Ezekyel 19 - Labib An Kreol Seselwa

En Kantik Dey

¹ SENYER ti dir mwan sant en kantik dey pour bann prens ki gouvern Izrael.

² Ou ava dir: Ou manman, pa ti en femel lyon? I ti dormi parmi bann lyon, pour sonny son bann piti.

³ I ti dres enn son piti, ki ti vin en zenn lyon. I ti aprann ki mannyer atrap en zannimo; e i ti devor dimoun.

⁴ Bann nasyon ti antann koz lo li e zot ti pri li dan zot latrap. Zot ti anmenn li Lezip avek en lanmson dan son nennen.

⁵ Kan sa femel lyon ti war ki i ti'n esper anven, i ti perdi lespwar. I ti dres en lot parmi son bann piti e fer li vin en zenn lyon.

⁶ I ti pronmnen parmi bann lyon; i ti vin en zenn lyon. I ti aprann ki mannyer atrap en zannimo e i ti osi devor dimoun.

⁷ I ti demoli zot fortifikasyon e detri zot lavil. Kan i ti kriye bann zabitan dan pei ti tranble.

⁸ Bann nasyon dan zanviron ti antoure pour atak li. Zot ti mont en latrap kont li; i ti ganny pri dan zot latrap.

⁹ Zot ti kros li e met li dan en lakaz. Zot ti anmenn li devan lerwa Babilonn e met li dan kaso, pour zot nepli antann son lavwa, lo bann montanny Izrael.

Konplent Pye Rezen

¹⁰ Ou manman ti parey en pye rezen ki'n ganny plante obor en larivyer. Akoz i ti ganny bokou delo, son bann brans ti tale e sarze avek fri.

¹¹ Son bann brans ti for e ti servi koman en baton lerwa. Sa pye rezen ti grandi e depas tou bann zarbis. Son grander ti remarkab avek son ta brans.

¹² Me i ti ganny derasinen avek lakoler e ganny zet ater. Divan sorti dan Les ti fer li sek e son bann fri ti degrennen. Son bann brans byen for ti ganny detri par dife.

¹³ Aprezan, i'n ganny transplante dan dezer, dan en later sek e san delo.

¹⁴ Dife sorti dan son tron in bril tou son bann brans ek bann fri. I nepli annan okenn brans solid, pour fer baton rwayal. Sa poenm i ganny sante koman en kantik dey.