Ezekyel 14 - Labib An Kreol Seselwa

Bondye I Kondann Ladorasyon Zidol

¹ Serten zonm parmi bann ansyen Izrael ti vin war mwan e zot ti asiz devan mwan.

² Alor, SENYER ti koz avek mwan:

³ Ou ki en imen, ekoute! Sa bann zonm ki gard zot zidol dan zot leker. Zot zis plas en lobstak devan zot; zot fot pou fer zot tonbe. Eski mon pou les zot konsilte mwan?

⁴ Alor koz avek zot e dir zot: La sa ki Senyer BONDYE i deklare: Dimoun parmi pep Izrael ki gard son bann zidol dan son leker, ki plas devan li en lobstak ki pou fer li tonbe par son fot, si i vin war profet, mwan SENYER ki pou reponn li kan i vini, akoz son kantite zidol.

⁵ Konmsa, mon pou tous leker pep Izrael ki'n abandonn mwan akoz zot zidol.

⁶ Pour sa rezon, dir pep Izrael: La sa ki Senyer BONDYE i deklare: Retournen! Kit zot bann zidol. Abandonn tou zot bann pratik degoutan.

⁷ Akoz sa, kan en dimoun parmi pep Izrael, oubyen en etranze ki reste dan pei Izrael, ki'n abandonn mwan, e ki gard son zidol dan son leker e plas en lobstak par son fot, ki vin konsilte mwan atraver en profet, mwan SENYER ki pou reponn li.

⁸ Mon pou debout kont li; sa ki mon pou fer avek li pou reste en siny e en proverb. Mon pou elimin li parmi mon pep. Alor, zot ava konnen ki mwan menm SENYER.

⁹ Si en profet i les li ganny tronpe e reponn par son prop lotorite, mwan SENYER ki pou tronp li. Mon pou montre li mon pwisans e mon pou fer li disparet parmi mon pep, Izrael.

¹⁰ Zot pou sibir konsekans zot fot: Sa profet ek sa enn ki'n vin konsilte li in komet menm fot.

¹¹ Konmsa, pep Izrael pou nepli egare lwen avek mwan e zot pa pou vin pli enpir par zot fot. Alor, zot ava vin mon pep e mwan, mon ava vin zot Bondye. Senyer BONDYE ki deklare.

Noe, Danyel, Zob

¹² SENYER ti koz avek mwan:

¹³ Ou, ki en imen, ekoute! Kan zabitan en pei i fer pese kont mwan e zot enfidel anver mwan, mon pou azir kont zot. Mon pou detri zot sours manze e anvoy lafanmin kont zot. Mon pou fer disparet bann imen osi byen ki bann zannimo.

¹⁴ Menm si sa trwa zonm i parmi zot: Noe, Danyel ek Zob, zis zot ki ava sov zot lavi, par zot fidelite, Senyer BONDYE ki deklare.

¹⁵ Si mon anvoy bann bebet feros atraver pei e ki zot devor bann zabitan, devaste pei e ki personn pa kapab pase akoz sa bann zannimo sovaz,

¹⁶ menm si sa trwa zonm i parmi zot, osi vre ki mon vivan, Senyer BONDYE i deklare, personn pa pou sove, ni zot garson, ni zot fiy. Zis sa trwa zonm ki pou ganny sove e pei pou ganny devaste.

¹⁷ Oubyen, si mon anvoy lennmi kont sa pei e komann en larme detri pei e touy zonm ek zannimo,

¹⁸ menm si sa trwa zonm ti parmi zot, osi vre ki mon vivan, Senyer BONDYE i deklare, personn pa pou sove, ni zot garson, ni zot fiy. Zis sa trwa zonm ki pou ganny sove.

¹⁹ Oubyen si mon anvoy en lepidemi dan sa pei e mon montre mon lakoler kont li avek disan, pour fer tou disparet, imen koman zannimo,

²⁰ menm si Noe, Danyel ek Zob i parmi zot, osi vre ki mon vivan, Senyer BONDYE i deklare, personn pa pou sove, ni zot garson, ni zot fiy. Zis sa trwa zonm ki pou ganny sove, akoz zot fidelite.

²¹ Alor, la sa ki Senyer BONDYE i deklare: Kan mon pou anvoy kont Zerizalenm mon kat zizman terib: Lepe, lafanmin, bebet feros ek lepidemi pour fer disparet zonm koman zannimo,

²² serten sirvivan pou reste; zot pou sov zot garson ek zot fiy. Zot pou vin kot ou; ou ava war zot konportman e ou ava ganny konsolasyon dan bann gran maler ki'n tonm lo Zerizalenm. Mwan ki'n fer tousala tonm lo li.

²³ Ou ava ganny konsole, kan ou ava war zot konportman. Alor, ou ava konpran ki mon ti annan rezon azir dan sa fason kont li. Senyer BONDYE ki deklare.