akoz mwan Senyer BONDYE mon'n koze. Bann nasyon etranze pou vin depouy li;

⁶ son bann fiy ki dan lakanpanny pou ganny masakre. Alor, dimoun ava konnen ki mwan menm SENYER.

⁷ La sa ki Senyer BONDYE i deklare: Mon pou fer vini kont Tir, Naboukodonozor lerwa Babilonn, en lerwa parmi bann lerwa, avek tou son seval ek kales lager, son bann kavalye ek en gran larme, sorti dan Nor.

⁸ I pou masakre ou bann fiy dan lakanpanny. I pou fouy transe e met en miray boukliye kont ou.

⁹ I pou defons ou miray avek son masin lager e demoli ou bann tour avek pik.

¹⁰ Ou pou ganny kouver avek son lapousyer, telman pou annan en kantite seval. Tapaz bann kavalye ek zot kales lager, pou fer tranble ou bann miray. Annefe, zot pou antre par ou bann laport konmsi miray ti'n defonse.

¹¹ I pou kraz tou ou bann semen anba bann sabo son bann seval. I pou masakre ou bann zabitan; ou bann gro kolonn pou degrengole.

¹² Zot pou pran ou bann larises e vol tou ou marsandiz; zot pou demoli ou bann miray e detri ou bann pale. Zot pou pran tou ou ros, dibwa ek later e zet zot dan fon lanmer.

¹³ Mon pou fer arete lanmizik ek ou bann sanson; pou nepli antann son lanmizik lo laarp.

¹⁴ Mon pou fer ou vin parey en ros sek; ou pou vin en landrwa kot ou fer sek lasenn; lavil pa pou zanmen ganny rekonstri. Mwan, SENYER mon'n koze.

¹⁵ La sa ki Senyer BONDYE i deklare kont Tir: Bann zabitan bann zil pou tranble kan zot pou tande ki ou'n ganny detri; kan zot pou antann ou lamante e ganny nouvel ki ou bann zabitan in ganny masakre.

¹⁶ Tou bann lerwa dan rezyon lakot pou kit zot tronn. Zot pou kit zot rob ek zot lenz brode. Zot pou tranble avek gro lafreyer; zot pou asiz ater dan lafreyer e zemir lo ou sor.

¹⁷ Zot pou sant sa kantik dey pour ou: Gete! La ou'n ganny detri ou ki ti en lavil enportan. Ou'n disparet lo bor lanmer ou ki ti pwisan lo lanmer e ki ti fer tou dimoun per.

¹⁸ Pep bann zil ti tranble zour ou ti tonbe. Zabitan bann zil ti per akoz ou nepli egziste.

¹⁹ La sa ki Senyer BONDYE i deklare: Mon pou detri ou e fer ou vin en lavil anrin, kot personn pa reste. Mon pou fer gro delo monte e kouver ou konpletman.

²⁰ Mon pou fer ou desann dan lemonn lanmor avek bann ki'n ale depi lontan. Mon pou fer ou reste dan profonder later. Parey bann rin lantikite, ou pou reste avek sa ki dan lemonn lanmor; ou pou nepli annan okenn zabitan e mon pou donn later bann vivan ou labote.

²¹ Ou sor pou efreyan; ou pou nepli. Menm si zot rod ou, personn pa pou trouv ou ankor. Senyer BONDYE ki deklare.