Ezekyel 13 - Labib An Kreol Seselwa

Kondannasyon bann Fo Profet

¹ SENYER ti koz avek mwan:

² Ou ki en imen, profetiz kont bann profet Izrael, profetiz kont tou bann profet ki koz lo zot prop non: Ekout parol SENYER!

³ La sa ki Senyer BONDYE i deklare: Maler lo zot, bann profet fou ki swiv zot prop lenspirasyon, san ganny okenn vizyon.

⁴ Izrael! Ou bann profet i parey bann renar ki rodaye dan bann debri lavil.

⁵ Ou pa'n esey bous bann trou dan miray ki'n degrengole pour protez Izrael par en baraz kont lager zour SENYER.

⁶ Zot vizyon in ganny envante, zot prediksyon i en bann mansonz. Zot dir: SENYER in deklare, kan SENYER pa'n anvoy zot e zot ekspekte zot parol realize.

⁷ Vizyon ki zot gannyen i zis bann ilizyon; zot bann prediksyon i mansonz. Zot dir tousala i deklarasyon SENYER, kan mon pa'n dir nanryen.

⁸ Alor, la sa ki Senyer BONDYE i deklare: Akoz zot parol ki zot dir i zis ilizyon, e zot vizyon zis mansonz, mon pou azir kont zot. Senyer BONDYE ki'n deklare.

⁹ Mon pou montre mon pwisans kont sa bann profet ki envant vizyon e fer prediksyon bann mansonz. Pa pou annan plas pour zot dan lasanble mon pep; zot pa pou form parti pep Izrael; zot pa pou ni antre lo later Izrael. Konmsa, zot ava konnen ki mwan menm Senyer BONDYE.

¹⁰ Annefe, zot in tronp mon pep kan zot in dir: Tou i byen! Alor ki tou ti mal. Kan mon pep i konstri en miray, sa bann profet i kontante zis blansi li avek laso.

¹¹ Dir sa bann profet ki zis blansi miray: Miray pou tonbe! En gro lapli pe vini; lagrel pou tonbe e en tanpet pou kraz tou!

¹² Ler miray in tonbe, dimoun pou demande: Oli sa laso ki zot ti blansi li avek?

¹³ Alor, la sa ki Senyer BONDYE i deklare: Dan mon lakoler, mon pou fer en gro tanpet divan soufle, en gro lapli pou vini; lagrel pou tonbe avek en lafors terib e detri sa miray.

¹⁴ Mon pou fer degrengole sa miray ki ou'n blansi avek laso; mon pou aplati li e met son fondasyon deor dan kler. Mon pou fer zot disparet parmi son bann debri. Konmsa, zot ava konnen ki mwan menm SENYER.

¹⁵ Konmsa, ki mon pou montre lafors mon lakoler kont sa miray e kont sa bann ki'n blansi li. Mon pou dir: Zot miray i nepli; i'n disparet ansanm avek bann ki ti blansi li;

¹⁶ sa bann profet ki ti koz lo Zerizalenm e ki par zot vizyon, ti anonse ki tou i byen, kan nanryen pa ti pe marse. Senyer BONDYE ki'n deklare.

Profesi kont bann Fanm Profet

¹⁷ Kanta ou ki en imen, tourn ou ver bann fanm parmi ou pep ki koz lo zot prop non. Denons zot.

¹⁸ Ou ava dir: La sa ki Senyer BONDYE i deklare: Maler lo zot, bann fanm ki koud bann riban pour met lo tou pwannyen ek vwal pour met lo latet dimoun tou grander pour kontrol zot lavi. Zot oule kontrol lavi mon pep e prezerv zot prop lavi.

¹⁹ Zot in dezonor mwan devan mon pep pour detrwa ponnyen lorz ek detrwa morso dipen. Par zot mansonz avek mon pep ki ekout zot, zot in touy dimoun ki pa merit lanmor e les viv sa bann ki pa devre viv.

²⁰ Pour sa rezon, la sa ki Senyer BONDYE i deklare: Mon pou desir zot bann riban ki zot servi pour kontrol lavi dimoun konmsi zot bann zwazo. Mon pou aras li lo zot lebra e liber bann lavi ki zot kontrole konmsi zwazo.

²¹ Mon pou desir sa bann foular mazik e liber mon pep anba zot pouvwar e zot ava arete servi li koman en latrap. Alor, zot ava konnen ki mwan menm SENYER.

²² Par zot mansonz, zot dekouraz bon dimoun, kan mwan mon pa'n fer li, e zot in ankouraz bann malfeter dan zot mesanste e anpes zot kit zot move konportman. Alor, permet zot viv.

²³ Aprezan, zot pou nepli ganny sa bann fo vizyon, ni bann prediksyon. Mon pou delivre mon pep ki anba zot pouvwar. Alor, zot ava konnen ki mwan menm SENYER.