Ezai 66 - Labib An Kreol Seselwa

Senyer I Ziz bann Nasyon

¹ La sa ki SENYER i deklare: Lesyel i mon tronn e later i la kot mon poz mon lipye. Ki kalite lakaz zot pou konstri pour mwan? Kote zot pou fer mwan repoze?

² Tou sa ki egziste, se mon lanmen ki'n fer; alor, tousala i pour mwan. Me mon pran pitye pour sa ki malere, sa ki dan dekourazman, sa ki annan gran respe pour mon parol. SENYER ki deklare.

³ Dimoun i ofer en toro pour sakrifis, me zot osi touy en imen. Dimoun i egorz en mouton, me zot osi kas likou en lisyen. Dimoun i ofer en sakrifis sereal, me zot osi ofer disan koson. Dimoun i fer lofrann memoryal lansan, me zot osi beni en zidol. Zot in swazir zot prop semen. Zot pran plezir dan zot bann pratik degoutan.

⁴ Mwan osi, mon pou ganny kontantman dan zot maler e fer tonm lo zot sa ki ti fer zot per; akoz, mon ti apele, me personn pa ti reponn; ler mon ti koze, zot pa ti ekoute; me zot ti fer tou sa ki ti depler mwan; zot ti swazir sa ki pa fer mwan plezir.

⁵ Ou ki annan respe pour parol SENYER, ekout sa ki i dir: Ou prop frer ki ay ou, ki'n rezet ou akoz mwan, in dir: SENYER i montre ou son laglwar, pour ki nou war zot lazwa. Me se zot ki ganny kouver avek laont.

⁶ Ekout sa tapaz ki sorti dan lavil! En lavwa ki sorti dan tanp! Se lavwa SENYER: I pe rann son bann lennmi sa ki zot merite!

⁷ Avan menm ki i ti ganny douler lakousman i ti'n fini akouse; avan menm ki i ti santi douler en garson ti'n fini ne.

⁸ Lekel ki'n deza antann en keksoz parey? Lekel ki'n deza war keksoz parey? En pei i kapab ne dan en zour? En nasyon i kapab ganny kree en sel kou? Pourtan, de ki Siyon ti dan douler lakousman, i ti donn nesans son bann zanfan.

⁹ SENYER i deklare: Eski mon pou ouver mon matris san fer lakousman? Mwan ki pe akouse, eski mon pou kapab ferm mon vant? Ou Bondye i dir.

¹⁰ Zot tou ki kontan Zerizalenm! Selebre ansanm avek li! Rezoui! Rezoui avek li akoz i dan lazwa, zot tou ki port dey pour li.

¹¹ Akoz ou pou tete dile ziska ou rasazye, sa dile ki konsole; pour ki ou ava kapab bwar avek plezir dile ki sorti dan son zoli tete.

¹² Annefe, la sa ki SENYER i deklare: Mon pou fer son prosperite koule parey en gran larivyer e larises bann nasyon parey en larivyer ki deborde. Ou pou ganny gate e ganny pran dan lebra. Ou pou ganny dorlote lo son zenou.

¹³ Parey en manman i konsol son zanfan, mwan osi mon pou konsol ou; ou pou ganny konsole dan Zerizalenm.

¹⁴ Zot ava war sa, e zot ava rezoui; zot lezo pou reganny lavi parey gazon; SENYER pou manifeste son pwisans devan son bann serviter; me son lakoler i kont son bann lennmi.

¹⁵ Annefe, dan dife ki SENYER pe vini; son bann kales i parey en siklonn; pour satisfer son gran lakoler, i pini zot dan laflanm dife.

¹⁶ Annefe, SENYER pou egzekit son zizman dan dife e son pinisyon pour lo tou dimoun; SENYER pou masakre en kantite zot!

¹⁷ SENYER i deklare: Tou sa bann ki konsakre zot e pirifye zot pour al dan bann zarden kot zot mars enn deryer lot, ki manz lavyann pork, bann zannimo degoutan. Zot tou, zot pou mor ansanm.

¹⁸ Mon konn sa ki zot fer e sa ki zot mazinen. Mon pe vin rasanble tou bann nasyon e tou bann pep. Zot pou vini e zot pou war mon laglwar.

¹⁹ Mon pou met en siny parmi zot. Mon pou anvoy en pe bann sirvivan kot bann nasyon: Tarsis, Pout ek Loud, bann ki konn byen tir fles, Toubal ek Lagres; dan bann zil elwannyen ki pa'n antann mon non rezonnen ni war mon laglwar; zot pou anons mon laglwar parmi bann nasyon.

²⁰ La sa ki SENYER i deklare: Zot pou retournen e anmenn avek zot, tou zot frer ki sorti parmi sa bann nasyon, koman en lofrann pour SENYER, lo seval, dan bann kales e lo treno, lo bourik e lo samo. Zot pou vin Zerizalenm, lo mon montanny sakre, parey bann Izraelit i anmenn lofrann vezetal dan en bol pirifye kot tanp SENYER.

²¹ Mon pou osi swazir parmi zot bann pret ek bann levit. SENYER i deklare.

²² Annefe, parey bann nouvo lesyel e nouvo later ki mon pou kree pou dire devan mwan, demenm, ou bann desandan e ou non pou reste devan mwan. SENYER i deklare:

²³ Tou dimoun pou vin ador mwan sak nouvellin, sak saba. SENYER ki deklare.

²⁴ Ler zot pou sorti, zot pou war kadav bann zonm ki'n revolte kont mwan. Zot bann lever pa pou mor, zot dife pa pou tennyen; zot pou en keksoz degoutan pour tou dimoun.