Ezekyel 17 - Labib An Kreol Seselwa

Parabol Leg ek Pye Rezen

¹ SENYER ti koz avek mwan:

² Ou ki en imen, propoz en parabol. Rakont pep Izrael.

³ Dir zot: La sa ki Senyer BONDYE i deklare: Ti annan en gro leg, avek gran lezel, plim epe toudsort kouler. I ti anvol dan montanny Liban e kas leker bann pye sed.

⁴ I ti kas sa pli pti leker lo bann brans ki i ti anmenn dan en pei komersan e depoz dan en lavil bann marsan.

⁵ Apre, i ti pran en pti legren dan pei Izrael ki i ti al plant dan later fertil. I ti plant li kot ti annan dekwa delo parey en plant ki kontan delo.

⁶ Sa pti legren ti pouse e vin en pye rezen avek zoli brans ki file. Son bann brans ti fil dan direksyon leg me son rasin ti reste lanmenm anba li. Sa pye rezen ti devlope e donn en kantite brans.

⁷ Ti annan en dezyenm gran leg avek gran lezel ek plim epe. Alor, sa pye rezen ti anvoy son bann rasin ek son bann brans dan son direksyon pour ki i aroz li.

⁸ Pourtan, i ti'n ganny transplante dan later fertil kot ti annan bokou delo, pour ki i raport bokou fri e vin en zoli pye rezen.

⁹ Alor, la sa ki Senyer BONDYE i deklare: Eski sa plant pou pouse? Sa premye leg pa pou aras son rasin, detri son bann fri e koup son bann nouvo brans pour les zot sek? Pa pou bezwen en gran lafors ni bokou zonm pour aras li.

¹⁰ Kan i ganny transplante, eski i pou pouse? Pa i pou sek ler divan sorti dan Les pou soufle lo li? Pa i pou zis fletri dan sa landrwa kot i ti devre pouse?

Leksplikasyon sa Parabol

¹¹ SENYER ti koz avek mwan:

¹² Demann sa bann rebel si zot konnen ki savedir sa parabol. Dir zot lerwa Babilonn ti al Zerizalenm kot i ti pran prizonnyen son lerwa ek bann sef pour anmenn zot avek li Babilonn.

¹³ I ti swazir en desandan rwayal pour fer en lalyans avek li e fer li pret serman pour reste lwayal anver li. I ti'n anmenn tou bann sef dan pei

¹⁴ pour fer sir ki pei i reste pti, i pa devlope e ki i respekte zot trete.

¹⁵ Me i ti revolte kont li kan i ti anvoy bann anbasader Lezip pour demann seval ek en gran larme. Eski i pou reisi sov son lapo apre ki i'n fer en tel demars? Eski i kapab kas trete san fer fas avek son konsekans?

¹⁶ Senyer BONDYE i deklare: Osi vre ki mon vivan, i pou mor dan pei sa lerwa ki'n plas li lo tronn, avek ki i'n fer en trete e ki i'n kase apre. I pou mor dan Babilonn.

¹⁷ Menm avek en gran larme for, Faraon, lerwa Lezip pa pou kapab ede pour defann li dan lager kont Babilonn, kan zot fouy transe e mont miray latak pour detri en kantite lavi.

¹⁸ I pa'n respekte son promes, akoz in kas lalyans apre ki i ti'n fer en serman; i pa pou kapab sove.

¹⁹ La sa ki Senyer BONDYE i deklare: Osi vre ki mon vivan, se mon serman ki lerwa Izrael in kase; se mon lalyans ki i pa'n respekte. Alor, mon pou fer li sibir bann konsekans.

²⁰ Mon pou fer li tonm dan en latrap, i pou pri; mon pou fer anmenn li Babilonn e mon pou ziz li pour son lenfidelite anver mwan.

²¹ Bann meyer gerye pou ganny touye dan lager. Bann sirvivan pou disperse dan tou kote. Alor, zot ava konnen ki mwan SENYER, mon'n koze.

Bondye I Donn Promes Lespwar

²² La sa ki Senyer BONDYE i deklare: Mwan menm mon pou pran en brans lo leker pye sed, e met li an plas. Mon pou kas en bourzon tann lo bout son bann brans. Mwan menm, mon pou plant li lo latet en montanny byen o.

²³ Mon pou plant li lo en montanny ki domin Izrael. I pou ganny bokou brans; i pou raport fri; i pou vin en zoli pye sed. Tou kalite zwazo pou apoz lo la. Zot pou fer zot nik dan lonbraz son bann brans.

²⁴ Tou pye dibwa dan lakanpanny pou konnen ki mwan menm SENYER. Mon pou abes bann gran pye dibwa. Mon pou elev bann pti pye dibwa. Mon pou fer sek bann pye dibwa ver e fer bann ki sek fleri. Mwan SENYER ki'n koze, mon pou fer li.