Ezai 55 - Labib An Kreol Seselwa

Bondye I Ofer Son Konpasyon

¹ Zot ki swaf! Vin bwar delo. Zot ki napa larzan! Vini, vin manze pour nanryen! Vini, vin aste diven ek dile san larzan, san peye!

² Akfer ou depans ou larzan pour aste sa ki pa nouri ou? Akfer fatig ou pou sa ki pa donn satisfaksyon? Ekout mwan byen, manz sa ki bon e ou ava byen apresye bon manze.

³ Met ou zorey apik! Vin kot mwan; Ekoute e ou ava viv! Mon pou fer avek ou en lalyans eternel; mon fidelite pour David i asire.

⁴ Mon'n fer li vin en temwen pour bann pep, en sef ki komann bann pep.

⁵ Ou pou apel bann nasyon ki ou pa konnen; bann nasyon ki pa konn ou, pou tay kot ou, akoz SENYER ou Bondye, Sen dan Izrael, in glorifye ou.

⁶ Rod SENYER letan zot ankor kapab trouv li, apel li letan i lanmenm pros.

⁷ Bann move dimoun devre sanz zot mannyer viv. Bann ki mazin fer sa ki mal devre abandonn zot move lespri e retourn ver SENYER ki ava pran konpasyon pour zot, ver nou Bondye, akoz i pardonn tou avek zenerozite.

⁸ La sa ki SENYER i deklare: Mon panse pa parey zot panse. Mon mannyer fer osi, pa parey zot mannyer fer.

⁹ Parey lesyel i lwen par lao later, mon fason azir i bokou pli lwen par lao zot fason azir e mon panse i pli o ki zot panse.

¹⁰ Parey lapli ek lannez i tonbe sorti dan lesyel e ki zot pa retourn avan ki zot in aroz later, san fertiliz li e fer bourzonnen bann plant, san prodwir bann lagrenn pour sa fermye e dipen pour sa enn ki lafen,

¹¹ demenm, parol ki pou sorti dan mon labous pa pour retourn ver mwan san ki i'n fer son lefe, san ki i'n akonpli mon dezir e realiz sa ki mon'n anvoy li fer.

¹² Zot pou sorti dan lazwa e retourn dan lape. Devan zot, bann montanny ek bann kolin pou sant lazwa e tou pye dibwa ki dan bann laplenn pou bat lanmen.

¹³ Pye sipre pou pous dan plas brousay; dan plas bann plant pikan, bann plant odoran pou pouse. Sa ava en loner pour SENYER, en siny pour touzour. I pa pou zanmen ganny detri.