Ezai 62 - Labib An Kreol Seselwa

Zerizalenm I Ganny En Nouvo Non

¹ Pour lanmour Siyon, mon pa pou gard silans. Pour lanmour Zerizalenm, mon pa pou reste trankil ziska ki lazistis i fer briye en nouvo zour e son delivrans parey en flanbo alimen.

² Bann nasyon pou war ou vanzans, tou bann lerwa pou war ou grander; ou pou ganny en nouvo non sorti dan labous SENYER.

³ Ou pou parey en zoli kouronn dan lanmen SENYER, en dyadenm rwayal dan lanmen ou Bondye.

⁴ Ou pou nepli ganny apele Abandonnen; ou later pou nepli ganny apele Dezolasyon. Me ou pou ganny apele Mon Plezir; ou later pou apel Madanm Marye, akoz ou fer plezir SENYER e later ava vin en mari pour li.

⁵ Parey en zennonm i marye avek en zenn fiy, sa enn ki'n kree ou pou marye avek ou. Parey en nouvel marye i fer lazwa son mari, ou pou fer lazwa ou Bondye.

⁶ Zerizalenm! Mon'n plas bann santinel lo miray; lizour koman lannwit zot pou veye san poze. Fer SENYER rapel son bann promes; napa repo pour zot.

⁷ Pa les li repoze ziska ki i akonpli son promes e fer li ganny renonmen partou lo later.

⁸ SENYER in fer serman par son lanmen drwat; par son lebra pwisan i donn garanti: Mon pa pou donn ankor lennmi ou dible pour zot manze; bann etranze pou nepli bwar ou diven ki ou'n fatige pour fer.

⁹ Me bann ki'n rekolte dible ava manze e loue SENYER; bann ki'n rekolte rezen ava bwar diven dan lakour mon sanktyer.

¹⁰ Zabitan Zerizalenm! Travers bann laport lavil! Degaz semen pour lepep. Nivle larout! Repar semen; tir tou ros; lev bannyer pour bann pep!

¹¹ SENYER in proklanmen partou lo later: Al dir avek bann zabitan Siyon: Ou delivrans pe vini, ou lapey i avek li; ou rekonpans pe vini.

¹² Zot pou ganny apele Pep Sen, Pep ki SENYER in libere. Ou pou ganny apele Mon Dezir, Lavil Swazi.