Ezekyel 18 - Labib An Kreol Seselwa

Responsabilite Personnel

¹ SENYER ti koz avek mwan:

² Ki savedir sa proverb konsernan later Izrael ki dimoun i kontinyen repete: Bann paran in manz rezen ver; e ledan bann zanfan in grense?

³ Senyer BONDYE i deklare: Osi vre ki mon vivan, zot pou arete servi sa proverb lo later Izrael.

⁴ Annefe, lavi sak dimoun i pour mwan; lavi bann paran koman lavi bann zanfan. Sa enn ki'n fer pese, se li menm ki pou mor.

⁵ En dimoun zis ki azir dapre lazistis e ki fer sa ki byen,

⁶ ki pa manz sa ki'n ganny ofer devan bann zidol lo montanny, ni ador bann zidol Izrael, i pa sali repitasyon fanm son prosen, ni annan relasyon seksyel avek en fanm pandan son reg.

⁷ I pa abiz lo lezot, me i rann sa ki en dimoun in met angaz pour en det. I pa tronp lezot. I donn manze sa enn ki lafen e lenz sa enn ki touni.

⁸ I pa pret son larzan avek lentere; ni egziz en profi lo la. I evit bann move pratik e i donn en bon zizman dapre lazistis.

⁹ I obei mon lalwa e swiv mon bann regleman avek fidelite. Sa i en zonm zis e i pou viv. Senyer BONDYE ki'n deklare.

¹⁰ Me si sa zonm i ganny en garson ki en bandi, ki touy dimoun e komet nenport sa bann move aksyon.

¹¹ Si i fer tou lekontrer ki son papa, i manz sa ki'n ganny ofer devan zidol lo montanny; i sali loner fanm son prosen;

¹² i eksplwat bann pov ek bann malere; i vol dimoun; i pa rann sa ki en dimoun in met angaz pour son det; i ador bann zidol e fer toudsort pratik degoutan;

¹³ i pret son larzan avek lentere e fer profi; eski i pou viv? I pa pou viv. In komet tou sa bann pratik degoutan. Alor, i pou sertennman mor e i ava li menm responsab son lanmor.

¹⁴ Aprezan, si sa zonm i ganny en garson ki'n war tou pese ki son papa in komet, me i pa azir parey:

¹⁵ I pa manz sa ki'n ganny ofer devan zidol lo montanny; i pa ador bann zidol Izrael e i pa sali repitasyon fanm son prosen;

¹⁶ i pa abiz lo lezot, me i rann sa ki en dimoun in met angaz pour en det; i pa tronp lezot; i donn manze sa enn ki lafen e donn lenz sa enn ki touni.

¹⁷ I evit bann move pratik; i pa pret son larzan avek lentere, ni egziz en profi lo la. I obei mon lalwa e swiv mon bann regleman avek fidelite. I pa pou mor akoz fot son papa, me i pou sirman viv.

¹⁸ Tandis ki son papa, akoz in eksplwat lezot, vole e tronp son frer, pratik sa ki move parmi son pep, se li alor, ki pou mor pour son prop fot.

¹⁹ Selman, ou demande: Akoz en garson pa responsab pese son papa? En garson ki'n respekte lalwa e fer sa ki zis, ki obei tou mon komannman, i pou sirman viv.

²⁰ Sa enn ki'n fer pese, se li menm ki pou mor. En garson pa pou ganny pini akoz fot son papa, ni en papa akoz fot son garson. En dimoun ki azir byen pou ganny rekonpanse pour azir dapre lazistis; sa enn ki move pou ganny pini pour tou bann mal ki i'n fer.

²¹ Si en move dimoun i abandonn tou pese ki i'n komet; si i swiv mon bann regleman, respekte lalwa e fer sa ki byen, i pa pou mor; i pou sirman viv.

²² Tou son bann pese ki i'n komet pou ganny oubliye; akoz in azir byen, i pou viv.

²³ Senyer BONDYE i deklare: Eski zot krwar i fer mwan plezir war lanmor bann malfeter? Sa ki mon oule, se ki plito zot abandonn zot bann move pratik e ki zot viv.

²⁴ Me si en dimoun zis i abandonn sa ki byen pour al fer sa ki mal e imit bann malfeter dan zot pratik degoutan, eski i pou viv? Tou bann bon aksyon ki i'n fer pou ganny oubliye. I pou mor, akoz tou son bann pese ek enfidelite ki i'n komet.

²⁵ Pourtan zot dir: Sa ki SENYER i fer pa zis. Ekoute pep Izrael! Eski mwan ki pa zis oubyen plito zot ki mal azir?

²⁶ Kan en zonm zis i abandonn sa ki byen e pratik sa ki mal, i pou mor akoz sa ki i'n fer pa byen.

²⁷ Si o kontrer, en move dimoun i abandonn son bann move pratik pour azir dapre lalwa e fer sa ki byen, i ava sov son lavi.

²⁸ Akoz i'n rann kont e i'n deside abandonn son move lavi, sirman i ava viv, i pa pou mor.

²⁹ Me pep Izrael i dir: SENYER pa azir byen. Pep Izrael! Ou asire mwan ki pa azir byen? Oubyen ou plito ki pe mal fer?

³⁰ Alor, pep Izrael! Mon pou ziz sakenn dapre son prop aksyon, Senyer BONDYE i deklare. Sanz ou lavi e abandonn ou bann move mannyer fer. Pa les ou pese detri ou.

³¹ Abandonn sa bann move aksyon ki ou'n komet kont mwan. Rod en nouvo leker ek en nouvo lespri. Pep Izrael, akoz ou oule lanmor?

³² Vreman! Mon pa anvi war lanmor personn. Abandonn sa ki mal e ou ava viv. Senyer BONDYE ki deklare.