Ezekyel 20 - Labib An Kreol Seselwa

Lavolonte Bondye ek Rebelyon Imen

¹ Dizyenm zour, senkyenm mwan, dan setyenm lannen apre deportasyon, serten ansyen dan Izrael ti vin war mwan pour konsilte SENYER; zot ti asiz devan mwan.

² SENYER ti koz avek mwan:

³ Ou ki en imen, koz avek bann ansyen dan Izrael: La sa ki Senyer BONDYE i deklare: Akfer zot in vin konsilte mwan? Me osi vre ki mon vivan, mwan Senyer BONDYE mon deklare, mon pa pou les zot konsilte mwan.

⁴ Dir mwan, ou ki en imen, eski ou pou ziz zot? Alor, dir zot bann pratik degoutan ki zot zanset ti komet.

⁵ Dir zot: La sa ki Senyer BONDYE i deklare: Zour mon ti swazir pep Izrael, mon ti fer en serman avek bann desandan Zakob. Mon ti fer zot konn mwan Lezip; mon ti fer en serman; lanmen leve, mon ti dir: Mwan menm SENYER zot Bondye.

⁶ Sa zour, mon ti fer en promes solannel, ki mon pou tir zot dan sa pei Lezip e anmenn zot dan sa pei pli merveye ki mon'n swazir pour zot, kot i annan dile ek dimyel annabondans.

⁷ Mon ti dir zot: Sakenn parmi zot, abandonn sa bann lobze degoutan ki zis atir regar! Pa rann zot enpir avek bann zidol Lezip. Mwan menm Senyer BONDYE.

⁸ Me zot ti revolte kont mwan e refize ekout mwan. Personn pa'n oule abandonn sa bann lobze degoutan ki ti atir zot lizye, ni rezet bann zidol Ezipsyen. Alor, mon ti annan lentansyon tir mon gran lakoler lo zot san okenn pitye e les zot ale ziska Lezip.

⁹ Me mon'n azir avek konsiderasyon pour mon loner, pour ki mon non pa ganny profannen parmi bann nasyon kot zot zanset ti reste. Annefe, sa bann nasyon ti deza konn mon promes pour fer zot sorti Lezip.

¹⁰ Alor, mon ti fer zot sorti Lezip e anmenn zot dan dezer.

¹¹ Mon ti donn zonm mon bann lalwa e fer zot konn mon bann regleman ki pou fer zot viv, si zot met li an pratik.

¹² Mon ti osi donn zot mon bann saba koman en siny ant mwan ek zot, pour ki zot konnen ki mwan SENYER ki rann zot sen.

¹³ Me pep Izrael ti revolte kont mwan dan dezer. Zot pa ti swiv mon bann lalwa e zot ti rezet mon bann regleman ki zonm devre obei pour viv. Zot in montre mepri pour mon saba. Dan mon lakoler, mon ti anvi detri zot dan dezer.

¹⁴ Pourtan, mon'n azir avek konsiderasyon pour mon loner, pour ki mon non pa ganny profannen parmi bann nasyon ki ti war kan mon ti fer zot sorti Lezip.

¹⁵ Mon ti osi fer en serman avek zot dan dezer, pour pa pou anmenn zot dan sa pei ki mon ti'n donn zot, sa pli merveye pei kot i annan dile ek dimyel annabondans.

¹⁶ Akoz zot ti rezet mon bann regleman, zot pa'n obei mon bann lalwa e zot pa'n gard mon saba. Zot in prefere ador bann zidol.

¹⁷ Me mon'n annan en regar pitye pour zot; mon pa'n detri zot, mon pa'n ekstermin zot dan dezer.

¹⁸ Mon ti dir avek zot bann zanfan dan dezer: Pa obei lalwa zot bann zanset, pa gard zot bann regleman, ni rann zot enpir avek zot bann zidol.

¹⁹ Mwan menm SENYER, zot Bondye. Obei mon bann lalwa, swiv mon bann regleman e met zot an pratik.

²⁰ Gard mon bann saba koman sakre, pour ki i ava vin en siny ant mwan ek zot, par lekel zot ava rapel ki mwan SENYER, zot Bondye.

²¹ Me sa bann zanfan ti revolte kont mwan, zot pa ti obei mon bann lalwa; zot pa ti swiv mon bann regleman ki zonm i devre obei pour viv. Me zot in profann mon saba. Alor, mon ti'n pare pour tir mon gran lakoler san okenn kontrol lo zot dan dezer.

²² Me mon pa ti fer li; mon ti azir an konsiderasyon mon loner pour ki mon non pa ganny profannen parmi bann nasyon ki ti war kan mon ti fer zot sorti Lezip.

²³ Dan dezer, mon ti ankor fer en serman ki mon pou dispers zot atraver tou bann pei etranze, parmi tou lezot nasyon,

²⁴ akoz zot pa ti gard mon bann regleman, zot in rezet mon bann lalwa e profann mon bann saba; zot in les zot ganny atire par bann zidol zot bann zanset.

²⁵ An plis, mon ti menm donn zot bann lalwa ki pa ti bon ek bann regleman ki zot pa ti kapab viv avek.

²⁶ Me mon ti les zot vin enpir par zot bann don, ler zot ti ofer an sakrifis zot premye zanfan pour mwan, pour fer zot per e pour ki zot konnen: Mwan ki SENYER.

²⁷ Alor, ou ki en imen, koz avek pep Izrael, dir zot: La sa ki Senyer BONDYE i deklare: Zot bann zanset in ankor ensilte mwan par zot enfidelite.

²⁸ Mon'n anmenn zot dan sa pei ki mon ti promet par en serman pour donn zot. Me zot in les zot ganny atire par sak kolin ek sak touf feyaz. La, zot in ofer zot bann sakrifis, prezant bann don ki ti fer mwan ankoler par bann lofrann avek loder ki ti fer plezir ek lofrann labwason. Zot in fer tousala zis pour fer monte mon lakoler.

²⁹ Mon ti demann zot: Kisisa sa bann landrwa sakre kot zot ale? Depi sa, zot ti apel li landrwa sakre.

³⁰ Alor, dir pep Izrael: La sa ki Senyer BONDYE i deklare: Pa bezwen rann zot enpir parey zot bann zanset, e livre zot dan prostitisyon avek zot bann zidol degoutan.

³¹ Menm aprezan, kan zot ofer sakrifis zot bann zanfan ki zot brile dan dife devan bann zidol, zot rann zot enpir. Pep Izrael! Zot krwar mon pou les zot konsilte mwan? Osi vre ki mon vivan, mon pa pou les zot konsilte mwan, Senyer BONDYE i deklare.

³² Zot in met dan zot lespri ki zot pou vin parey lezot nasyon. Parey lezot pep dan lezot pei, zot oule ador bann pye dibwa ek ros. Me sa pa pou zanmen arive.

Bondye ki Pini e Pardonnen

³³ Osi vre ki mon vivan, Senyer BONDYE i deklare: Mon pou servi tou mon lafors ek tou mon pwisans: Mon pou les mon lakoler deborde kont zot; mon pou vin zot lerwa.

³⁴ Mon pou fer zot sorti parmi bann diferan nasyon kot zot in disperse. Mon pou tir zot partou dan bann pei kot zot ete e rasanble zot; mon pou montre zot lafors ek pwisans mon lakoler.

³⁵ Mon pou anmenn zot dan dezer bann nasyon; la, mon pou ziz zot fas a fas.

³⁶ Mon pou ziz zot parey mon ti ziz zot bann zanset dan dezer Lezip. Senyer BONDYE ki deklare.

³⁷ Mon pou fer zot pas anba mon baton berze e gid zot par mon lalyans.

³⁸ Mon pou tir parmi zot, bann ki rebel e ki dezobei mwan; mon pou tir zot dan pei kot zot reste, me zot pa pou antre dan pei Izrael. Konmsa, zot ava konnen ki mwan menm SENYER.

³⁹ La sa ki Senyer BONDYE i deklare: Pep Izrael, sakenn parmi zot, zot kapab al ador zot zidol; apre, zot ava oblize obei mwan. Zot pou nepli profann mon non sen e ofer lofrann devan zot bann zidol.

⁴⁰ La sa ki Senyer BONDYE i deklare: Tou Izraelit, tou sa ki pou reste dan sa pei, pou ador mwan lo mon montanny sen, lo gran montanny Izrael. La mon pou akey zot. Mon pou resevwar bann don ki zot in konsakre, tou zot bann meyer lofrann ek don pour ofer mwan.

⁴¹ Mon pou akey zot avek plezir, parey en lofrann ki fer mwan plezir. Mon pou fer zot sorti parmi bann pep, dan tou pei kot zot in disperse e rasanble zot. Konmsa, mon pou montre bann nasyon ki mwan menm Bondye sen.

⁴² Mon pou anmenn zot dan pei Izrael, pei ki mon ti fer serman pour donn zot bann zanset. Alor, zot ava konnen ki mwan menm SENYER.

⁴³ La, zot ava rapel zot lavi pase, tou bann aksyon ki zot in fer pour rann zot enpir. Zot pou degout zot menm akoz tou zot bann move aksyon.

⁴⁴ Alor, zot ava konnen ki mwan menm SENYER, kan mon pran aksyon pour prezerv mon loner, akoz mon pa pou pran kont zot move lavi, ni zot move aksyon. Senyer BONDYE ki deklare.

Profesi kont Negev

⁴⁵ SENYER ti koz avek mwan:

⁴⁶ Ou ki en imen, tourn ver direksyon Sid, adres bann menas e pronons en kondannasyon pour mwan kont lafore dan Sid.

⁴⁷ Dir lafore Negev: Ekout parol SENYER, la sa ki Senyer BONDYE i deklare: Mon pou alim en dife ki pou bril tou pye dibwa dan ou lafore, bann ki ver oubyen bann sek. Personn pa pou kapab tenny li. Depi Nor ziska Sid, tou pou ganny brile par lasaler son laflanm.

⁴⁸ Tou dimoun pou war ki mwan SENYER ki alim li; i pa pou ganny tennyen.

⁴⁹ Apre mon ti dir: Senyer BONDYE! Zot dir ki mon zis en rakonter parabol.