Ezekyel 15 - Labib An Kreol Seselwa

Parabol Pye Rezen

¹ SENYER ti koz avek mwan:

² Ou ki en imen, reponn! Ki mannyer dibwa pye rezen i diferan avek lezot dibwa? Eski son brans i annan plis valer ki brans lezot pye dibwa dan lafore?

³ Eski son dibwa i ganny servi pour okenn louvraz? Eski i kapab ganny servi pour fer en krok pour met anpandan okenn lobze?

⁴ Non! I ganny zet dan dife pour brile. Kan son de bout in brile, son milye osi i brile. Eski ou kapab fer ankor keksoz avek?

⁵ Menm kan i ti antye, ou pa ti kapab fer nanryen avek; ki ou kapab fer avek, aprezan ki i'n brile e i'n vin sarbon? Nanryen!

⁶ Alor, la sa ki Senyer BONDYE i deklare: Parmi tou pye dibwa lafore, dibwa pye rezen ki mon prefere zet dan dife e les li brile. Mon pou bril zabitan Zerizalenm parey.

⁷ Mon pou azir kont zot; zot krwar zot in sove dan dife, me dife pou detri zot. Kan mon pou azir kont zot, zot ava konnen ki mwan menm SENYER.

⁸ Mon pou devaste sa pei, akoz zot pa'n fidel anver mwan, Senyer BONDYE ki'n deklare.