Ezekyel 25 - Labib An Kreol Seselwa

Profesi kont Amonn

¹ SENYER ti koz avek mwan:

² Ou ki en imen, tourn ou ver bann Amonit e profetiz kont zot.

³ Dir zot ekout parol Senyer BONDYE: La sa ki Senyer BONDYE i deklare: Ou ti byen riye kan mon sanktyer ti ganny profannen, kan pei Izrael ti ganny devaste e pep Zida ti ganny deporte.

⁴ Alor, mon pe al livre ou dan lanmen bann tribi sorti dan Les; ou pou vin zot posesyon. Zot pou etabli zot kan se ou, mont zot latant kot ou, manz ou fri e bwar ou dile.

⁵ Mon pou fer ou lavil Raba vin en laplenn pour bann samo e bann lavil Amonit, en park pour bann mouton. Alor, ou ava konnen ki mwan menm SENYER.

⁶ La sa ki Senyer BONDYE i deklare: Akoz ou'n bat lanmen, ou'n danse, ou'n pile, ou'n selebre depi dan fon ou leker lo maler Izrael,

⁷ mon pou pran aksyon kont ou. Mon pou livre ou dan lanmen bann etranze e ou pou ganny depouye. Mon pou fer ou disparet koman en nasyon e detri ou pei konpletman. Alor, ou ava konnen ki mwan menm SENYER.

Profesi kont Moab

⁸ La sa ki Senyer BONDYE i deklare: Akoz Moab ek Seir in dir: Pep Zida i parey tou lezot nasyon,

⁹ mon pou les bann lavil lo frontyer Moab ganny atake ansanm avek lezot son bann lavil: Bet-Yesimot, Baal-Meonn ek Kiryataim.

¹⁰ Mon pou les bann tribi sorti dan Les pran posesyon Moab parey zot in pran Amonn, pour ki dan lavenir personn pa pou rapel Moab.

¹¹ Mon pou egzekit mon zizman kont Moab. Alor, zot ava konnen ki mwan menm SENYER.

Profesi kont Edonm

¹² La sa ki Senyer BONDYE i deklare: Akoz bann Edomit in azir avek vanzans kont pep Zida, e ki zot in komet en gro lofans par zot vanzans,

¹³ la sa ki Senyer BONDYE i deklare: Mon pou pran aksyon kont Edonm; mon pou ekstermin imen koman zannimo; mon pou devaste sa pei e masakre son zabitan par lager depi Temann ziska Dedann.

¹⁴ Mon pou les mon pep Izrael tir vanzans kont Edonm. Izrael pou tret zot dapre mon gran lakoler e zot ava rekonnet mon vanzans, Senyer BONDYE i deklare.

Profesi kont Filisten

¹⁵ La sa ki Senyer BONDYE i deklare: Bann Filisten in azir avek vanzans. Zot in vanze avek bokou rankin dan zot leker e avek en laenn depi lontan.

¹⁶ Alor, la sa ki Senyer BONDYE i deklare: Mon pou pran aksyon kont bann Filisten; mon pou detri bann Keretit ek tou sa ki reste lo borlanmer.

¹⁷ Mon pou egzekit mon vanzans e pini zot avek lakoler. Alor, zot ava santi mon vanzans e zot ava konnen ki mwan menm SENYER.