Ezekyel 10 - Labib An Kreol Seselwa

Laglwar Bondye I Kit Tanp

¹ Mon ti remarke, lo sa twa ki ti par lao latet bann seriben, ti aparet en keksoz parey en pyer presyez, parey en safir dan laform en tronn.

² Bondye ti dir sa zonm dan lenz linenn, “Antre dan sa tourbiyon larou ki anba bann seriben. Ranpli ou lanmen avek labrez sarbon ki ant bann seriben e fann zot lo lavil.” Mon ti war li ale.

³ Kan sa zonm ti ale, bann seriben ti debout lo kote drwat tanp e en nyaz lafimen ti ranpli lakour ki enteryer.

⁴ Laglwar SENYER ti sorti kot seriben e monte dan direksyon lantre tanp. En nyaz ti ranpli tanp, me lakour ti ganny iliminen par laglwar SENYER.

⁵ Tapaz lezel bann seriben ti ariv ziska dan lakour eksteryer; i ti resanble lavwa Bondye Toupwisan ler i koze.

⁶ Kan i ti donn lord sa zonm dan lenz linenn, “Pran dife dan tourbiyon larou ki anba seriben.” Sa zonm ti antre e debout akote en larou.

⁷ Alor, en seriben ti anvoy son lanmen ant bann seriben ver dife ki ti ant zot. I ti pran en pe sa dife e met dan lanmen sa zonm dan lenz linenn. Sa zonm ti pran sa dife e sorti deor.

⁸ Anba zot lezel, bann seriben ti annan lanmen dan laform en lanmen imen.

⁹ Mon ti gete: Ti annan kat larou pre avek bann seriben, en larou kot sak seriben. Sa bann larou ti briye parey en pyer presyez.

¹⁰ Kanta zot laparans, tou le kat larou ti parey e ou ti ava krwar ki zot ti enn dan lot.

¹¹ Ler zot ti deplase, zot ti kapab bouz dan tou le kat direksyon san bezwen vire. Zot ti bouz dan nenport direksyon ki latet enn ti vire e lezot ti swiv san bezwen vire.

¹² Lekor antye sa bann seriben: Ledo, lanmen ek lezel, ti ranpli avek lizye toultour, menm bann larou ki tou le kat ti annan.

¹³ Mon ti antann kan sa bann larou ti ganny apele: Larou Tourbiyon.

¹⁴ Sak seriben ti annan kat figir: Premye ti annan en figir seriben, dezyenm en imen, trwazyenm en lyon, katriyenm en leg.

¹⁵ Bann seriben ti monte. Zot ti sa bann menm kreatir ki mon ti war obor larivyer Kebar.

¹⁶ Kan bann seriben ti deplase, bann larou osi ti al ansanm e kan bann seriben ti bat lezel pour mont dan lezer, bann larou pa ti kit zot.

¹⁷ Si zot ti arete, bann larou osi ti arete. Si zot ti mont dan lezer, bann larou osi ti monte, akoz lespri sa bann kreatir ti osi dan zot.

¹⁸ Apre, laglwar SENYER ti sorti devan lantre tanp e ti al lo bann seriben.

¹⁹ Bann seriben ti bat zot lezel e mon ti war zot mont dan lezer. Bann larou ti mont avek zot. Zot ti apoz kot lantre lo kote Les tanp, e laglwar Bondye Izrael ti briye par lao zot.

²⁰ Mon ti rekonnet ki zot ti sa bann menm kreatir, bann seriben ki mon ti'n war anba Bondye Izrael, lo bor larivyer Kebar.

²¹ Sakenn zot ti annan kat figir, kat lezel, e anba bann lezel, keksoz ki ti parey lanmen en imen.

²² Zot figir ti resanble menm figir ki mon ti'n war lo bor larivyer Kebar. Sak seriben ti al drwat devan.