Ezekyel 16 - Labib An Kreol Seselwa

Zerizalenm, Zanfan Enfidel

¹ SENYER ti koz avek mwan:

² Ou ki en imen, fer Zerizalenm konn son bann pratik degoutan!

³ Ou ava dir: La sa ki Senyer BONDYE i deklare avek Zerizalenm: Ou sorti dan Kanaan kot ou ti ne; ou papa ti en Amorit e ou manman ti en Hitit.

⁴ Kan ou ti ne, personn pa ti koup ou lonbri, personn pa ti lav ou avek delo, ni frot ou avek disel, ni anvlop ou dan en drapo.

⁵ Personn pa ti pran pitye pour ou; personn pa ti fer nanryen pour montre konpasyon pour ou. Me ou ti ganny zete deor dan laplenn, akoz kan ou ti ne, zot ti annan degou pour ou.

⁶ Mon ti pas pre kot ou e mon ti war ou la, pe debat dan ou disan. Mon ti dir: Viv dan ou disan!

⁷ Mon ti fer ou pouse parey en plant dan laplenn. Ou ti pouse e devlope pour vin en bote parfe. Ou tete ti'n formen e ou pwal ti'n pouse, me ou ti napa lenz lo ou; ou ti touni.

⁸ Mon ti repas la kot ou ti ete e mon ti get ou; ou ti'n ganny laz pour fer lanmour. Alor, mon ti kouver ou avek en bout mon lenz, akoz ou ti touni. Mon ti promet ou fidelite e fer en lalyans avek ou; ou ti vin pour mwan. Senyer BONDYE ki'n deklare.

⁹ Apre, mon ti pran delo, benny ou e lav disan ki ti lo ou. Mon ti pas delwil lo ou.

¹⁰ Mon ti met ou lenz brode, sandal an kwir, anvlop ou dan latwal linenn fen e kouver ou avek laswa.

¹¹ Mon ti orn ou avek bizou: Brasle lo ou pwannyen ek en kolye otour ou likou.

¹² Mon ti plas en bag dan ou nennen, zanno dan ou zorey, ek en zoli kouronn lo ou latet.

¹³ Ou ti ganny ornen avek lor ek larzan; ou ti abiye dan lenz linenn fen, laswa ek latwal brode. Ou ti manz lafarin meyer kalite, dimyel ek delwil. Deplizanpli, ou ti vin pli zoli, parey en larenn.

¹⁴ Ou ti renonmen parmi bann nasyon pour ou labote ki parfe, akoz mon ti'n orn ou avek mon laglwar. Senyer BONDYE ki deklare.

¹⁵ Me ou ti met ou konfyans dan ou labote; ou ti tonm dan prostitisyon akoz ou renonmen e ou ti zet ou dan lebra tou zonm ki ti pas par la.

¹⁶ Ou ti servi en pe ou bann zoli lenz kouler pour dekor bann landrwa sakre, kot ou ti abandonn ou dan prostitisyon. Sa pa ti'n deza arive e i pa pou zanmen ariv ankor.

¹⁷ Ou ti osi servi bizou annor e annarzan ki mon ti'n donn ou e ou ti fabrik bann stati zonm e livre ou avek zot dan prostitisyon.

¹⁸ Ou ti kouver zot avek lenz brode e ou ti plas mon delwil ek mon lansan devan zot.

¹⁹ Pour fer zot plezir, ou ti menm ofer devan zot, lafarin meyer kalite, dimyel ek delwil, sa bann manze ki mon ti'n donn ou. La sa ki ti arive. Senyer BONDYE ki deklare.

²⁰ Ou ti pran ou bann garson ek ou bann fiy ki ou ti'n fer avek mwan e ou ti ofer zot koman sakrifis pour zot ganny devore. Eski ou lavi prostitisyon pa ti ase?

²¹ Ou ti bezwen touy mon bann zanfan e bril zot koman sakrifis devan ou bann zidol?

²² Dan tou sa bann aksyon degoutan ek ou prostitisyon, ou pa ti mazin lepok ou lazenes, kan ou ti touni, san nanryen lo ou, kan ou ti pe debat dan ou disan.

Zerizalenm, En Prostitye

²³ Apre tou sa mesanste ki ou'n fer, maler, maler lo ou! Senyer BONDYE i deklare.

²⁴ Dan tou kwen pei, ou'n konstri en pti lakaz pour ou; partou, ou'n konstri landrwa pour ador zidol.

²⁵ Dan tou kwen semen, ou ti annan bann lakaz kot ou ti servi ou labote e livre ou lekor avek tou sa ki pase. Tou le zour, ou lavi prostitisyon ti ogmante.

²⁶ Ou ti larg ou avek ou bann vwazen Ezipsyen ki ti annan gro lekor, ou ti kontinyen ogmant ou bann aksyon degoutan pour provok mon lakoler.

²⁷ Alor, mon ti montre ou mon pwisans, mon ti koup ou provizyon, mon ti livre ou devan lapeti ou bann lennmi; menm bann fiy Filisten ti onte pour zot bann aksyon degoutan.

²⁸ Ou ti osi abandonn ou avek bann Asiriyen akoz ou pa ti'n ankor satisfer ou pasyon. Ou ti livre ou lekor avek zot, me la ankor ou pa ti satisfe.

²⁹ Ou ti osi livre ou avek bann Babilonyen, bann marsan, e la ankor, ou pa ti ganny satisfaksyon.

³⁰ Senyer BONDYE i deklare: Fodre ki ou lespri i vreman malad pour ou fer tousala! Ou ti fer tousala koman en prostitye profesyonnel.

³¹ Ou'n konstri ou lakaz prostitisyon lo sak kwen semen e plas ou landrwa ladorasyon dan sak plas piblik. Me ou ti diferan avek lezot prostitye, ou ti refiz larzan.

³² Fanm adilter! Ou pran bann zonm etranze dan plas ou mari!

³³ Bann prostitye i resevwar kado, tandis ki ou, se ou ki ofer kado ou bann galan. Ou peye pour zot vini, sorti dan tou kote, pour dormi avek ou.

³⁴ Dan ou lavi prostitisyon, ou'n fer tou lekontrer ki lezot fanm: Pa zonm ki'n rod ou; ou'n fer lekontrer, ou ki'n donn larzan olye resevwar en lapey.

³⁵ Alor prostitye! Ekout parol SENYER:

³⁶ La sa ki Senyer BONDYE i deklare: Akoz ou'n tir ou touni avek ou bann galan dan prostitisyon, akoz tou ou bann pratik degoutan, akoz disan ou bann zanfan ki ou'n ofer zot,

³⁷ mon pou rasanble tou ou bann galan avek ki ou'n ganny plezir, bann ki ou'n kontan ek bann ki ou pa'n kontan. Mon pou rasanble zot kont ou, sorti tou kote. Mon pou tir ou, touni devan zot e zot ava war ou touni.

³⁸ Mon pou kondann ou parey en fanm adilter e bann ki fer koule disan. Dan lakoler ek pasyon zalou, mon pou met ou ansan.

³⁹ Mon pou livre ou dan lanmen ou bann galan e zot ava kraz ou bann lakaz prostitisyon ek ou bann landrwa sakre. Zot pou met ou touni, pran tou ou bann bizou e kit ou konpletman touni.

⁴⁰ Apre, zot pou eksit en lafoul kont ou. Zot ava saboul ou avek ros e koup ou an morso avek zot lepe.

⁴¹ Zot pou met dife dan ou bann lakaz. Zot pou egzekit kondannasyon dapre zizman kont ou dan prezans en lafoul fanm. Mon pou met en lafen avek ou lavi prostitisyon, e dezormen, ou ava osi aret donn larzan ou bann galan.

⁴² Kan mon ava'n satisfer mon lakoler kont ou, mon zalouzi ava arete e mon ava repran mon kalm; mon lakoler ava tonbe.

⁴³ Ou'n fer monte mon lakoler avek tousala, akoz ou nepli rapel letan ou lazenes. Alor, mon tour, mon pou fer ou bann aksyon retonm lo ou. Senyer BONDYE ki'n deklare. Annefe, an plis ki sa bann pratik onte, pa ou'n komet bann aksyon ankor pli degoutan?

Tel Mer, Tel Fiy

⁴⁴ Tou bann ki kontan fer proverb, pou servi sa enn avek ou: Tel mer, tel fiy.

⁴⁵ Ou vreman fiy ou manman ki ti ay son mari ek son prop zanfan. Ou vreman parey ou bann ser ki ti annan laenn pour zot mari ek zot zanfan. Ou manman ti en Hitit e ou papa en Amorit.

⁴⁶ Ou gran ser, Samari ek son bann fiy, i lo ou kote Nor, e ou pti ser, Sodonm, i lo ou kote Sid ek son bann fiy.

⁴⁷ Ou pa'n zis kontante swiv zot bann pratik degoutan, me ou'n fer pir ki zot dan en pti moman.

⁴⁸ Senyer BONDYE i deklare: Osi vre ki mon vivan, ou ser Sodonm ek son bann zanfan pa'n fer otan ki ou ek ou bann fiy.

⁴⁹ La fot ou ser, Sodonm ek son bann fiy: Zot ti annan lafyerte, zot ti kontan manz bokou, zot pa ti pran okenn traka, zot pa ti fer nanryen pour ed bann pov, ni bann malere.

⁵⁰ Zot ti orgeye e zot ti fer keksoz degoutan devan mwan; kan mon ti war sa, mon ti detri zot.

⁵¹ Samari pa'n komet lanmwatye bann pese ki ou'n komet; ou bann pratik degoutan in depas tou sa ki zot in fer e ou bann ser i paret inosan akote bann keksoz degoutan ki ou'n fer.

⁵² Ou ki'n esey blansi ou bann ser, ou devret onte akoz ou'n komet keksoz bokou pli degoutan ki zot. Aprezan, i ou tour pour perdi ou loner, akoz zot paret pli zis ki ou.

Sodonm ek Samari Pou Ganny Retabli

⁵³ Mon pou sanz desten Sodonm ek son bann fiy, Samari ek son bann fiy; mon pou retabli ou sityasyon parmi zot.

⁵⁴ Konmsa, ou ava siport ou imilyasyon ek laont pour tou sa ki ou'n fer. Sa i pou en konsolasyon pour zot.

⁵⁵ Ou bann ser Sodonm ek son bann fiy pou retourn dan zot sityasyon avan. Samari ek son bann ser pou retourn dan zot sityasyon avan. Pour ou osi, i pou parey: Ou pou reganny ou sityasyon avan.

⁵⁶ Dan sa letan ki ou ti pe viv dan lafyerte, pa ou ti malparl ou ser, Sodonm?

⁵⁷ Sa ti avan ki ou bann move mers ti ganny dekouver. Aprezan ki ou'n vin parey zot, i ou tour ganny maltrete par bann fiy Edonm ek tou son bann vwazen, bann fiy Filisten, dan tou bann zalantour kot zot deteste ou.

⁵⁸ Ou pe siport konsekans ou bann pratik degoutan. SENYER ki deklare.

En Lalyans Eternel

⁵⁹ La sa ki Senyer BONDYE i deklare: Mon pou tret ou dapre sa ki ou merite. Ou pa'n respekte ou serman e ou'n kas lalyans.

⁶⁰ Me mwan, mon pou rapel mon lalyans ki mon ti fer avek ou, kan ou ti ankor zenn. Mon pou etabli mon lalyans avek ou pour touzour.

⁶¹ Ou ava rapel tou sa ki ou'n fer e ou ava onte kan ou ava resevwar ou gran ser ek ou pti ser; mon pou fer zot vin ou bann fiy. Me sa napa okenn rapor ant mon lalyans ek ou.

⁶² Mon pou renouvle mon lalyans avek ou. Konmsa ou ava konnen ki mwan menm SENYER.

⁶³ Alor, ou ava rapel lepase e ou ava kanmi avek laont san oze ouver labous. Me mwan, mon pou pardonn ou pour tou sa ki ou'n fer. Senyer BONDYE ki'n deklare.