Ezai 58 - Labib An Kreol Seselwa

Vre Fason Fer En Zenn

¹ Kriy byen for! Pa per pou fer tande ou lavwa! Fer ou lavwa rezonnen parey en tronpet! Dir mon pep son bann fot e desandan Zakob son bann pese.

² Pourtan, tou le zour zot rod mwan; zot kontan pour konn semen ki mon oule zot swiv, konmsi zot ti en nasyon ki pratik lazistis e ki pa'n abandonn komannman zot Bondye. Zot demann mwan rann bann zizman ki zis, zot anvi retourn kot Bondye.

³ Akfer nou fer en zenn si ou pa war nou? Akfer nou imilye nou, si ou pa pran ka? Zour zot fer en zenn, zot rod zot prop lentere e zot kraz tou zot bann travayer.

⁴ Ler zot fer en zenn zot pas zot letan dispit, lager e tir koudpwen. Pa avek sa kalite zenn ki zot pe fer ozordi ki zot pou fer tande zot lavwa lao.

⁵ Eski sa i kalite sakrifis ki fer mwan plezir? Eski sa i en zour kot dimoun i imilye li? Ler i kourb latet parey en tiz banbou e dormi dan lenz dey ek lasann ou apel sa en zour ki SENYER i kontan?

⁶ La zenn ki fer mwan plezir: Detas bann lasenn lenzistis, tir sa fardo ki pez lo ou zepol, rann lib dimoun ki ganny kraze e debaras bann fardo ki gard ou lesklav.

⁷ Se kan ou partaz ou dipen avek sa enn ki lafen, abrit kot ou sa enn ki napa lakaz, kouver sa enn ki napa lenz pour met lo li, pa tourn ledo avek ou prop frer ki dan bezwen.

⁸ Alor, ou lalimyer ava briye parey soley leve granmaten; ou ava geri byen vit; tou ou bon repitasyon pou al devan ou e laglwar SENYER pou protez ou par deryer.

⁹ Alor, ou ava apel osekour. Mwan SENYER, mon pou reponn ou. Ou pou kriy osekour e mon pou dir ou: La mon la. Si ou tir sa bann fardo ki parmi lepep, si ou aret akize e dir dimal,

¹⁰ si ou partaz ou manze avek sa enn ki lafen e konsol sa ki dan lapenn, alor ou lalimyer pou briy dan teneb e fernwanr ava parey soley midi.

¹¹ SENYER pou touzour gid ou e donn ou tou sa ki ou bezwen. I pou redonn ou lafors ler ou dan difikilte e ou ava parey en zarden byen aroze, parey en sours ki pa zanmen mank delo.

¹² Alor, ou ava repar bann lavil ki'n tonm anrin; ou pou rekonstri fondasyon bann zenerasyon pase. Dimoun pou apel ou: Sa enn ki repar bann miray grennen, e restor bann semen e rann lavil abitab.

¹³ Si ou vey ou lepa pandan saba; si ou pa okip ou prop zafer dan mon zour sakre; si ou fer saba ou plezir e ou respekte sa zour sakre SENYER; si ou onor sa zour e pa fer ou prop volonte, ni fer ou prop zafer, e evit fer bann konversasyon initil,

¹⁴ alor, ou pou trouv lazwa dan SENYER, e mon pou fer ou vwayaz an triyonf; mon pou nouri ou avek patrimwann ou zanset Zakob. Labous SENYER ki'n koze.