Ezai 56 - Labib An Kreol Seselwa

Pep Bondye Pou Sorti dan Tou Nasyon

¹ La sa ki SENYER i deklare: Gard lazistis, e pratik sa ki drwat, akoz mon delivrans i pros pou arive. Mon plan pour sov ou pou ganny devwale.

² Sa enn ki fer sa, ki pa mars akote, ki obzerv saba e pa dezonor li e ki evite fer sa ki mal; i en dimoun ki ere.

³ Pa les sa etranze ki'n atas li avek SENYER dir: SENYER pou sirman separ mwan avek son pep. Pa les en enik dir: Mon'n vin en pye dibwa sek.

⁴ La sa ki SENYER i deklare: Bann enik ki gard mon bann saba ki swazir pour fer mwan plezir e ki gard fidelman mon lalyans:

⁵ Mon pou donn zot, dan mon tanp, dan son bann miray, en moniman e en non ki meyer ki bann garson ek fiy. Mon pou donn zot en non ki reste pour touzour, ki pa pou zanmen ganny efase.

⁶ Bann etranze ki'n atas zot avek SENYER, ki onor li, ki kontan non SENYER, ki vin son serviter, zot tou ki obzerv saba e pa dezonor li, ki gard fidelman mon lalyans,

⁷ mon pou anmenn zot lo mon montanny sakre, donn zot lazwa dan mon tanp. Mon pou aksepte zot bann sakrifis konplet e zot bann don lo mon lotel, akoz mon tanp pou ganny apele en landrwa lapriyer pour tou dimoun.

⁸ Senyer BONDYE ki rasanble bann ki'n ganny rezete dan Izrael i deklare: Mon pou rasanble lezot ankor avek sa bann ki'n ganny deza rasanble.

Bann Sef Izrael I Ganny Kondannen

⁹ Zot tou bann zannimo sovaz, bann zannimo sovaz ki dan lafore! Vin devore.

¹⁰ Bann santinel dan Izrael pa war kler; zot pa konn nanryen; zot tou, zot parey bann lisyen trankil; zot pa ni kapab aboye; zot tal zot ater dan rev, zot kontan zis dormi.

¹¹ Me zot, zot en bann lisyen voras ki pa zanmen ase manze. Zot en bann berze ki pa konpran nanryen. Sakenn i swiv son prop semen, sakenn i rod zis son lentere.

¹² Zot dir: Vini! Annou al rod diven. Annou soul nou avek labwason for. Demen pou parey ozordi; bwar pa pou manke.