Ezai 60 - Labib An Kreol Seselwa

Laglwar Zerizalenm dan Lavenir

¹ Zerizalenm! Leve! Briye! Akoz ou lalimyer in arive e laglwar prezans SENYER in leve lo ou.

² Teneb i kouver later e en fernwanr epe i kouver lepep. Me SENYER pou lev lo ou e son laglwar ava aparet lo ou.

³ Bann nasyon pou mars dan ou lalimyer e bann lerwa dan laklerte sa nouvo zour ki pe leve pour ou.

⁴ Lev ou lizye e get otour ou; zot tou, zot in rasanble; ansanm, zot pe vin kot ou; ou bann garson i arive, sorti lwen; ou bann fiy pou ganny anmennen dan lebra zot nouris.

⁵ Ler ou pou war sa, ou pou ranpli avek lazwa; ou leker pou bate avek lemosyon, ou pou rezoui dan lazwa. Trezor bann zil lanmer pou ariv ziska kot ou e larises bann nasyon pou vin kot ou.

⁶ En kantite samo pou kouver ou teritwar, bann zenn samo sorti Madyann ek Efa; tou bann zabitan ki sorti Saba pou vini. Zot pou anmenn lor ek lansan e zot pou proklanm louanz SENYER.

⁷ Tou bann troupo ki sorti Kedar pou rasanble kot ou. Bann mouton sorti Nebayot pou la pour ou servis; zot pou ganny aksepte lo mon lotel e mon pou fer splander mon tanp briye.

⁸ Lekel sa bann ki pe anvole parey en nyaz, parey bann pizon ki pe retourn ver zot lakaz?

⁹ Zabitan bann zil pou met zot lespwar dan mwan. Bann bato sorti Tarsis, an premye ki pou anmenn ou bann garson ki sorti byen lwen, avek zot kargezon larzan ek lor pour loner non SENYER ou Bondye e pour Bondye Sen Izrael, akoz in glorifye ou.

¹⁰ Bann etranze pou refer ou bann miray; zot bann lerwa pou servi ou, akoz dan mon lakoler mon'n pini ou. Me dan mon labonte, mon'n pran pitye pour ou.

¹¹ Ou bann laport pou reste touzour ouver; zot pa pou zanmen ganny fermen, ni lizour ni aswar. Konmsa, bann nasyon pou kapab anmenn zot bann larises kot ou. Avek zot lantouraz, bann lerwa pou vini, enn deryer lot.

¹² Sa nasyon ek sa rwayonm ki pa aksepte servi ou, pou ganny detri. Sa bann nasyon pou konpletman disparet.

¹³ Bann diferan kalite pye dibwa ki fer laglwar Liban, pou ganny anmennen kot ou. Zot pou fer en zoli dekor dan mon sanktyer, e mon pou glorifye sa landrwa kot mon repoz mon lipye.

¹⁴ Desandan bann ki kraz ou pou vin kot ou, latet bese; tou sa bann ki ti mepriz ou pou prostern devan ou. Zot pou apel ou Lavil SENYER, Siyon, lavil Bondye Sen Izrael.

¹⁵ Otrefwa, ou ti'n ganny abandonnen, ai, deteste, san personn pas kot ou. Me aprezan, mon pou fer ou vin gran pour touzour, en rezon selebrasyon pour bann zenerasyon pour touzour.

¹⁶ Ou pou sis dile bann nasyon, ou pou sis larises bann lerwa. Alor, ou pou konnen ki mwan SENYER, mon ou Sover e ou Liberater, Bondye pwisan Zakob.

¹⁷ Mon pou fer vini lor olye bronz, mon pou fer vini larzan olye fer; bronz dan plas dibwa, fer dan plas ros. Mon pou met lape pour vey lo ou, Lazistis, pour diriz ou.

¹⁸ Pou nepli antann koz lo vyolans dan ou pei, ni devastasyon ni destriksyon dan ou teritwar; ou pou apel ou bann miray delivrans e ou bann laport louanz.

¹⁹ Soley pa pou ekler ou pandan lazournen, ni lalin pandan lannwit. Me SENYER li menm ki pou ou lalimyer pour touzour; laglwar Bondye ki pou ekler ou.

²⁰ Ou soley pa pou zanmen kouse ou lalin pa pou zanmen disparet; akoz SENYER ki pou ou lalimyer pour touzour e ou bann zour dey pou fini.

²¹ Tou ou pep pou vin bann zis; zot pou pran posesyon sa later pour touzour. Zot boutir ki mon ti plante, travay mon lanmen, pour fer mon laglwar.

²² Parmi zot, sa ki pli pti, pou vin en milye; sa ki pli feb, pou vin en nasyon pwisan. Mwan SENYER, mon pa pou tarde pour realiz tousala dan son letan.