Ezai 57 - Labib An Kreol Seselwa

Bondye I Kondann Ladorasyon Zidol

¹ Bann zis i ganny detri e personn pa pran ka. Bann fidel i disparet e personn pa konpran. Annefe, bann ki fidel anver Bondye pe disparet, anglouti dan maler.

² Me zot ava antre dan lape. Sa bann ki mars drwat ava dormi anpe lo zot lili.

³ Me zot, bann zanfan en fanm sorsye, piti en fanm adilter, en prostitye! Vin isi.

⁴ Lekel ki zot pe monke? Kont ki zot pe ouver gran zot labous e tir zot lalang? Zot bann zanfan revolte, en zenerasyon koronpi.

⁵ Zot brile anndan avek move dezir anba bann pye dibwa sakre, anba tou pye dibwa avek feyaz ver. Zot ofer an sakrifis zot zanfan dan bann vale, obor larivyer, dan lafant ros.

⁶ Parmi bann ros poli dan vale, sanmenm sa par ki vin pour zot. Zot in ofer sakrifis labwason; zot in anmenn sakrifis sereal. Eski zot krwar ki tousala i kapab apez mwan?

⁷ Zot in enstal zot landrwa dormi anler lo en montanny tre o. Laba, ki zot in monte pour ofer zot sakrifis.

⁸ Zot in met zot bann garanti deryer laport ek son montan; Zot in al lwen avek mwan e zot in tir zot lenz, mont dan lili e elarzi zot plas dormi e zot in fer en bon laranzman avek bann zonm; zot kontan pour al dormi avek zot e admir zot touni.

⁹ Zot in prezant zot devan bondye Molek avek delwil e en kantite parfen. Zot in anvoy zot bann mesaze tre lwen e menm anvoy zot ziska dan lemonn lanmor.

¹⁰ Zot in fatige afors marse, me zot pa dir: Mon'n ganny ase! Zot lanvi in repran zot; alor, zot pa'n santi lafatig.

¹¹ Lekel ki fer zot enkyet e fer zot per pour zot koz manti e oubliy mwan, pour ki zot pa reflesir? Eski akoz mon ti gard silans e ferm mon lizye depi lontan, ki ou pa ti per mwan?

¹² Mon pou fer konnen zot swadizan lazistis e zot bann aksyon. Me sa pa pou dan zot lentere.

¹³ Ler zot ava kriy osekour, eski zot koleksyon zidol pou vin delivre zot? En divan pou fer tousala anvole; zis en souf pou fer zot disparet. Me sa enn ki met li anba mon proteksyon, ava resevwar sa pei koman son patrimwann e mon montanny sakre koman son posesyon.

Bondye I Promet Led ek Gerizon

¹⁴ I pou ganny dir: Repar semen, degaz lari, tir tou bann lobstak lo semen mon pep.

¹⁵ La sa ki sa enn ki plase tre, tre o, ki son demer i dan leternite, ki port non Sen i deklare: Mon reste lao dan en landrwa ki sen, me osi avek bann ki'n ganny kraze, osi avek bann ki'n ganny abese; pour relev lespri bann ki'n ganny kraze, pour relev lespri bann ki'n ganny abese.

¹⁶ Mon pa pou touzour akize, mon pa pou touzour ankoler, pour ki ni bann lespri ni souf bann kreatir ki mon'n kree ava afebli devan mwan.

¹⁷ Mon ti ankoler akoz zot ti tro anvye. Alor, mon'n frap zot e mon'n kasyet anba mon lakoler. Me zot ti kontinyen swiv zot move semen dan revolt.

¹⁸ Mon ti war son bann fason fer; me mon pou geri li; mon pou kondwir li e rekonpans li avek konsolasyon e osi tou bann ki port dey pour li.

¹⁹ SENYER i deklare: Lape! Lape pour sa enn ki lwen, pour san enn ki pros! Mon pou geri zot tou!

²⁰ Me bann move dimoun, zot parey gro lanmer; zot pa kapab reste trankil; zot bann laroul i brouy labou ek salte.

²¹ Napa okenn lape pour bann malfeter, mon Bondye i deklare.