Ezai 8 - Labib An Kreol Seselwa

Garson Ezai I En Siny pour Lepep

¹ SENYER ti dir mwan: Pran en gran tablo; ekri lo la avek bann gran let: Depese al fer piyaz.

² Mon ti montre sa tablo avek de temwen en ki mon ti annan konfyans: Pret Ouri ek Zakari, garson Yeberekya.

³ Apre, mon ti al dormi avek mon fanm; i ti tonm ansent e ganny en garson. SENYER ti dir mwan: Apel li: Depese al fer piyaz,

⁴ akoz avan ki sa zanfan pou konn dir papa oubyen manman, tou larises Damas e tou byen ki Samari ti vole pou'n ganny pran par lerwa Asiri.

Lanperer Asiri Pe Vini

⁵ SENYER ti dir mwan ankor:

⁶ Akoz pep Zida in refiz delo Siloe ki koul dousman e ki zot fonn avek lafreyer devan Resin e devan garson Remalia,

⁷ SENYER pou fer monte kont li sa gro kouran delo ki sorti dan larivyer Efrat. Se lerwa Asiri ek son laglwar ki pou monte e deborde partou.

⁸ I pou balye rwayonm Zida; i pou deborde parey en linondasyon; i pou kouver pei e monte ziska kot son likou. I pou kouver pei antye avek son lezel gran ouver. Bondye i avek nou!

⁹ Pep, tranble e mor avek lafreyer! Tou pei dan lemonn antye, ekoute! Met zot pare pour lager! Met zot pare pour lager!

¹⁰ Pran konsey avek kanmarad; fer plan ansanm; i pa pou marse. Diskit lo zot plan; i pa pou reisi akoz Bondye, i avek nou.

Senyer I Averti Son Profet

¹¹ Lanmen SENYER ti sezi mwan e averti mwan pa swiv semen ki sa pep in pran.

¹² Pa pran par dan son konplo sak fwa ki sa pep i koz lo konplo. Pa per sa ki sa pep i per. Pa les li fer ou per.

¹³ SENYER liniver ki ou pou rekonnet koman sen; sa enn pour ki ou devre annan respe; sa enn ki ou devre per.

¹⁴ I pou vin en sanktyer pour sa de rwayonm Izrael; en ros kot ou konny ou lipye; en gro ros ki pou fer ou tonbe; en latrap pour bann zabitan Zerizalenm.

¹⁵ Akoz li, bokou pou tonbe. Zot pou tonbe e ganny blese. Zot pou tonm dan latrap e pri ladan.

Lavertisman kont Konsiltasyon Dimoun Mor

¹⁶ Gard sa temwannyaz. Sel son parol parmi mon bann disip.

¹⁷ Mon pou esper SENYER, i'n detourn li avek desandan Zakob. Mon pou met mon lespwar dan li.

¹⁸ Mwan, avek bann zanfan ki SENYER in donn mwan, nou koman siny lavertisman pour Izrael, sorti kot SENYER liniver, ki reste lo Montanny Siyon.

¹⁹ Si i annan dimoun ki dir ou: Al konsilte bann dimoun mor ek bann lespri ki predir lavenir e rabase, eski i normal pour en pep konsilte son bann bondye ek dimoun mor an faver bann vivan?

²⁰ Konsilte lalwa ek bann temwannyaz! Si zot pa pe eksprim dapre sa parol, Napa lespwar lalimyer en nouvo zour pour lepep.

En Letan Troub

²¹ Zot pou travers pei byen akable e byen lafen. Dan zot lafen, zot pou pran lakoler e zot pou modi zot lerwa ek zot Bondye. Zot pou lev zot latet ver lesyel.

²² Apre, zot ava tourn zot latet ver later; me zot pou war zis detres, fernwanr ek langwas terib; zot pou ganny zete dan fernwanr epe.